ኀበ ሰብአ ሮሜ 3 - ሐዲስ ኪዳን በልሳነ ግእዝ

ምዕራፍ 3 ተስእሎ በእንተ ተይህዶ ወግዝረት

¹ ምንትኑ እንከ ረባኁ ለተይህዶ ወምንትኑ ስላጤሃ ለግዝረት።

² ብዙኅ በኵሉ ምግባር ወቅድመ ውእቱ ተአምኖ በቃለ እግዚአብሔር።

³ ወእመኒ ቦ እለ ኢየአምኑ ኢአሚነ ዚኣሆሙኑ ይከልእ ባዕደ ከመ ኢይእመን በእግዚአብሔር ሐሰ።

⁴ እስመ እግዚአብሔር ጻድቅ ወኵሉ ሰብእ ሐሳዊ እስመ ከመዝ ይብል መጽሐፍ «ከመ ትጽደቅ በነቢብከ ወትማዕ በኵነኔከ።»

⁵ ወእመሰ በዓመፃ ዚኣየኑ ይቀውም ጽድቀ እግዚአብሔር ምንተ እንከ ንብል ይዔምፅኑ እግዚአብሔር ሶበ ያመጽእ መቅሠፍተ ላዕለ ሰብእ ሐሰ ወዘኒ እነብብ ሕገ ሰብእ እነብብ።

⁶ ወእፎኑመ እንከ ይኴንን እግዚአብሔር ዓለመ።

⁷ ወእመሰ ጽድቅ ውእቱ ቃለ እግዚአብሔር ወበሐሰተ ዚኣየ ተዐውቀ ዕበዩ ወስብሐቲሁ ለምንት እንከ ይኴንነኒ ከመ ኃጥእ።

⁸ ቦኑ እንጋ ንሕነ ዘከመ ይፀርፉ ላዕሌነ እለ ይፀርፉ ወይትሔዘቡነ ከመ ንሕነ ንብል ንግበር እኩየ ከመ ንርከብ ሠናየ ወሎሙሰ ጽኑሕ ደይኖሙ።

⁹ ምንተ እንከ ንብል ናሁ ወዳእነ ግዕዝናሆሙ ለአይሁዳዊ ወለአረማዊ እስመ ኵሎሙ ስሕቱ።

¹⁰ በከመ ይብል መጽሐፍ «አልቦ ጻድቅ ወአልቦ ጠቢብ።

¹¹ ወአልቦ ዘየኃሥሦ ለእግዚአብሔር።

¹² ኵሉ ዐረየ ወኅቡረ ዐለወ አልቦ ዘይገብራ ለሠናይት አልቦ ወኢአሐዱ።

¹³ ከመ መቃብር ክሡት ጐራዒቶሙ ወጸለሐዉ በልሳናቲሆሙ።

¹⁴ ሕምዘ አርዌ ምድር ታሕተ ከናፍሪሆሙ መሪር አፉሆሙ ወምሉእ መርገመ።

¹⁵ በሊኅ እገሪሆሙ ለክዒወ ደም።

¹⁶ ኀሣር ወቅጥቃጤ ውስተ ፍኖቶሙ።

¹⁷ ወኢየአምርዋ ለፍኖተ ሰላም።

¹⁸ ወአልቦ ፍርሃተ እግዚአብሔር ቅድመ አዕይንቲሆሙ።»

¹⁹ ነአምር ከመ ኵሉ ዘይብል ኦሪት ለእለ ውስተ ኦሪት ይቤሎሙ ከመ ይትፈፀም ኵሉ አፍ ወይኩን ግሩረ ኵሉ ዓለም ለእግዚአብሔር።

²⁰ እስመ ኢይጸድቅ ኵሉ ዘነፍስ በገቢረ ሕገገ ኦሪት በቅድመ እግዚአብሔር እስመ እምኦሪት ተዐውቀት ኀጢአት።

²¹ ይእዜሰኬ አስተርአየት ጽድቀ እግዚአብሔር እንዘ ኢይትገበር ሕገገ ኦሪት።

²² ኦሪት፥ ወነቢያት ኮንዎ ሰማዕተ ከመ በአሚን በኢየሱስ ክርስቶስ ይጸድቁ በኀበ እግዚአብሔር ኵሎሙ እለ የአምኑ ቦቱ።

²³ ኢፈለጠ ወኢሌለየ እስመ ኵሎሙ አበሱ ወጌገዩ ወኀደጉ ስብሐተ እግዚአብሔር።

²⁴ ወጽድቅሰኬ በከንቱ ኮነ በጸጋ ዚኣሁ ረከቡ ሕይወተ በኢየሱስ ክርስቶስ።

²⁵ እስመ ወድአ እግዚአብሔር ወገብሮ ሥርየተ ለአሚን በደሙ ከመ ያርኢ ጽድቆ በላዕለ እለ አበሱ እምትካት።

²⁶ በትዕግሥቱ ለእግዚአብሔር ወበኦሆ ብሂሎቱ ከመ ያእምርዎ ዮም ከመ ጻድቅ ውእቱ ወያጸድቆሙ ለእለ የአምኑ በአሚን በኢየሱስ።

በእንተ እለ ይትሜክሑ በሕግ

²⁷ በምንትኑ እንከ ይትሜክሑ ወበአይኑ ሕግ ይገብሩ አልቦ ባዕድ ሕግ ዘእንበለ አሚን።

²⁸ እስመ ነአምር ከመ ይጸድቅ ሰብእ በአሚን እንዘ ኢይገብር ሕገገ ኦሪት።

²⁹ ቦኑ ለባሕቲቶሙ ለአይሁድ እግዚአብሔር አኮኑ ለሕዝብኒ ወለአሕዛብኒ።

³⁰ እስመ አሐዱ ውእቱ እግዚአብሔር ዘያጸድቆ ለግዙር በአሚን ወለዘሂ ቈላፍ በአሚን ዳእሙ ያጸድቆ።

³¹ ሰዐርነሁ እንከ ሕገገ ኦሪት በእንተ አሚን ሐሰ አኮ ዘንስዕር ሕገ አላ ንሠርዕ።