ራእዩ ለዮሐንስ 3 - ሐዲስ ኪዳን በልሳነ ግእዝ

ምዕራፍ 3

¹ ወጸሐፍ ሎቱ ለመልአከ ቤተ ክርስቲያን ዘሰርዴስ ከመዝ ይቤ ዘቦ ሰብዐቱ መንፈስ ዘእምኀበ እግዚአብሔር ወሰብዐቱ ኮከብ አአምር ግብረከ ከመ ስምከ ሕያው ወምውት አንተ።

² ትጋህ እንከ ወአጽንዖሙ ለእለ አልጸቁ ይሙቱ እስመ ኢረከብኩ ግብረከ ፍጹመ በቅድመ አምላኪየ።

³ ወተዘከር እፎ ነሣእከ ወሰማዕከ ነስሕ እንከ ወእመሰ ኢተጋህከ እበጽሐከ ግብተ ከመ ሰራቂ ወኢተአምር በአይ ሰዓት እመጽእ ላዕሌከ።

⁴ ወባሕቱ ብከ ኅዳጣን ሰብእ ውስተ ሰርዴስ እለ ኢገመኑ አልባሲሆሙ ምስለ አንስት ወየሐውሩ ምስሌከ በንጽሕ።

⁵ ወለዘሞአሰ ከመዝ ልብስ ንጹሕ ይደልዎ ወኢይደመሰስ ስሙ እምነ መጽሐፈ ሕይወት ወአአምኖ በስሙ በቅድመ አቡየ ወበቅድመ መላእክቲሁ፤

⁶ ዘቦ እዝን ሰሚዐ ለይስማዕ ምንተ ይቤ መንፈስ ቅዱስ ለአብያተ ክርስቲያናት።

⁷ ወጸሐፍ ሎቱ ለመልአከ ቤተ ክርስቲያን ዘፊልድልፍያ ከመዝ ይቤ ቅዱስ ወጻድቅ ዘኀቤሁ ይነብር ኵሉ መራኁተ ቤተ ዳዊት ወአልቦ ዘያርኁ ወአልቦ ዘየዐጹ ዘእንበሌሁ።

⁸ አአምር ግብረከ ወናሁ ወሀብኩከ ቅድሜከ ኆኅተ ርኁተ ወአልቦ ዘይክል ዐጺዎታ እስመ ውኁድ ኀይልከ ወዐቀብከ ቃልየ ወኢክሕድከ ስምየ።

⁹ ወናሁ አነ እሁበከ እምነ ማኅበሩ ለሰይጣን ወእምነ እለ ይብሉ ርእሶሙ አይሁድ ንሕነ ወኢኮኑ ወይሔስዉ ወይሰግዱ ቅድመ እገሪከ ወየአምሩ ከመ አነ አፍቀርኩከ።

¹⁰ እስመ ዐቀብከ ቃልየ ወትዕግሥትየ ወበእንተ ዝንቱ አነኒ ዐቀብኩከ እምነ ሰዓተ መንሱት እንተ ሀለወት ትምጻእ ውስተ ኵሉ ዓለም ከመ ታመክሮሙ ለእለ ይነብሩ ውስተ ምድር።

¹¹ ወናሁ እመጽእ ፍጡነ ወአጽንዕ ዘብከ ከመ አልቦ ዘይነሥእ አክሊለከ።

¹² ወለዘሞአሰ እሬስዮ ዐምደ ውስተ መቅደሱ ለአምላኪየ ወኢይወፅእ እንከ አፍኣ ወእጽሕፍ ላዕሌሁ ስሞ ለአምላኪየ ወስመ ሀገሩ ሐዳስ ኢየሩሳሌም እንተ ትወርድ እምሰማይ እምኀበ አምላኪየ ወስምየኒ ሐዲሰ።

¹³ ዘቦ እዝን ሰሚዐ ለይስማዕ ምንተ ይቤ መንፈስ ቅዱስ ለአብያተ ክርስቲያናት።

¹⁴ ወጸሐፍ ሎቱ ለመልአከ ቤተ ክርስቲያን ዘሎዶቅያ ከመዝ ይቤ ዘውእቱ አሚን ወውእቱ ስምዕ መሃይምን ወጻድቅ ወውእቱ እምቅድመ ኵሉ ዘፈጠረ እግዚአብሔር።

¹⁵ አአምር ግብረከ ከመ ኢኮንከ ቈሪረ ወኢኮንከ ምዉቀ ወርቱዕሰ ትኩን ቈሪረ ወእመ አኮ ምዉቀ።

¹⁶ እስመ ማእከላይ አንተ።

¹⁷ ወትብል ብዑል አነ ወብዕልኩ ወአልቦ ዘእፈቅድ ምንተኒ እምኀቤከ ወለሊከ ተአምር ከመ ነዳይ ወምስኪን አንተ ወዕሩቅ ወዕዉር አንተ።

¹⁸ ወይእዜኒ እብለከ ትንሣእ እምኀቤየ ወርቀ ዚኣየ ዘንጡፍ ወጽሩይ በእሳት ከመ ትብዐል ብየ ወልብሰኒ ዘዚኣየ ትልበስ ዘንጹሕ ከመ ትትከደን ዕርቃነከ ወበፈውሰ ዚኣየ ትትኰሐል አዕይንቲከ ከመ ትርአይ።

¹⁹ አንሰ ለእለ አፈቅር እጌሥጽ ወእሜህር ቅናእ እንከ ለንስሓ።

²⁰ ወናሁ ቆምኩ ኀበ ኆኅት ወእጐደጕድ ወእመ ቦ ዘሰምዐኒ ቃልየ ወአርኀወኒ እበውእ ሶቤሃ ወአዐርፍ ምስሌሁ ወውእቱኒ ምስሌየ።

²¹ ወለዘሞአ እሁቦ ይንበር ምስሌየ ውስተ መንበርየ በከመ አነ ሞእኩ ወነበርኩ ምስለ አቡየ ውስተ መንበሩ።

²² ዘቦ እዝን ሰሚዐ ለይስማዕ ምንተ ይቤ መንፈስ ቅዱስ ለአብያተ ክርስቲያናት።