ራእዩ ለዮሐንስ 9 - ሐዲስ ኪዳን በልሳነ ግእዝ

ምዕራፍ 9

¹ ወሶበ ጠቅዐ ኃምስ መልአክ ወረደ ኮከብ እምሰማይ ዲበ ምድር።

² ወተውህበ ሎቱ መራኁተ አንቅዕተ ቀላያት ወዐርገ ጢስ እምነ ቀላይ ከመ ጢሰ እቶን ዐቢይ ወከደኖ ለፀሓይ ወኮነ ከመ ደመና ውእቱ ጢሰ ቀላይ።

³ ወእምነ ውእቱ ጢስ ወፅአ አንበጣ ውስተ ምድር ወወሀብዎሙ ሥልጣነ ይኩኑ ከመ ዐቃርብት ውስተ ምድር።

⁴ ወአዘዝዎሙ ከመ ኢያማስኑ ሣዕረ ወኢሐመልማለ ወኢኵሎ ዕፀ ዘእንበለ ለሰብእ እለ አልቦሙ ማኅተመ እግዚአብሔር ውስተ ፍጽሞሙ።

⁵ ወአዘዝዎሙ ከመ ኢይቅትልዎሙ ዳእሙ ከመ ያሕምምዎሙ ኀምስተ አውራኀ ወሕማሞሙሰ ከመ ሕማመ ዐቅራብ ሶበ ይነድፍ ሰብአ።

⁶ ወበውእቶን መዋዕል የኀሥሥ ሰብእ መዊተ ወኢይረክብ ወይፈቱ ይሙት ወይትኀጣእ እምኔሁ መዊት።

⁷ ወከመዝ ውእቱ ራእዮሙ ለእልክቱ አናብጥ ከመ አፍራስ ዘድልዋን ለጸብእ ይመስሉ ወውስተ ርእሶሙ ቦሙ ቀጸላ በአምሳለ ወርቅ ወገጾሙ ከመ ገጸ ሰብእ።

⁸ ወሥዕርቶሙ ከመ ሥዕርተ አንስት ወስነኒሆሙ ከመ ስነነ አናብስት።

⁹ ወቦሙ ጌራ ከመ ጌራ ኀጺን ወድምፀ እገሪሆሙ ከመ ድምፀ ሠረገላ ብዙኅ ዘያረውጹ አፍራስ ውስተ ቀትል።

¹⁰ ወቦሙ ዘነብ ከመ ዘነበ ዐቅራብ ወውስተ ዘነቦሙ ቦሙ ቅንዋት በዘቦቱ ይነድፍዎሙ ለሰብእ ኀምስተ አውራኀ።

¹¹ ወቦሙ ንጉሥ መልአከ ቀላይ ወስሙ በዕብራይስጥ አብዶን ወበጽርእ አጵልዮን ወበቅብጥ አርማቅጦን ወበዐረብ ሰናሴር ወበግእዝ ማኅጐሊ።

¹² ወበዝ ኀለፈት አሐቲ ሕማም ወተርፈ ክልኤ ሕማም።

¹³ ወሶበ ጠቅዐ ሳድስ መልአክ ሰማዕኩ ቃለ አሐደ እምነ አቅርንተ ምሥዋዕ ዘወርቅ ዘቅድመ መንበሩ ለእግዚአብሔር።

¹⁴ ወይቤሎ ለዝክቱ ሳድስ መልአክ ዘያጸንዕ መጥቅዐ ፍትሖሙ ለእክልቱ አርባዕቱ መላእክት እለ እሱራን ውስተ ፈለገ ኤፍራጥስ ዐቢይ።

¹⁵ ወሶበ ፈትሖሙ ለእልክቱ አርባዕቱ መላእክት እለ ድልዋን ለሰዓት ወለዕለት ወለወርኅ ወለዓመት ከመ ይቅትሉ ሣልስተ እዴሆሙ ለዕጓለ እመሕያው።

¹⁶ ወኍልቈ አፍራሲሆሙ ምክዕቢተ እልፍ እምአእላፍ።

¹⁷ ወከመዝ ርእየተ አፍራሲሆሙ ወዘእለ ይጼዐንዎሙ ቦሙ ጌራ ዘእሳት ዘኅብረ ደርከኖ ወአርእስተ አፍራሲሆሙ ከመ አርእስተ አናብስት ወይወፅእ እምነ አፉሆሙ እሳት ወጢስ ወተይ።

¹⁸ ወእምነ ዝንቱ ሠለስቱ ሕማም ሞተ ሣልስተ እዴሁ ለዕጓለ እመሕያው እምነ እሳት ወጢስ ወተይ ዘይወፅእ እምነ አፉሆሙ።

¹⁹ እስመ ሥልጣነ አፍራሲሆሙ ውስተ አፉሆሙ ወአዝናቢሆሙ ከመ አራዊተ ምድር ወቦሙ ህየ አርእስት በዘቦቱ ይነስኩ ሰብአ ኀምስተ አውራኀ።

²⁰ ወዘተርፈ ሰብእ ድኅነ እምነ ውእቱ መቅሠፍት ወቦ እለ ተኰነኑ በአምልኮ ግብረ እደዊሆሙ እስመ ኢነስሑ አላ አቅነዩ ርእሶሙ እንዘ ይሰግዱ ለአጋንንት ወለአማልክት ዘወርቅ ወዘብሩር ወዘብርት ወዘዕፅ ወዘእብን እለ ኢይሬእዩ ወኢይሰምዑ ወኢየሐውሩ።

²¹ ወኢነስሑ ዓዲ እምነ ቀትሎሙ ወእምነ ሥራያቲሆሙ ወእምነ ዝሙቶሙ ወእምነ ስርቆሙ።