ወንጌል ዘማቴዎስ 8 - ሐዲስ ኪዳን በልሳነ ግእዝ

ምዕራፍ 8 ዘከመ አንጽሖ እግዚእ ኢየሱስ ለዘለምጽ

¹ ወእንዘ ይወርድ እምደብር ተለውዎ ሰብእ ብዙኃን።

² ወናሁ መጽአ አሐዱ ብእሲ ዘለምጽ ወቀርበ ኀቤሁ ወሰገደ ሎቱ እንዘ ይብል እግዚኦ እመሰ ፈቀድከ ትክል አንጽሖትየ።

³ ወሰፍሐ እዴሁ ወገሠሦ ወይቤሎ እፈቅድ ንጻሕ ወነጽሐ እምለምጹ በጊዜሃ።

⁴ ወይቤሎ እግዚእ ኢየሱስ ዑቅ ኢትንግር ወኢለመኑሂ ወባሕቱ ሑር ወአፍትን ርእሰከ ለካህን ወአብእ መባአከ በእንተ ዘነጻሕከ በከመ አዘዘ ሙሴ ከመ ይኩን ስምዐ ላዕሌሆሙ።

ዘከመ ፈወሶ እግዚእ ኢየሱስ ለወልደ መስፍን

⁵ ወበዊኦ ቅፍርናሆም መጽአ ኀቤሁ መስፍነ ምእት።

⁶ ወይቤሎ እግዚኦ ብቍዐኒ ድዉይ ወልድየ ወይሰክብ ውስተ ቤት ወመፃጕዕ ወጥቀ ጽዑር።

⁷ ወይቤሎ እግዚእ ኢየሱስ ነየ እመጽእ አነ ወእፌውሶ።

⁸ ወአውሥአ ሐቤ ምእት ወይቤ እግዚኦ ኢይደልወኒ ከመ አንተ ትባእ ታሕተ ጠፈረ ቤትየ ዳእሙ አዝዝ በቃልከ ወየሐዩ ወልድየ።

⁹ እስመ አነሂ ብእሲ መኰንን አነ ወብየ ሐራ ዘእኴንን ወእብሎ ለዝ ሑር ወየሐውር ወለካልኡኒ ነዓ ወይመጽእ ወለገብርየኒ ግበር ከመዝ ወይገብር።

¹⁰ ወሰሚዖ እግዚእ ኢየሱስ አንከረ ወተመዪጦ ይቤሎሙ ለእለ ይተልውዎ አማን እብለክሙ ኢረከብኩ ከመዝ ዘየአምን በውስተ ኵሉ እስራኤል።

¹¹ ወባሕቱ እብለክሙ ብዙኃን ይመጽኡ እምሥራቅ ወእምዕራብ ወይረፍቁ ውስተ ሕፅነ አብርሃም ይስሐቅ ወያዕቆብ በመንግሥተ ሰማያት።

¹² ወለውሉደ መንግሥትሰ ያወፅእዎሙ ውስተ ጸናፌ ጽልመት ኀበ ሀሎ ብካይ ወሐቅየ ስነን።

¹³ ወይቤሎ እግዚእ ኢየሱስ ለውእቱ ሐቤ ምእት ሑርኬ ወበከመ ተአመንከ ይኩንከ ወሐይወ ወልዱ በይእቲ ሰዓት ወገቢኦ መስፍን ውስተ ቤቱ ረከቦ ለቍልዔሁ ሐዪዎ።

በእንተ ሐማተ ጴጥሮስ

¹⁴ ወበዊኦ እግዚእ ኢየሱስ ቤቶ ለጴጥሮስ ረከባ ለሐማተ ጴጥሮስ እንዘ ትሰክብ ወትፈፅን።

¹⁵ ወገሠሣ ወአኀዛ እዴሃ ወኀደጋ ፈፀንታ ወተንሥአት ወተልእከቶሙ።

በእንተ እለ ሐይዉ እምብዙኅ ደዌ

¹⁶ ወምሴተ ከዊኖ አምጽኡ ኀቤሁ ብዙኃነ እለ አጋንንት ወአውፅኦሙ ለመናፍስት በቃሉ ወፈወሰ ኵሎ ድዉያነ።

¹⁷ ከመ ይትፈጸም ቃለ ኢሳይያስ ነቢይ ዘይቤ «ውእቱ ነሥአ ደዌነ ወጾረ ሕማመነ።»

