ወንጌል ዘማቴዎስ 5 - ሐዲስ ኪዳን በልሳነ ግእዝ

ምዕራፍ 5 በእንተ ብፁዓን

¹ ወርእዮ ብዙኃነ አሕዛበ ዐርገ ውስተ ደብር ወነበረ ወቀርቡ ኀቤሁ አርዳኢሁ።

² ወከሠተ አፉሁ ወመሀሮሙ እንዘ ይብል።

³ ብፁዓን ነዳያን በመንፈስ እስመ ሎሙ ይእቲ መንግሥተ ሰማያት።

⁴ ብፁዓን እለ ይላሕዉ ይእዜ እስመ እሙንቱ ይትፌሥሑ።

⁵ ብፁዓን የዋሃን እስመ እሙንቱ ይወርስዋ ለምድር።

⁶ ብፁዓን እለ ይርኅቡ ወይጸምኡ በእንተ ጽድቅ፤ እስመ እሙንቱ ይጸግቡ።

⁷ ብፁዓን መሓርያን እስመ ሎሙኒ ይምሕርዎሙ።

⁸ ብፁዓን ንጹሓነ ልብ እስመ እሙንቱ ይሬእይዎ ለእግዚአብሔር።

⁹ ብፁዓን ገባርያነ ሰላም እስመ እሙንቱ ውሉደ እግዚአብሔር ይሰመዩ።

¹⁰ ብፁዓን እለ ይሰደዱ በእንተ ጽድቅ እስመ ሎሙ ይእቲ መንግሥተ ሰማያት።

¹¹ ብፁዓን አንትሙ ሶበ ይሰድዱክሙ ወይዘነጕጉክሙ ወይነቡ ኵሎ እኩየ ላዕሌክሙ እንዘ ይሔስዉ በእንቲኣየ።

¹² ተፈሥሑ ወተሐሠዩ እስመ ብዙኅ ዕሴትክሙ በሰማያት እስመ ከመዝ ሰደድዎሙ ለነቢያት እለ እምቅድሜክሙ።

¹³ አንትሙ ውእቱ ጼዉ ለምድር ወእመሰ ጼው ለስሐ በምንትኑ እንከ ይቄስምዎ አልቦኬ እንከ ዘይበቍዕ ዘእንበለ ዘይገድፍዎ አፍኣ ወይከይድዎ ሰብእ በእገሪሆሙ።

¹⁴ አንትሙ ውእቱ ብርሃኑ ለዓለም ኢትክል ተከብቶ ሀገር እንተ ተሐንጸት መልዕልተ ደብር።

¹⁵ ወኢያኀትዉ ማኅቶተ ከመ ያንብርዋ ታሕተ ከፈር አላ ያነብርዋ ዲበ ተቅዋማ ወታበርህ ለኵሎሙ እለ ውስተ ቤት።

¹⁶ ከማሁኬ ይብራህ ብርሃንክሙ በቅድመ ሰብእ ከመ ይርአዩ ምግባሪክሙ ሠናየ ወይሰብሕዎ ለአቡክሙ ዘበሰማያት።

ዘከመ ኢተስዕሩ ኦሪት ወነቢያት

¹⁷ ኢይምሰልክሙ ዘመጻእኩ እስዐሮሙ ለኦሪት ወለነቢያት ኢመጻእኩ እስዐሮሙ ዘእንበለ ዳእሙ ከመ እፈጽሞሙ።

¹⁸ አማን እብለክሙ እስከ አመ የኀልፍ ሰማይ ወምድር የውጣ እንተ አሐቲ ኅርመታ ወአሐቲ ቅርፀታ ኢተኀልፍ እምኦሪት ወእምነቢያት እስከ ሶበ ኵሉ ይከውን።

¹⁹ ዘኬ ፈትሐ አሐተ እምእላ ትእዛዛት እንተ ተሐጽጽ ወይሜህር ከመዝ ለሰብእ ሕጹጸ ይከውን በመንግሥተ ሰማያት ወዘሰ ይሜህር ወይገብር ውእቱ ዐቢየ ይከውን በመንግሥተ ሰማያት።

²⁰ ናሁ እብለክሙ ከመ ለእመ ኢፈድፈደ ጽድቅክሙ ፈድፋደ እምጸሐፍት ወእምፈሪሳውያን ኢትበውኡ ውስተ መንግሥተ ሰማያት።

በእንተ ስድስቱ ቃላት

²¹ ሰማዕክሙ ዘተብህለ ለቀደምትክሙ ኢትቅትል ነፍሰ ወዘሰ ቀተለ ረስሐ ውእቱ ለኵነኔ።

²² ወአንሰ እብለክሙ ኵሉ ዘያምዕዕ እኅዋሁ በከንቱ ረስሐ ውእቱ ለኵነኔ ወዘሂ ይቤሎ ለእኍሁ ኅሡር ዘፀርቅ ረስሐ ወይትኴነን በዐውድ ወዘሰ ይቤሎ አብድ ረስሐ ውእቱ ወይትኴነን በእሳተ ገሃነም።

²³ ወእምከመኬ ታበውእ መባአከ ውስተ ምሥዋዕ ወበህየ ተዘከርከ ከመ ቦ እኁከ ዘተሓየሰከ።

²⁴ ኅድግ ህየ መባአከ ቅድመ ምሥዋዕ ወሑር ቅድመ ተኳነን ምስለ እኁከ ወእምዝ ገቢአከ አብእ መባአከ።

²⁵ ኩን ጠቢበ ለዕድውከ ፍጡነ እንዘ ሀሎከ ምስሌሁ ውስተ ፍኖት ከመ ኢይመጡከ ዕድውከ ለመኰንን ወመኰንን ይሜጥወከ ለወዓሊሁ ወወዓሊሁኒ ይሞቅሐከ።

