AMDOINDET 3 - BUKUIT NE TILIIL Sireet ne Dutero Kanon

Kasartap kiit age tugul

¹ Mi kasartap kiy age tugul, ak mi peetuutap ng'olyoot age tugul eng' kururetap kipsengwet.

² Peetuut ne kisige chii ak peetuut ne meei chii; peetuut ne kiminsei ak peetuut ne kitutu chooto kiga kimin;

³ peetuut ne kibarisye ak peetuut ne kinyaise; peetuut ne kibutisyei, ak peetuut ne kiteekse;

⁴ peetuut ne ki riirtos ak peetuut ne kiroritos; peetuut ne kiteitos ak peetuut ne kiurereni;

⁵ peetuut ne ki wiirtoi koik ak peetuut ne kiyumi koik; peetuut ne kitoroochegei ak peetuut ne ma kitoroochegei;

⁶ peetuut ne ki cheeng'sei ak peetuut ne kibeeti; peetuut ne kigonori ak peetuut ne kimetoi;

⁷ peetuut ne kigereeri ak peetuut ne kinabisye; peetuut ne kisistos ak peetuut ne ki ng'alaaldos;

⁸ peetuut ne ki chamisye ak peetuut ne kiwegisye; peetuut ne po lugeet ak peetuut ne po kaalyeet.

⁹ Nee keljinet ne nyooru ineendet ne poisyei eng' nooto pirtochingei?

¹⁰ Ki ageer poisyet ne Ki kogoochi `Kamuktaindet weeriigap piik kotigone.

¹¹ Ki koyai kiy age tugul kogararanit eng' peetuunnyi: ak ki inde mugulelwekwak kabwaatetap koigeny, ago nganda uu nooto, koma imuuch konai chiito poisyet ne ki koyai Kamuktaindet kobooch taunet agoi kagesunet.

¹² Angen ale ma mi kiit ne myee eng' icheek kosiir koboiboitu, ak koyai ne myee kotee kosaptos.

¹³ Ak kogeny konunetap Kamuktaindet konyaaljin chii age tugul koamis, koeeiso ak kobaibait eng' tuguuk che myach eng' pirtoennyi pogei tugul.

¹⁴ Angen ale, punjin koigeny kiy age tugul ne yaei Kamuktaindet. Ma kimuuchi ketesyi kiy anan keistoe kiy. Ki koyai Kamuktaindet, si koywei `piik ineendet.

¹⁵ No miitei, ko ki kobiit; ak no ta kobiitu, ko ki kobiit; ak kocheeng'ei kogeny Kamuktaindet no ki kosiirto.

¹⁶ Ki ageer anyun kogeny eng' kurereetap asiista ale mi yaityet kapkirwooget, ak komi yaityet ye mi imanda.

¹⁷ Ki amwa eng' muguleldanyu ale, “Tuun irwookyin `Kamuktaindet piik che po iman ak che yaach. Amu mi peetuut ne po ng'olyoot age tugul, ak ne po poisyet age tugul.”

¹⁸ Ki amwa eng' muguleldanyu ale, po weeriigap piik ng'olyoondoni, si kobiit kotyem Kamuktaindet icheek, ak kogeergei icheeget kole uu tyong'ik.

¹⁹ Amu kiit ne nyooru weeriigap piik konyooru tyong'ik, nyooru kiit agenge tugul. Ko uu ye meei age, ko uu nooto, meei age agine; ee, tinyei tugul kabuuset agenge, ama tinyei chiito etunateet kosiir tyong'ik, amu puch tugul.

²⁰ Pegu tugul ak kobendi komosta agenge. Po tugul ng'ung'unyek ak ketyingei tugul ng'ung'unyek.

²¹ Ng'oo ne ingen ngo wendi saboondap chiito parak ak ngo wendi ng'wony oriit ne po tyondo?

²² Ki ageer anyun ale, ma mi kiy ne myee, kosiir kobaibait chiito eng' poisyonikyik. Amu nooto kebebertanyi. Amu ng'oo ne weechi kogeny ineendet kogeer tuguuk che piitu let?