2 ATEPTAP PEETUUSYEK 36 - BUKUIT NE TILIIL Sireet ne Dutero Kanon

Laitornatetap Jehoahas

¹ Ki ieet anyun `piigap emet Jehoahas weeriitap Josiah koek laitoryat eng' Jerusalem kogeer kwandanyi.

² Ki po Jehoahas kenyiisyek tiptem ak somok ye ki tau kolaitorani: ak ki laitoran arawek somok eng' Jerusalem.

³ Ak kiriibe laitornatennyi laitoryatap Misiri eng' Jerusalem, ak kimage emet talendaisyek pogol che po fedha ak talendait agenge ne po thahabu.

⁴ Ak ki ieet laitoryatap Misiri ng'eetap kamet Eliakim koboi Judah ak Jerusalem, ak kiweech kainennyi koguure Jehoiakim. Ak ki imut Neko ng'eetap kamet Jehoahas kwo Misiri.

Laitornatet ak luuleetap Jehoiakim

⁵ Ki po Jehoiakim kenyiisyek tiptem ak muut ye ki tau kolaitorani; ak ki laitoran kenyiisyek taman ak agenge eng' Jerusalem; ak ki yai ne ya eng' taitap Kamuktaindet ne Toroor Kamuktaindennyi.

⁶ Ki togos Nebukadnezar laitoryatap Babilon konyo kobargei ak ineendet, ak kirate ineendet mugurek, komut kwo Babilon.

⁷ Ki ip kogeny Nebukadnezar tereenigap kootap Kamuktaindet ne Toroor koba Babilon, ak konde hekalunnyi eng' Babilon.

⁸ Ak poisyonik che ng'etunotiin che po Jehoiakim, ak tuguuk che kiwechei che ki yai, ak tuguuk che yaach che ki kinyoorchi ineendet, ogeero, siraatiin eng' kitabuutap laitorinigap Israel ak Judah: ak ki laitoran Jehoiakin weeriinnyi kogeer ineendet.

Laitornatet ak luuleetap Jehoiakin

⁹ Ki po Jehoiakin kenyiisyek sisiit ye ki tau kolaitorani; ak ki laitoran arawek somok ak peetuusyek taman eng' Jerusalem: ak ki yai ne ya eng' taitap Kamuktaindet ne Toroor.

¹⁰ Ak ye kingo keskei kenyiit koyook Laitoryat Nebukadnezar piik komut ineendet konyo Babilon, kobooto tereenik che korooron che po kootap Kamuktaindet ne Toroor, ak ki ieet Zedekiah ng'eetap kamet koek laitoryat koboi Judah ak Jerusalem.

Kolaitorani Zedekiah eng' Judah

¹¹ Ki po Zedekiah kenyiisyek tiptem ak agenge ye ki tau kolaitorani: ak ki laitoran kenyiisyek taman ak agenge eng' Jerusalem.

¹² Ak ki yai ne ya eng' taitap Kamuktaindet ne Toroor Kamuktaindennyi; ki ma iming'injigei maotyot Jeremiah ye ki ng'alaal ng'aleek che punu kutitap Kamuktaindet ne Toroor.

Kolulei Jerusalem

¹³ Ak ki ingelelji kogeny Laitoryat Nebukadnezar, ne ki kabirchi koyasyo eng' Kamuktaindet: ago ki iuit kaatinnyi ak muguleldanyi, ma weekyigei Kamuktaindet ne Toroor, Kamuktaindetap Israel.

¹⁴ Ki ingelelso kogeny miising' tisiik tugul che eecheen, ak piik, koosup tuguuk tugul che kiwechei che po pororyosyek; ak ki imurwon kootap Kamuktaindet ne Toroor ne kiga kotabaan eng' Jerusalem.

¹⁵ Ak ki iyooktoi Kamuktaindet ne Toroor, Kamuktaindetap kwanisyekwak, piikyik, komusta koba ole mi icheek; amu ki riiree piikyik, ak ole menyei ineendet.

¹⁶ Ago ki reeny pichooto ki iyooktoi Kamuktaindet, ak ki sas ng'aleekyik, kogengenie maotikyik, agoi konereekyi `Kamuktaindet ne Toroor piikyik, kot koma komi kiit ne kinyae.

¹⁷ Komutyi anyun icheeget laitoryatap Kaldeik, ne ki nyo kobar neranikwak eng' rotwetap chok, eng' kootap oldanywa ne tiliil, ama riiree muren anan tye, poiyot anan ne neegit koolil: ki inde tugul eunnyi.

¹⁸ Ak ki ip anyun tuguuk tugul che po kootap Kamuktaindet, che eecheen ak che mengeechen, ak konoraigap kootap Kamuktaindet ne Toroor, ak konoraigap laitoryat, ak che po pounikyik, ki ip tugul koba Babilon.

¹⁹ Ak ki peel kootap Kamuktaindet, ak kobut irimeetap Jerusalem, ak kobeel kooriik tugul che po laitoryat, ak kong'em tuguuk tugul che korooron che ki mi koorchooto.

²⁰ Ak ki imut koba Babilon che kiga chililye rotwetap chok; ak ki ek otwogikyik ak che po weeriikyik agoi laitornatetap Persia:

²¹ si kosulda ng'olyootap Kamuktaindet ne Toroor ne ki mwa eng' kutitap Jeremiah, agoi kogasegei emet sabatoisyekyik: amu ki riip sabatoisyekyik eng' peetuusyechooto ki ma komenyei chii, kot kosulda kenyiisyek tamanwogik tisap.

Komwaitoi Cyrus agobo katyaknatetap luulenik

²² Ak eng' kenyiit ne po tai ne po Cyrus laitoryatap Persia, si kobiit kosulda ng'olyootap Kamuktaindet ne Toroor ne ki mwa eng' kutitap Jeremiah, kochirchir `Kamuktaindet ne Toroor Cyrus laitoryatap Persia, si komwaita eng' laitornatennyi tugul, ak kosiirta kogeny, kole

²³ kamwa ko uu ni Cyrus laitoryatap Persia, kole, “Ki koono Kamuktaindet ne Toroor, Kamuktaindetap kipsengwet, laitornatosyek tugul che po ng'wony; ak king'ata ateekyi koot eng' Jerusalem, ne mi Judah. Ingotogosta age tugul eng' okweek che oo po piikyik tugul, ak ingotep Kamuktaindet ne Toroor Kamuktaindennyi kobooto chiichooto.”