²⁶ አማን እብለከ ከመ ኢትወፅእ እምህየ እስከ ሶበ ትሴልጥ ደኃሪተ ገመስ ዘላዕሌከ።

²⁷ ሰማዕክሙ ዘተብህለ ለቀደምትክሙ ኢትዘሙ።

²⁸ ወአንሰ እብለክሙ ኵሉ ዘርእያ ለብእሲት ወፈተዋ ወድአ ዘመወ ባቲ በልቡ።

²⁹ እመኒ ዐይንከ እንተ የማን ታስሕተከ ምልሓ ወግድፋ እምላዕሌከ እስመ ይኄይሰከ ነቋረከ ትባእ ውስተ መንግሥተ ሰማያት እምትባእ ምስለ ክልኤሆን አዕይንቲከ ውስተ እሳተ ገሃነም።

³⁰ ወእመኒ እዴከ እንተ የማን ታስሕተከ ምትራ ወግድፋ እምላዕሌከ እስመ ይኄይሰከ ይትኀጐል አሐዱ እምነ አባልከ እምኵሉ ሥጋከ ይትወደይ ውስተ እሳተ ገሃነም ወእመኒ እግርከ ዘየማን ታስሕተከ ምትራ ወግድፋ እምላዕሌከ እስመ ይኄይሰከ ሐንካሰከ ትባእ ውስተ መንግሥተ ሰማያት እምትባእ ምስለ ክልኤሆን እገሪከ ውስተ እሳተ ገሃነም።

³¹ ሰማዕክሙ ዘተብህለ ለቀደምትክሙ ኵሉ ዘይድኅር ብእሲቶ ይጽሐፍ ላቲ መጽሐፈ ኅድጋቲሃ ወየሀባ ወይድኀራ።

³² ወአንሰ እብለክሙ ኵሉ ዘይድኅር ብእሲቶ ዘእንበለ ትዘሙ በላዕሌሁ ለሊሁ ረሰያ ዘማ ወዘሂ ኅድገተ አውሰበ ዘመወ።

³³ ወካዕበ ሰማዕክሙ ዘከመ ተብህለ ለቀደምትክሙ ኢትምሐሉ በሐሰት ወባሕቱ አግብኡ መሐላክሙ ለእግዚአብሔር።

³⁴ ወአንሰ እብለክሙ ኢትምሐሉ ግሙራ ኢ በሰማይ እስመ መንበሩ ለእግዚአብሔር ውእቱ።

³⁵ ወኢ በምድር እስመ መከየደ እገሪሁ ይእቲ ወኢ በኢየሩሳሌም እስመ ሀገሩ ይእቲ ለንጉሥ ዐቢይ።

³⁶ ወኢ በርእስክሙ ኢትምሐሉ ወኢ በሥዕርተ ርእስክሙ እስመ ኢትክሉ አሐተ እምሥዕርተ ርእስክሙ ኢ አጻዕድዎ ወኢ አጽልሞ።

³⁷ ባሕቱ ይኩን ነገርክሙ እመሂ እወ እወ ወእመሂ አልቦ አልቦ ወፈድፋደሰ እምእሉ እምእኩይ ውእቱ።

³⁸ ሰማዕክሙ ዘተብህለ ለቀደምትክሙ ዐይን ቤዛ ዐይን ወስን ቤዛ ስን።

³⁹ ወአንሰኬ እብለክሙ ኢትትቃወምዎ ለእኩይ በእኩይ ወለዘሂ ጸፍዐከ መልታሕቴከ እንተ የማን ሚጥ ሎቱ ካልእታሂ።

⁴⁰ ወለዘሂ ይፈቅድ ይትዐገልከ መልበሰከ ኅድግ ሎቱ ክዳነከሂ።

⁴¹ ወለዘሂ ዐበጠከ አሐደ ምዕራፈ ሑር ምስሌሁ ክልኤተ ምዕራፈ።

⁴² ወለኵሉ ዘሰአለከ ሀቦ ወለዘሂ ይፈቅድ እምኔከ ይትለቃሕ ኢትክልኦ።

⁴³ ሰማዕክሙ ዘተብህለ «አፍቅር ቢጸከ ወጽላእ ጸላኢከ።»

⁴⁴ ወአንሰ እብለክሙ አፍቅሩ ጸላእተክሙ ወባርክዎሙ ለእለ ይረግሙክሙ ወሠናየ ግበሩ ለእለ ይጸልኡክሙ ወጸልዩ በእንተ እለ ይትዔገሉክሙ ወይሰድዱክሙ።

⁴⁵ ከመ ትኩኑ ውሉዶ ለአቡክሙ ዘበሰማያት እስመ ውእቱ ያሠርቅ ፀሓየ ላዕለ ኄራን ወእኩያን ወያዘንም ዝናመ ላዕለ ጻድቃን ወኃጥኣን።

⁴⁶ ወእመሰ ታፈቅሩ ዘያፈቅረክሙ ምንትኑ ዕሴትክሙ አኮሁ መጸብሓንሂ ከማሁሰ ይገብሩ።

⁴⁷ ወእመ ተአማኅክሙ አኀዊክሙ ምንት እንከ ፍድፋዴ ዘገበርክሙ አኮኑ አሕዛብኒ ከማሁሰ ይገብሩ።

⁴⁸ አንትሙሰ ኩኑ ፍጹማነ ከመ አቡክሙ ሰማያዊ ፍጹም ውእቱ።