2 TIMOTEO 3 - BUKUIT NE TILIIL Sireet ne Dutero Kanon

Kayaneet ne ma mi eng' peetuusyek che po let

¹ Ago nai ni ile pwoonei eng' peetuusyek che po let egosyek che pichiien.

² Amu egu piik che chamegei icheegei, che chamei silingisyek, che ichaugei, che mendos, che poisyee chemerereet, che ingeleljin sigiikwak, che ma tinyei kongoi, che ma tiliileen,

³ che ma tinyei chamyet, che ma tinyei nyoetap kaat, che itaamsei, che ma riibegei, che kolgoleen, che ma chamei che myach,

⁴ ng'wektoik, ngelelik, che ilasugei, che chamei ureryet kosiir koek che chamei Kamuktaindet;

⁵ che tinyei kergeindap kayweet ne kiywei Kamuktaindet, ago eesyoi kimnateet ne po kaiyweonooto: istoegei chuuto ak icheek.

⁶ Amu pitunee chuuto che itoti kooriik, ak koluul kobogorisyek che perber che tinyei chalwogik che chaang', che indochin maguutik che teerchiin.

⁷ Che ineetegei kotugul, ago ma koi imuuch koityi naetap imanit.

⁸ Ak ko uu Janne ak Jambre, che ki kirinda Musa, koyaei chu ak icheek ko uu nooto, kirindoi imanit; piik che ki kong'emogis ng'omnatosyekwak, che petyotiin eng' ooreetap kayaneet.

⁹ Ago matesei tai: amu taagu perberindanywa eng' piik tugul, ko uu ne po chugai ak icheek.

Ng'aleegap Paulo che po let agobo Timoteo

¹⁰ Ago ki isup inyee kaneetisyennyu, atebeet, kiit ne atokyinige, kayaneet, mutyonet, chamyet, muitaet,

¹¹ usiisyosyek, nyalilwogik; tuguuchooto che kibwanjo eng' Antiok, ak Ikonia, ak Lystra; ki amuite eng' usiisyosyechooto tugul: ak kisarwo Kiptaiyat eng' chooto tugul.

¹² Ee, tugul che machei kotebi eng' atebeet ne myee eng' Kristo Jeso, konyooru usiisyet.

¹³ Ago tesoksei kiptengeginik ak keniik eng' yaityet, koberberisyei ak kiberberi.

¹⁴ Ago tebi inyee eng' tuguuk che ki ineetkei, ak che ki kiguiyeun, ingen icheeget che ki ineetegei;

¹⁵ ak kobooch ko ii lakwa ko ki ingen siruutik che tiliileen che imuuchi kong'omitin agoi yetunet eng' kayaneet ne miitei eng' Kristo Jeso.

¹⁶ Punu kabuusetap Kamuktaindet siruutyet age tugul, ak kotoreti eng' kaneetisyet, eng' kergong'yet, eng' kateechinet, eng' katigonet ne mi eng' imanda:

¹⁷ si kobiit koek chiitap Kamuktaindet, ne ineetat, ne ki kichop koek ne ititaat eng' poisyet age tugul ne myee.