1 PETERO 1 - BUKUIT NE TILIIL Sireet ne Dutero Kanon

Kagateet

¹ Petero, kayooktoindet ne po Jeso Kristo, asirchini che ki kilewen, punootik che po piik che ki koiyesta, eng' Ponto, Galatia, Kapadokia, Asia, ak Bithynia,

² ko uu eng' naetap Kamuktaindet Kwanda ne kisip konai, eng' katabaanetap Kabuuset ne Tiliil, agoi kasetap iit ak isetap korotiik che po Jeso Kristo: Ingotesak myeeindo ak kaalyeet eng' okweek.

Kamang'unet ne sabei

³ Iberuurot Kamuktaindet Kwandap Kiptaiyandennyo Jeso Kristo, ne kisichech kogeny eng' rireenennyi ne oo kenyooru kamang'unet ne sabei eng' ng'eetyeetap Jeso Kristo ne ki mong' eng' che ki pek,

⁴ ketaach poroteet ne ma ng'emaksei, ama tinyei murwoonindo, ama petei, ne ki kigonorwok eng' kipsengwet,

⁵ okweek che ki riibei eng' kimnateetap Kamuktaindet eng' kayaneet si onyooru yetunet ne choboot keng'aany eng' peetuutap let.

⁶ Ne oboiboi miising' eng' nooto, nganda nguno eng' peetuusyek che matya, ngo nyolu, ko kagigoonok oaragense eng' yoomsosyek che chaang',

⁷ si kenyoor eng' kalasunet ak toroornatet ak teegisto, tyemet ne chamaksei ne po kayaneng'wong', ne tinyei kamanuutyet ne oo kosiir ne po thahabu che petos nganda kityemei eng' maat, eng' ng'ang'et ne po Jeso Kristo:

⁸ ne ochame nganda tomo ogeer; ineendet ne nganda mogeere nguno, oyani, ko oboiboi miising' eng' poiboiyet ne ma mwaoksei ak ko nyiitaat toroornatet:

⁹ ye tuun onyooru kasuldaetap kayaneng'wong', yetunetap saboonwekwok.

¹⁰ Ki cheeng' maotik ak kogilgilye miising' inne agobo yetunanooto, icheeget che ki maoten agobo myeeindo ne osiche:

¹¹ ye ki cheeng'ei peetuut ne ineet anan ole uu peetuut ne ki iboorchin Kabuusetap Kristo ne ki miitei eng' icheek, ye kisip kobaoryan agobo nyalilwogigap Kristo, ak toroornatosyek che isubi chooto.

¹² Che ki king'aang'ji, ma agobo icheeget, ago kiyaiywok okweek tuguuchuuto, che kagemwaiwok nguno eng' icheek che ki amwok logoiywek che myach eng' Kabuuset ne Tiliil ne ki kiyok eng' kipsengwet; tuguuk che machei malaikaisyek miising' kogeer.

Atebeetap chiitap Kristo

¹³ Eng' nooto anyun ogermen suenutigap kabwaatutikwok, oriipkei ak omang'u eng' kagesunetapkei myeeindo ne tuun ki ibwook eng' ng'ang'eetap Jeso Kristo;

¹⁴ ko uu lagok che kase iit, amoyaniegei maguutikwok che po tai eng' peetuusyek che ki po perberindang'wong':

¹⁵ ago ko uu ye tiliil ineendet ne kiguurok, oegu che tiliileen ak okweek eng' atebosyek tugul;

¹⁶ amu ki kisir keele, Oegu che tiliileen; amu aa tiliil anee.

¹⁷ Ak ngot oguure ineendet oleen Kwanda, ne irwoochi ko uu ole teptoi poisyetap chii age tugul, ama eng' tiytiyet, obendoti eng' kaiyweisyet eng' peetuusyekwok che omi ko oo toek:

¹⁸ ongen ole ki kityaachak omang'une atebeeng'wong' ne po puch ne ki onyooru eng' kwanisyekwok, ma eng' tuguuk che ng'emaksei, ko uu fedha anan thahabu;

¹⁹ ago eng' korotiik che po kamanuutyet ne oo, ko uu che po aarwet ne ma tinyei peruut ak ne ma tinyei tisya, chooto ko korotiigap Kristo:

²⁰ ne kisip konaam iman kotom kelumda ng'wony, ago ki king'aany eng' peetuusyek che po let agobo okweek,

²¹ che oo kayanik eng' Kamuktaindet amu ineendet, ne ki ing'eet ineendet komong' eng' che ki pek, ak kogoochi toroornatet; si kotebi kayaneng'wong' ak kamang'uneng'wong' eng' Kamuktaindet.

²² Amu ki otiliil saboonwekwok eng' kasetap iit ne ogase iit imanit kot koit chamyetap tupchosyek ne ma tinyei keniisyet, ochamye, okweegei eng' mugulelwekwok eng' kagiiletapkei:

²³ amu kigesichok kogeny, ma eng' kesweek che ng'emaksei ago eng' che ma ng'emaksei, eng' ng'olyootap Kamuktaindet, ne sabei ak kotebyei.

²⁴ Amu, Uu susweek poorwek tugul, ak uu taaptogap susweek toroornatennywa tugul. Restos susweek, ak kobutyo taaptook:

²⁵ Ago tebyei koigeny ng'olyootap Kiptaiyat. Niito ko ng'olyootap logoiywek che myach che ki kiamwok.