ኀበ ሰብአ ሮሜ 2 - ሐዲስ ኪዳን በልሳነ ግእዝ

ምዕራፍ 2 በእንተ ዘይግዕዝ ቢጾ

¹ ዕጓለ እመሕያው በምንትኑ ዘትትዋሥኦ ለመኰንነ ጽድቅ ሶበ አንተ ዝኰ ዘትግዕዝ በላዕለ ባዕድ ሶበ ለሊከ ትገብር ዝኰ ዘትጸልእ በላዕለ ቢጽከ አኮኑ ርእሰከ ትግዕዝ እስመ ለሊከ ትገብሮ።

² ነአምር ከመ ጽድቅ ኵነኔሁ ለእግዚአብሔር ዘያመጽእ መቅሠፍተ ላዕለ እለ ይገብሩ ዘንተ ከመዝ።

³ ኀልዮ እስኩ ዕጓለ እመሕያው ለዝንቱ ለእመ ብከ ኀበ ታመሥጥ እምኵነኔሁ ለእግዚአብሔር ሶበ ለሊከ ትገብሮ ለዝኩ ዘትግዕዝ በላዕለ ባዕድ ወዘትጸልእ።

⁴ ትትሔዘብኑ ታስተዐብዶ ለእግዚአብሔር በብዝኀ ምሕረቱ ወበትዕግሥቱ ወበኦሆ ብሂሎቱ ላዕሌከ ኢተአምርኑ ከመ ምሕረቱ ለእግዚአብሔር ኪያከ ያገርር ኀበ ንስሓ።

⁵ ወባሕቱ በአምጣነ ታጸንዕ ልበከ ወኢትኔስሕ ትዘግብ ለከ መቅሠፍተ ለአመ ይበጽሐከ ኵነኔሁ ለእግዚአብሔር።

⁶ እስመ ውእቱ ይፈድዮ ለኵሉ በከመ ምግባሩ በኵነኔ ጽድቁ።

በእንተ ተዐጋሥያን ወከሓድያን

⁷ ወለእለሰ ተዐገሡ በምግባር ሠናይ ወየኀሥሡ ክብረ ወስብሐተ ውእቱኒ ይሁቦሙ ሕይወተ ዘለዓለም።

⁸ ወለእለሰ ከሓድያን ወዓላውያነ ጽድቅ ወመፍቀርያነ ዐመፃ ፍዳሆሙ መቅሠፍት ወመንሱት።

⁹ ወቍጥዓ ወገዓር ወምንዳቤ ለነፍሰ ኵሉ ሰብእ ዘእኩይ ምግባሩ እመኒ አይሁዳዊ ወእመኒ አረማዊ።

¹⁰ ክብር ወስብሐት ወሰላም ለኵሉ ዘሠናይ ምግባሩ እመኒ አይሁዳዊ ወእመኒ አረማዊ።

¹¹ እስመ ኢያደሉ እግዚአብሔር ለገጸ ሰብእ።

¹² እስመ ኵሎሙ እለ ፈድፈደ እምሕግ አበሳሆሙ ፈድፈደ እምሕግ ኵነኔሆሙ ወኵሎሙ እለ ዘእንበለ ሕግ አበሳሆሙ ዘእንበለ ሕግ ኵነኔሆሙ።

በእንተ እለ ይፈቅዱ ይጽደቁ በአጽምዖ መጻሕፍት

¹³ ቦኑ በአጽምዖ መጻሕፍት ይጸድቁ በቅድመ እግዚአብሔር አኮኑ ዳእሙ በገቢሮቱ ይጸድቁ።

¹⁴ አሕዛብኒ እለ አልቦሙ ሕግ ይሠርዑ ሎሙ ሕገ ወየሐግጉ ሎሙ ለሊሆሙ ወይገብሩ ዘበሕጎሙ።

¹⁵ ወያሬእዩ ገቢረ ሕግ እንዘ ጽሑፍ ውእቱ ውስተ ልቦሙ ወይትዐወቅ እምግባሮሙ ወያርሰሐስሖሙ ልቦሙ ወይቀልዮሙ።

¹⁶ ወየአምሩ ከመ አልቦ ዘይብሉ ወዘይወቅሱ አመ የሐትቶሙ እግዚአብሔር ለዕጓለ እመሕያው ዘየኀብኡ ወዘይከብቱ ውስተ ልቦሙ በከመ መሀርኩ በእንተ ኢየሱስ ክርስቶስ።

በእንተ ዘለባዕድ ይሜህር ወለሊሁ ኢይገብር

¹⁷ ወሶበ አንተ አይሁዳዊ ዘተዐርፍ በኦሪትከ ወትትሜካሕ በእግዚአብሔር።

¹⁸ ወተአምር ፈቃዶ ወትፈልጥ ዘይኄይስ ወምሁር አንተ ኦሪተ።

¹⁹ ወትትአመን በርእስከ ከመ አንተ መርሖሙ ለዕዉራን ወብርሃኖሙ ለእለ ውስተ ጽልመት።

²⁰ ወመጥብቢሆሙ ለአብዳን ወመምህሮሙ ለሕፃናት ወትትሜሰል ጻድቀ ወተአምር ሕገ ኦሪት በዘትጸድቅ።

²¹ ወእፎኑ እንከ ዘኢትሜህር ርእሰከ ዘለባዕድ ትሜህር ኢትስርቁ ትብል ወለሊከ ትሰርቅ።

²² ኢትዘምዉ ትብል ወለሊከ ትዜሙ ወተሐውር ኀበ ብእሲተ ብእሲ ወታስቈርር ጣዖተ ወለሊከ ትሰርቅ ቤተ መቅደስ።

²³ ወትትሜካሕ በኦሪት ወለሊከ ዐላዊሃ ለኦሪት ወታስተሐቅሮ ለእግዚአብሔር።

በእንተ እለ ይፀርፉ ላዕለ ስመ እግዚአብሔር

²⁴ ወናሁ «በእንቲኣክሙ ይፀርፉ አሕዛብ ላዕለ ስመ እግዚአብሔር» በከመ ጽሑፍ።

²⁵ ግዝረትሰ ትበቍዐከ ለእመ ገበርከ ሕገገ ኦሪት ወእመሰ ኢገበርከ ሕገገ ኦሪት ግዝረትከ ቍልፈተ ትከውነከ።

²⁶ ወለእመሰ እንዘ ቈላፍ አንተ ወዐቀብከ ሕገገ ኦሪት ቍልፈትከ ግዝረተ ትከውነከ።

²⁷ ወይኄይሰከ ትንበር ቍልፈትከ እንተ ተፈጥረት ምስሌከ እምትትገዘር ወትዕሉ ሕገ ኦሪት ወይኄይስ እምኔከ እምግዙር ዘተዐሉ ሕገ ኦሪት ዝኩ ቈላፍ ዘይገብር ሕገ ኦሪት።

²⁸ ቦኑ ለዐይነ ሰብእ ይትየሀዱ ወቦኑ ለአድልዎ ይትገዘሩ አኮኑ በክዱን ይትየሀዱ።

²⁹ ወግዝረትሰ ግዝረተ ጽላሌ ልብ በመንፈስ ወአኮ በትምህርተ መጽሐፍ ከመ ትትአኰት በኀበ እግዚአብሔር እምትትአኰት በኀበ ዕጓለ እመሕያው።