ራእዩ ለዮሐንስ 2 - ሐዲስ ኪዳን በልሳነ ግእዝ

ምዕራፍ 2

¹ ወጸሐፍ ሎቱ ለመልአከ ቤተ ክርስቲያን ዘኤፌሶን ከመዝ ይቤለከ አኃዜ ኵሉ ዘያጸንዕ ሰብዐተ ከዋክብተ በየማኑ ወዘየሐውር በማእከለ ሰብዑ መኃትው ዘወርቅ።

² ርኢኩ ግብረከ ወጻማከ ወትዕግሥተከ ወከመ ኢትክል ጸዊሮቶሙ ለእኩያን እለ ይብሉ ርእሶሙ ሐዋርያተ ወኢኮኑ ወረከብካሆሙ ከመ ሐሰዉ።

³ ወተዐገሥከ ወጾርከ በእንተ ስምየ ወኢተቈጣዕከ።

⁴ ወባሕቱ ቦ ዘአሐይሰከ እስመ ኀደገ አፍቅሮተከ ዘቀዲሙ።

⁵ ወተዘከር በበይነ ምንት ወደቀ ነስሕ እንከ ወእመ አኮሰ እመጽእ ወአድለቀልቃ ለማኅቶትከ እምነ መካና እመ ኢነሳሕከ ወከመ ቀዲሙ ግብረከ እመ ኢገበርከ።

⁶ ወዝንቱሰ ብከ እስመ ትጸልእ ምግባሮሙ ለኒቆላውያን በከመ አነ እጸልእ።

⁷ ዘቦ እዝን ሰሚዐ ለይስማዕ ምንተ ይቤ መንፈስ ቅዱስ ለአብያተ ክርስቲያናት ወለዘሞአሰ እሁቦ ይብላዕ እምውስተ ዕፀ ሕይወት ዘሀሎ ውስተ ገነቱ ለአምላኪየ።

⁸ ወጸሐፍ ሎቱ ለመልአከ ቤተ ክርስቲያን ዘሴሜርኔስ ከመዝ ይቤ ዘውእቱ ቀዳማዊ ወውእቱ ደኃራዊ ዘሞተ ወሐይወ።

⁹ አአምር ሕማመከ ወኀጣይአከ ወባሕቱ ብዑል አንተ ወፅርፈቶሙ ለእለ ይብሉ አይሁድ ንሕነ ወኢኮኑ አላ ማኅበሩ ለሰይጣን እሙንቱ።

¹⁰ ኢትፍራህ ምንተኒ በእንተ ዘሀለወከ ትሕምም እስመ ናሁ ሰይጣን ይወዲ እምኔክሙ ውስተ ሞቅሕ ከመ ትትዐቀፉ ወተሐሙ ዐሡረ መዋዕለ ወኩን መሃይምነ እስከ ለሞት ወእሁበከ አክሊለ ሕይወት፤

¹¹ ዘቦ እዝን ሰሚዐ ለይስማዕ ምንተ ይቤ መንፈስ ቅዱስ ለአብያተ ክርስቲያናት ወዘሰ ሞአ ኢይመውት ዳግመ ሞተ።

¹² ወጸሐፍ ሎቱ ለመልአከ ቤተ ክርስቲያን ዘጴርጋሞን ከመዝ ይቤ ዘቦ ሰይፍ በሊኅ ዘክልኤ አፉሁ።

¹³ አአምር ኀበ ታነብር እዴከ መንበሩ ለሰይጣን ወታጸንዕ ስምየ ወኢክሕድከ ሃይማኖትየ ወበመዋዕል ዘቀተልዎ በኀቤክሙ ለጻድቅየ መሃይምን በኀበ ይነብር ሰይጣን።

¹⁴ ወባሕቱ ቦ ዘአሐይሰከ እስመ ሀለዉ ዝየ እለ ያጸንዑ ትምህርቶ ለበለዓም መምህሩ ለባላቅ ወይወድዩ ዕቅፍተ ቅድሜሆሙ ለደቂቀ እስራኤል ከመ ይብልዑ ዝቡሐ ለአማልክት ወይዘምዉ።

¹⁵ ወእሉኒ ሀለዉ ኀቤከ እለ ያጸንዑ ትምህርቶሙ ለኒቆላውያን።

¹⁶ ወይእዜኒ ነስሕ ወእመ አኮሰ እመጽእ ወእጸብኦሙ ፍጡነ በሰይፈ አፉየ።

¹⁷ ዘቦ እዝን ሰሚዐ ለይስማዕ ምንተ ይቤ መንፈስ ቅዱስ ለአብያተ ክርስቲያናት ለዘሞአ እሁቦ መና ዘኅቡእ ወእሁቦ መጽሐፈ ብርሃን ወውስተ ውእቱ መጽሐፍ ጽሑፍ ስም ሐዲስ ዘአልቦ ዘየአምሮ ዘእንበለ ዘነሥኦ።

¹⁸ ወጸሐፍ ሎቱ ለመልአከ ቤተ ክርስቲያን ዘትያጥሮን ከመዝ ይቤ ወልደ እግዚአብሔር ዘአዕይንቲሁ ከመ ነደ እሳት ወእገሪሁ ከመ ርስነ ብርተ ሊባኖስ።

¹⁹ አአምር ግብረከ ወተፋቅሮተከ ወሃይማኖተከ ወመልእክተከ ወትዕግሥተከ ወግብርከኒ ደኃሪት ትበዝኅ እምነ ቀዳሚት።

²⁰ ወባሕቱ ቦ ዘአሐይሰከ እስመ አርመምከ ላቲ ለኤልዛቤል ብእሲት እንተ ትብል ርእሳ ነቢይት ወኢኮነት ወትሜህር በዘታስሕቶሙ ወታዜምዎሙ ለአግብርትየ ከመ ይብልዑ ዝቡሐ ለአማልክት።

²¹ ወወሀብክዋ መዋዕለ በዘትኔስሕ ወአበየት ነስሖ እምነ ዝሙታ።

²² ወናሁ አገብኣ ውስተ ዘቀዳሚ ምስካባ ወለእለ ዘመዉ ምስሌሃ ውስተ ዐቢይ ሥቃይ እመ ኢነስሐት እምነ ምግባራ።

²³ ወእቀትል ደቂቃ በሞት ወየአምሩ ኵሉ አብያተ ክርስቲያናት ከመ አነ ውእቱ ዘእፈትን ልበ ወኵልያተ ወእፈድየክሙ ለለአሐዱ አሐዱ እምኔክሙ በከመ ምግባሪክሙ።

²⁴ ወለክሙኒ እብል ለእለ ተረፍክሙ ውስተ ትያጥሮን ወለእለ አልብክሙ ዝንቱ ትምህርት ለእለ ኢታአምርዋ ለጕሕሉተ ሰይጣን ዘይብል ኢይወዲ ላዕሌክሙ ክልኤ ክበደ።

²⁵ ወባሕቱ ዘብክሙ አጽንዑ እስከ አመ እሣሀል።

²⁶ ወለዘሞአ ወዐቀበ ግብርየ ለዝሉፉ እሁቦ ሥልጣነ ላዕለ አሕዛብ።

²⁷ ወይርዕዮሙ በበትረ ኀጺን ወከመ ንዋየ ለብሓ ይቀጠቅጦሙ።

²⁸ በከመ አነ ነሣእኩ እምኀበ አቡየ ወእሁቦ ኮከበ ጽባሕ።

²⁹ ዘቦ እዝን ሰሚዐ ለይስማዕ ምንተ ይቤ መንፈስ ቅዱስ ለአብያተ ክርስቲያናት።