ራእዩ ለዮሐንስ 22 - ሐዲስ ኪዳን በልሳነ ግእዝ

ምዕራፍ 22 በእንተ ፈለገ ሕይወት ወዕፀ ሕይወት

¹ ወአርአየኒ ፈለገ ዘማየ ሕይወት ጸዐዳ ከመ በረድ ወይወፅእ እምነ መንበሩ ለእግዚአብሔር ወሥልጣነ በግዑ።

² ወይውኅዝ ውስተ ማእከለ መርሕባ ወእምለፌኒ ውእቱ ፈለግ ወእምከሓሁኒ ዕፀ ሕይወት ወይገብር ፍሬ ዐሠርተ ወክልኤተ ለለአሐዱ ወርኅ ወቈጽለ ዕፁኒ ፈውስ ለሕይወተ አሕዛብ።

³ ወአልቦ እንከ ርኩስ ወኢምንትኒ ወሀለወ ውስቴታ መንበረ እግዚአብሔር ወበግዑ ወኢይከውን መዓት ላዕለ አግብርቲሁ ለእግዚአብሔር እለ ያመልክዎ።

⁴ ወይሬእዩ ገጾ ወስሙ ውስተ ፍጽሞሙ።

⁵ ወአልቦ እንከ ሌሊት ወኢይፈቅዱ ብርሃነ ማኅቶት ወኢብርሃነ ፀሓይ እስመ እግዚአብሔር ያበርህ ላዕሌሆሙ ወይነግሡ ለዓለመ ዓለም።

⁶ ወይቤለኒ ዝክቱ ቃለ ጽድቅ ወመሃይምን እግዚእነ ወእግዚአብሔር አምላክነ ወመንፈሰ ነቢያት ዘፈነወ መልአኮ ከመ ያርእዮሙ ለአግብርቲሁ ዘሀለወ ይኩን ፍጡነ።

⁷ ወናሁ እመጽእ ፍጡነ ወብፁዕ ዘየዐቅብ ቃለ ተነብዮቱ ለዝንቱ መጽሐፍ።

⁸ ወአነ ዮሐንስ ዘርኢኩ ወዘሰማዕኩ ዘንተ ሰገድኩ ቅድመ እገሪሁ ለውእቱ መልአክ ዘአርአየንዮ ለዝንቱ።

⁹ ወይቤለኒ ኢትስግድ ሊተ ዑቅ ዮጊ ገብረ አጋዕዝቲከ አነ ወዘአኀዊከ ነቢያት ወዘእለ የዐቅቡ ቃለ ዝንቱ መጽሐፍ።

¹⁰ ወአንተሰ ለእግዚአብሔር ስግድ ወኢትኅትም ቃለ ተነብዮቱ ለዝንቱ መጽሐፍ እስመ በጽሐ ዘመኑ።

¹¹ ወለዘገፍዐኒ ይገፍዕዎ እንከ ወለዘረስሐኒ ያረስሕዎ እንከ ወጻድቅ ለይጽደቅ ወንጹሕኒ ለይንጻሕ።

¹² ወናሁ እመጽእ ፍጡነ ወዕሴትየኒ ምስሌየ ውእቱ ከመ እፍድዮ ለለ አሐዱ ወእኰንኖ በከመ ምግባሩ።

¹³ አነ ውእቱ አልፋ ወኦ አነ ቀዳማዊ ወአነ ደኃራዊ ርእስ ወማኅለቅት።

¹⁴ ብፁዓን እለ አንጽሑ አልባሲሆሙ ከመ ይኩን ሥልጣኖሙ ላዕለ ዕፀ ሕይወት ወይበውእዋ እንተ አናቅጺሃ ለዛ ሀገር።

¹⁵ ወይወፅኡ አፍኣ ኀምስቱ አክላብ እለ ሥራይ ወዘማውያን ወቀታልያን ወእለ ያመልኩ ጣዖተ ወኵሎሙ እለ ያፈቅሩ ግብረ ሐሰት።

¹⁶ አነ ኢየሱስ ፈነውኩ መልአክየ ያስምዕ ለክሙ ዘንተ ለአብያተ ክርስቲያናት አነ ውእቱ ሥርው ዘእምዘመደ ዳዊት ኮከበ ብርሃን ጽባሓዊ።

¹⁷ ወመንፈስ ቅዱስ ዘመርዔት ይቤሉ ለይምጻእ ወዘጸምዐኒ ለይምጻእ ወዘይፈቅድ ለይንሣእ ማየ ሕይወት በከንቱ።

¹⁸ ወአነ ስምዑ ለኵሉ ዘይሰምዕ ቃለ ዝንቱ መጽሐፍ እመ ወሰከ ዲቤሁ ይዌስክ እግዚአብሔር ላዕሌሁ መቅሠፍተ ዘጽሑፍ ውስተ ዝንቱ መጽሐፍ።

¹⁹ ወእመኒ አሰሰለ እምውስተ ቃለ ዝንቱ መጽሐፍ ያሴስል እግዚአብሔር ክፍሎ እምዕፀ ሕይወት ወእምነ ሀገር ቅድስት ዘጽሑፍ ውስተ ዝንቱ መጽሐፍ።

²⁰ ወይበል ዘሰምዐ ዘንተ እወ እመጽእ ፍጡነ አሜን ነዓ እግዚእየ ኢየሱስ።

²¹ ጸጋሁ ለእግዚእነ ኢየሱስ ክርስቶስ ምስለ ኵልክሙ አሜን። በዝየ ተፈጸመ ራእየ ዮሐንስ አቡቀለምሲስ ዘውእቱ ብሂል ዘርእየ በሕይወቱ ራእየ። ወስብሐት ለእግዚአብሔር አሜን።