¹⁸ ወሶበ ርእየ እግዚእ ኢየሱስ ብዙኃነ ሰብአ ዘተለውዎ አዘዘ ከመ ይሑሩ ማዕዶተ ባሕር።

በእንተ እለ ተስእልዎ ከመ ይትልውዎ

¹⁹ ወመጽአ ኀቤሁ አሐዱ ጸሓፊ ወይቤሎ ሊቅ እትሉከኑ ኀበ ሖርከ።

²⁰ ወይቤሎ እግዚእ ኢየሱስ ለቈናጽልኒ ግበብ ቦሙ ወለአዕዋፈ ሰማይኒ ምጽላል ቦሙ ወለወልደ ዕጓለ እመሕያውሰ አልቦቱ ኀበ ያሰምክ ርእሶ።

²¹ ወይቤሎ ካልእ እምአርዳኢሁ እግዚኦ አብሐኒ ቅድመ እሑር ወእቅብሮ ለአቡየ።

²² ወይቤሎ እግዚእ ኢየሱስ አንተሰ ትልወኒ ወኅድጎሙ ለምዉታን ይቅብሩ ምዉታኒሆሙ።

ዘከመ ገሠጸ ባሕረ

²³ ወዐሪጎ ውስተ ሐመር ተለውዎ አርዳኢሁ።

²⁴ ወናሁ ዐቢይ ድልቅልቅ ኮነ በውስተ ባሕር እስከ ሶበ ይደፍኖ ለሐመር ማዕበለ ባሕር ወውእቱሰ ይነውም።

²⁵ ወቀርቡ አርዳኢሁ ወአንቅህዎ ወይቤልዎ እግዚኦ አድኅነነ ከመ ኢንሙት።

²⁶ ወይቤሎሙ ምንት ያፈርሀክሙ አንትሙ ሕጹጻነ ሃይማኖት ወተንሢኦ ገሠጾሙ ለነፋሳትኒ ወለማዕበለ ባሕር ወኮነ ዐቢይ ዛኅን።

²⁷ ወአንከሩ ሰብእ ወይቤሉ መኑ እንጋ ውእቱ ዝንቱ ዘይትኤዘዙ ሎቱ ባሕርኒ ወነፋሳትኒ።

በእንተ እለ አጋንንት

²⁸ ወበጺሖ ማዕዶተ ብሔረ ጌርጌሴኖን ተቀበልዎ ክልኤቱ እለ አጋንንት ወፂኦሙ እመቃብራት ወእኩያን ጥቀ እሙንቱ ወኢያበውሑ መኑሂ ይኅልፍ እንተ ይእቲ ፍኖት።

²⁹ ወሶበ ርእይዎ ጸርሑ እንዘ ይብሉ ምንት ብነ ምስሌከ ኢየሱስ ወልደ እግዚአብሔር ሕያው መጻእከኑ ዝየሂ ትስድደነ ወትሣቅየነ ዘእንበለ ይብጻሕ ጊዜሁ።

³⁰ ወቦ ህየ መራዕየ አሕርው ብዙኅ ይትረዐዩ ርኁቀ እምኔሆሙ።

³¹ ወአስተብቍዕዎ እሙንቱ አጋንንት ወይቤልዎ እመሰ ታወፅአነ ፈንወነ ከመ ንባእ ዲበ መራዕየ አሕርው።

³² ወይቤሎሙ ሑሩ ወወፂኦሙ ሖሩ ወቦኡ ውስተ አሕርው ወአብዱ ኵሉ መራዕየ አሕርው ወሮጹ ወጸድፉ ውስተ ባሕር ወሞቱ ውስተ ማይ።

³³ ወጐዩ ኖሎት ወአተዉ ሀገረ ወዜነዉ ለሰብእ ኵሎ ዘኮነ ወበእንተ እለ አጋንንትሂ።

³⁴ ወናሁ ወፅኡ ኵሉ እለ ውስተ ሀገር ይትቀበልዎ ለእግዚእ ኢየሱስ ወሶበ ርእይዎ አስተብቍዕዎ ይኅልፍ እምደወሎሙ።