ወንጌል ዘማርቆስ 16 - ሐዲስ ኪዳን በልሳነ ግእዝ

ምዕራፍ 16 በእንተ ትንሣኤሁ ለእግዚእ ኢየሱስ

¹ ወሶበ ኀለፈት ሰንበት ማርያም መግደላዊት ወማርያም እንተ ያዕቆብ ወሰሎሜ ተሣየጣ አፈወ ከመ ይምጽኣ ወይቅብዓ ሥጋሁ።

² ወሖራ ወአንግሃ ጥቀ ሐዊረ ኀበ መቃብር በእሑድ ሰንበት ሶበ ሠረቀ ፀሓይ።

³ ወይቤላ በበይናቲሆን መኑ ይከሥታ ለነ ለእብን እምኆኅተ መቃብር።

⁴ ወረዊጾን ርእያሃ ለእብን ኀበ አንኰርኰረት ወዐባይ ይእቲ ጥቀ።

⁵ ወበዊኦን ውስተ መቃብር ረከባ አሐደ ወሬዛ እንዘ ይነብር መንገለ የማን ወይለብስ አልባሰ ንጹሐ ወደንገፃ።

⁶ ወይቤሎን መልአክ ኢትደንግፃ ኢየሱስሃኑ ናዝራዌ ዘተሰቅለ ተኀሥሣ ተንሥአ ወኢሀሎ ዝየሰ ወናሁ መካኑ ኀበ ተቀብረ።

⁷ ወባሕቱ ሑራ ወንግራሆሙ ለአርዳኢሁ ወለጴጥሮስ ከመ ይቀድሞሙ ገሊላ ወበህየ ይሬእይዎ በከመ ይቤሎሙ።

⁸ ወወፅኣ እምነ መቃብር ወጐያ እስመ አኀዞን ረዓድ ወድንጋፄ ወኢነገራ ወኢለመኑሂ እስመ ፈርሃ ወኵሎ ዘአዘዞን ለጴጥሮስ ወለእሊኣሁ ፈጺሞን ነጊረ አስተርአዮሙ እግዚእነ እምድኅረ ተንሥአ እምዉታን። ወፈነዎሙ ይስብኩ እምሥራቀ ፀሓይ እስከ ዐረብ ለኵሉ ፍጥረት በወንጌል ቅዱስ ዘኢይማስን ለሕይወት ዘለዓለም።

ዘከመ አስተርአየ እግዚእ ኢየሱስ ለብዙኃን

⁹ ወተንሢኦ በጽባሕ በእሑድ ሰንበት አስተርአያ ቅድመ ለማርያም መግደላዊት እንተ እምኔሃ አውፅአ ሰብዐተ አጋንንተ።

¹⁰ ወይእቲ ሐዊራ ዜነወቶሙ ለእለ ምስሌሁ ሀለዉ ቀዲሙ እንዘ ሀለዉ ይላሕዉ ወይበክዩ።

¹¹ ወእሙንቱሂ ሶበ ሰምዑ ከመ አስተርአያ ወሕያው ውእቱ ኢአምንዋ።

¹² ወእምዝ አስተርአዮሙ ለክልኤቱ እምኔሆሙ በካልእ ራእይ እንዘ የሐውሩ ሐቅለ።

¹³ ወሖሩ እሙንቱሂ ወዜነዉ ለቢጾሙ ወሎሙኒ ኢአምንዎሙ።

¹⁴ ወእምድኅረዝ ካዕበ እንዘ ይረፍቁ ዐሠርቱ ወአሐዱ አስተርአዮሙ ወገሠጾሙ በእንተ ኅጸተ አሚኖቶሙ ወግእዘ ጽንዐ ልቦሙ እስመ ለእለ ርእይዎ ከመ ተንሥአ ኢአምንዎሙ።

¹⁵ ወይቤሎሙ ሑሩ ውስተ ኵሉ ዓለም ወስብኩ ወንጌለ ለኵሉ ፍጥረት።

¹⁶ ዘአምነ ወዘተጠምቀ ይድኅን ወዘሰ ኢአምነ ይደየን።

¹⁷ ወዛቲ ተአምር ለእለ አምኑ በስምየ ትተልዎሙ በስመ ዚኣየ አጋንንተ ያወፅኡ ወበካልእ ልሳን ይትናገሩ ሐዲሳተ።

¹⁸ ወአራዊተ ምድር ይእኅዙ በእደዊሆሙ ወአልቦ ዘያሐሥሞሙ ወዘሂ ይቀትል ሕምዘ ለእመ ሰትዩ አልቦ ዘይነክዮሙ ወዲበ ድዉያን እደዊሆሙ ያነብሩ ወይሜጥኑ ወእሙንቱሂ ይትፌወሱ።

በእንተ ዕርገቱ ለእግዚእ ኢየሱስ ውስተ ሰማይ

¹⁹ ወእግዚእነሰ ኢየሱስ እምድኅረ ተናገሮሙ ዐርገ ውስተ ሰማይ ወነበረ በየማነ እግዚአብሔር አቡሁ።

²⁰ ወወፂኦሙ እሙንቱ ሰበኩ በኵለሄ እንዘ እግዚእ ይረድእ ወቃሎ ያጸንዕ በተአምር ዘይተሉ። መልአ ጽሕፈተ ብሥራቱ ለማርቆስ ወንጌላዊ አሐዱ እምሰብዓ ወክልኤቱ አርድእት ወኮነ ዘጸሐፎ በሀገረ ሮም በልሳነ አፍርንጊ እምድኅረ ዕርገቱ ለእግዚእነ በሥጋ ውስተ ሰማይ በዐሠርቱ ወአሐዱ ዓመት ወበአርባዕቱ ዓመተ መንግሥቱ ለቀላውዴዎስ ቄሳር። ወስብሐት ለእግዚአብሔር አሜን።