ኀበ ቲቶ 3 - ሐዲስ ኪዳን በልሳነ ግእዝ

ምዕራፍ 3 በእንተ ግብረ መምህራን

¹ ዘክሮሙ ለቀደምት ወለመኳንንት ከመ ይትአዘዙ በኵሉ ምግባረ ሠናይ ወይኩኑ ጥቡዓነ ቦቱ።

² ወኢይትቈጥዑ ወኢይትገዐዙ አላ መሓርያነ ወየዋሃነ ይኩኑ ምስለ ኵሉ ሰብእ።

³ እስመ ንሕነሂ ትካት አበድነ ዘእንበለ አእምሮ ወክሕድነ ወስሕትነ ወተቀነይነ ለፍትወት ወለሐውዝ ዘዘ ዚኣሁ ወተለውነ እኩየ ወተቃንኦ ወአሕሠምነ ወጸላእነ ቢጸነ።

⁴ ወአመ አስተርአየ ምሕረቱ ለእግዚአብሔር መፍቀሬ ሰብእ መድኀኒነ።

⁵ አኮ በምግባረ ጽድቅነ ዳእሙ በምሕረቱ አድኀነነ በጥምቀተ ዳግም ልደት ወተሐድሶ በመንፈስ ቅዱስ።

⁶ ዘሶጠ ላዕሌነ በብዕሉ በእንተ ኢየሱስ ክርስቶስ መድኀኒነ።

⁷ ከመ ንጽደቅ በጸጋሁ ወንረስ ተስፋ ሕይወት ዘለዓለም።

⁸ እሙን ነገር ወበእንተዝ እፈቅድ አነሂ ታጽንዖሙ ከመ የኀልዩ ተራድኦ በኵሉ ምግባረ ሠናይ እለ ተአመኑ በእግዚአብሔር ዝኬ ሠናይ ዘይበቍዖ ለሰብእ።

⁹ ነገረ ጋዕዝ ወእበድ ዘይፈጥሩ ወመሐደምት ወወክሕ ተገኀሦሙ እስመ ከንቱ ውእቱ ወኢይበቍዕ።

¹⁰ ለመስተካሕድ ብእሲ እምከመ ምዕረ ወካዕበ ገሠጽኮ ወአበየ ኅድጎ።

¹¹ ወአምሮ ከመ ዐላዊ ውእቱ ዘከማሁ ያስሕት ወያጌጊ ወይረክብ ኵነኔ።

ማኅተመ መልክእት

¹² ወእምከመ ፈነውክዎ ለአርጢሞን ኀቤከ አው ጢኪቆስ ፍጡነ ነዓ ኀቤየ ሀገረ ናቆጵል እስመ አጥባዕኩ እክርም ህየ።

¹³ ለዜማስ ጸሓፌ ሀገር ወለአጵሎስ ጽሑቀ አክብሮሙ ኢይጸነሱ ምንተኒ።

¹⁴ ወእሊኣነሂ ይትመሀሩ ምግባረ ሠናየ በዘይቀውሙ ውስተ ዘይትፈቀድ ግብር ከመ ኢይኅጥኡ ፍሬ።

¹⁵ አምኁከ ኵሎሙ እለ ምስሌየ አምኅ ኵሎ ዘያፈቅረነ በሃይማኖት ጸጋሁ የሀሉ ምስለ ኵልክሙ አሜን። ተፈጸመት መልእክት ኀበ ቲቶ ወተጽሕፈት በሀገረ ናቆጵል ወተፈነወት ምስለ አርጣማ ረድኡ። ወስብሐት ለእግዚአብሔር አሜን።