GALATYEK 3 - BUKUIT NE TILIIL Sireet ne Dutero Kanon

Ng'atuutyet anan Kayaneet

¹ Ee Galatiechu perberen, ng'oo ne kibanak, okweek che ki kinde Jeso Kristo taitap konyekwok kotook keele ki kigartaat?

² Ni kityo ne amache aneetenagei, Ki otaach Kabuuset ne Tiliil eng' poisyonigap Ng'atuutyet, anan eng' kaseet ne po kayaneet?

³ Tos kaagaa oo perberen ko uu nooto? Ngo ki otau eng' Kabuuset ne Tiliil, omache nguno oegu che ogesunotingei eng' poorto?

⁴ Tos ki onyalilse eng' tuguuk che chaang' puch? Ngot ko puch iman.

⁵ Tos ineendet anyun ne koonok Kabuuset ne Tiliil, ak koyaei kwang'utik eng' kwenung'wong', ko tos yaei eng' poisyonigap Ng'atuutyet, anan eng' kaseet ne po kayaneet?

⁶ Agot ko uu ye ki iyan `Abraham Kamuktaindet, ak ki kiityi ineendet kobunji imanda.

⁷ Ongen anyun ole icheeget che po kayaneet, ko weeriitap Abraham chooto.

⁸ Ak kisip kogeer siruutyet kole iityin Kamuktaindet imanda Pororyosyek eng' kayaneet, kogisip koamji logoiywek che myach Abraham, koleenji, Kiberuuri pororyosyek tugul eng' inyee.

⁹ Nooto anyun, kiberuuri icheeget che po kayaneet kobooto Abraham ne iyanaat.

¹⁰ Amu tugul che mi eng' poisyonigap Ng'atuutyet, komiitei eng' chubeet: amu ki kisir keele, Chuboot chii age tugul ne ma tebyei eng' tuguuk tugul che ki kisir eng' bukuitap Ng'atuutyet, keele koyai chooto.

¹¹ Taagu anyun keele, ma mi chii ne kiityin imanda eng' Ng'atuutyet eng' taitap Kamuktaindet: amu, Sabei ne po imanda eng' kayaneet;

¹² ak ma po Ng'atuutyet kayaneet; ago, Ineendet ne yaei chooto kosabei eng' chooto.

¹³ Ki ityaachech Kristo eng' chubisyetap Ng'atuutyet ye ki ek ineendet chubeet agobo acheek: amu ki kisir keele, Chuboot chii age tugul ne kisonginini eng' keetit:

¹⁴ si kobiit konyonji Pororyosyek kaberuretap Abraham eng' Kristo Jeso; si kobiit ketaach arorutyetap Kabuuset ne Tiliil eng' kayaneet.

Ng'atuutyet ak Kayomiset

¹⁵ Che kitupche, amwae ko uu piteetap chii: Agot ngo arorutyetap chii nooto, ko ye kagigimit, koma mi chii ne walei koek puch, anan kotesyi.

¹⁶ Ki kimwachi anyun Abraham arorutichooto, ak keswondennyi. Ma mwaei kole, “Igoochin kesweekyik,” ko uu ye kachang'a; ago ko uu agenge, kole, “Ak eng' keswondeng'ung',” nooto ko Kristo.

¹⁷ Amwae ni anyun ale; Kayomiset ne kisip kogimit Kamuktaindet, nooto Ng'atuutyet ne kinyonei ko kagobata kenyiisyek pogol ang'wan ak sosom, ko mawalei koek puch, keele, si koyai arorutyet koek ne ma tilei kiy.

¹⁸ Amu ngo punu poroteet Ng'atuutyet, koma ko po arorutyet anyun: ago ki igoochi `Kamuktaindet Abraham eng' arorutyet.

¹⁹ Nee anyun Ng'atuutyet? Ki kites amu pistautik, agoi koit keswoot ye mi ineendet ne kiga kichopchi arorutyonooto; ak ki king'at eng' malakaisyek eng' eutap katuiyoindet.

²⁰ Katuiyoindet anyun koma po agenge; ago Kamuktaindet ko agenge.

Kiit ne yaei ng'atuutyet

²¹ Tos kirindoi Ng'atuutyet arorutigap Kamuktaindet? Achicha, ma uu nooto: amu nda kiga kigon Ng'atuutyet ne imuuchi kosoop, ta kibunjin imanda Ng'atuutyet.

²² Ago ki koratyi siruutyet tuguuk tugul kimnateetap tengekto, si kobiit kigoochi che iyani, arorutyet eng' kayaneet eng' Jeso Kristo.

²³ Ago ye ki tomo konyo kayaneet, ko ki kiriibech eng' Ng'atuutyet. Kiga kiratech agoi koit kayaneet ne kitun keng'aany eng' let.

²⁴ Ki ek anyun Ng'atuutyet kaneetindennyo ne imutyinech Kristo, si kobiit kiityech imanda eng' kayaneet.

²⁵ Ago nguno anyun, ko kagonyo kayaneet, koma koboiywech kaneetindet.

²⁶ Amu okweek tugul ko oo weeriigap Kamuktaindet, eng' kayaneet, eng' Kristo Jeso.

²⁷ Amu che tee eng' okweek che ki kibatisanjok Kristo ko ki olaach Kristo.

²⁸ Ma imugaksei keele mi Yahudyot anan Yunanindet, ama mi otwogindet anan ne ityagat, ama mi ne muren anan ne tye: amu okweek tugul ko oo agenge eng' Kristo Jeso.

²⁹ Ak ngot oo po Kristo, ko oo kesweegap Abraham anyun che namei tuguuk ko uu eng' arorutyet.