1 PETERO 2 - BUKUIT NE TILIIL Sireet ne Dutero Kanon

Koita ne sabei

¹ Oiste anyun yaityet tugul, ak ng'aalseet tugul, ak chombilisyosyek, ak ng'etkonda, ak ng'alaalet age tugul ne ya,

² omach miising' cheego che po ng'omnatetap saboon, che ma tinyei ng'aalseet, ko uu manyurunik, si kobiit onerye agoi yetunet;

³ ngo ki ochamcham ole Kiptaiyat ko po myeeindo:

⁴ obwanjini ineendet koita ne sabei, ne ki eesyo piik iman, ago lewenot eng' Kamuktaindet, ne chamat miising',

⁵ ak okweek, che oo koik che saptos, kiteechok oegu koot ne sabei, oegu che poisyei eng' tiseinateet ne tiliil, si ogoite korosegap saboon, che taachaksei eng' Kamuktaindet eng' Jeso Kristo.

⁶ Amu mi eng' sireet kole, Ogeero, kande Zion koita, koita ne po luuita ne lewenot ak ne chamat miising': Ak ineendet ne iyani, koma ililani.

⁷ Eng' okweek anyun che oyani kochamaat miising' ineendet: ago eng' icheek che ma iyani, ko, Koita ne ki eesyo teegik, Ki kiyai koyata koek metitap luuita;

⁸ ak ko, koita ne inachi piich, ak ko rwandet ne riichei piich; amu kinachi icheek eng' ng'olyoot, amu ma kase iit: ki kinde icheek agobo nooto.

⁹ Ago okweek ko oo pororyet ne kigelewen, oo che poisyei eng' tiseinateet ne po kaplaitoryat, pororyet ne tiliil, piik che punjin Kamuktaindet, si kobiit obarte telunatosyek che po ineendet ne kiguurok omang'une mesundeito omong'ji lapkeiyennyi ne kikweng'e.

¹⁰ Okweek che ki ma ko oo pororyet eng' tai, ago nguno ko oo pororyetap Kamuktaindet; che ki ma osich rireenetapkei, ago nguno ko kaosich rireenetapkei.

Kesap ko uu kiboitinigap Kamuktaindet

¹¹ Chamanichu, asoomok ko uu ye oo toek ak ko oo kiprutoinik, ale oistoegei maguutik che po poorto, che poortos ak saboondo;

¹² okweek che otinye atebeet ne nyolu eng' kwenutap Pororyosyek, si nganda itaamok ko uu yaigap yaityo, kotoroor Kamuktaindet eng' peetuutap rutochinet eng' poisyonikwok che myach che keerei.

¹³ Ogas iit kiit age tugul ne ng'atei piik amu Kiptaiyat: agot ngo laitoryat, ne pou tugul;

¹⁴ anan ko pounik, che iyoogu ineendet agobo mugetuut ne yaakyin yaigap yaityo, ak agobo kalasunet eng' icheek che yaei ne myee.

¹⁵ Amu uu nooto mageetap Kamuktaindet, ale oger eng' yautik che myach abusnatetap piik che perberen:

¹⁶ ko uu che ityagatin, amoboisyee katyaknateng'wong' ko uu kiit ne otektoe yaityet, ago oboisye ko uu otwogigap Kamuktaindet.

¹⁷ Oteech piik tugul. Ocham che otupche. Oiywei Kamuktaindet. Oteech laitoryat.

Kaboorunetap nyaliildap Kristo

¹⁸ Okweek che oo otwogik, ogas iit kiptainikwok eng' kaiyweisyet tugul; ma che myachen ak che talaen kityo, ago ogas iit che kolgol ak icheek.

¹⁹ Amu chamaksei niito, ngot komuita chii eng' aragenosyek kobwaati Kamuktaindet, ye kinyaliili ama yai kiy ne ya.

²⁰ Amu teegis nee, ngot oyai tengek ak kebirok, ak omuitoi? Ago ngot oyai ne myee, ak onyalil, ak omuitoi, ko chamaksei niito eng' Kamuktaindet.

²¹ Amu ki kiguurchok niito: amu kinyalil Kristo agine agobo okweek, kobagakwok kaboorunet, si kobiit osup tyegutikyik:

²² ineendet ne ki ma yai tengek, ama ki nyoorchi kutinnyi ng'aalseet:

²³ ne ye ki ngeng'emji kuut, koma ng'em kuut; ye kingo nyalil, koma imuiso; ago ki igoochigei ineendet ne irwoochi eng' imanda:

²⁴ ineendet ne ki ip tengekwogikyok eng' poortanyi eng' keetit parak, si kesapchee eng' imanda; acheek che kiga kebekyi tengekwogik; ki kisaabenok pirutikyik.

²⁵ Amu ki obetooti ko uu keechiirek; ago kaoweekyigei Mestowot ak ko Riibindetap saboonwekwok.