ወንጌል ዘማቴዎስ 3 - ሐዲስ ኪዳን በልሳነ ግእዝ

ምዕራፍ 3 ዘከመ ሰበከ ዮሐንስ በእንተ መንግሥተ ሰማያት

¹ ወበውእቱ መዋዕል መጽአ ዮሐንስ መጥምቅ እንዘ ይሰብክ በገዳመ ይሁዳ ዘዮርዳኖስ።

² እንዘ ይብል ነስሑ እስመ ቀርበት መንግሥተ ሰማያት።

³ እስመ ዝንቱ ውእቱ ዘተብህለ በኢሳይያስ ነቢይ እንዘ ይብል «ቃለ ዐዋዲ ዘይሰብክ በገዳም ወይብል ጺሑአ ፍኖቶ ለእግዚአብሔር ወዐርዩ መጽያሕቶ።»

⁴ ወልብሱ ለዮሐንስ እምፀጕረ ገመል ወቅናቱ ዘአዲም ውስተ ሐቌሁ ወሲሳዩ አንበጣ ወመዓረ ገዳም።

⁵ ወይመጽኡ ኀቤሁ ኵሎሙ ሰብአ ኢየሩሳሌም ወኵሎሙ ሰብአ ይሁዳ ወኵሉ አድያሚሃ ለዮርዳኖስ።

⁶ ወያጠምቆሙ በፈለገ ዮርዳኖስ እንዘ ይትአመኑ ኀጣውኢሆሙ።

⁷ ወሶበ ርእየ ብዙኃነ እምፈሪሳውያን ወሰዱቃውያን እንዘ ይመጽኡ ውስተ ጥምቀቱ ጽሚተ ይቤሎሙ ኦ ትውልደ አራዊተ ምድር መኑ አመረክሙ ከመ ታምሥጡ እመቅሠፍት ወእመንሱት ወእመዐት ዘይመጽእ።

⁸ ግበሩኬ እንከ ፍሬ ሠናየ ዘይደልወክሙ ለንስሓ።

⁹ ወኢይምሰልክሙ ዘታመሥጡ በብሂለ አብ ብነ አብርሃም እብለክሙ ከመ ይክል እግዚአብሔር እምእላንቱ አእባን አንሥኦ ውሉድ ለአብርሃም።

¹⁰ እስመ ናሁ ወድአ ማሕፄ ተሠይመ ውስተ ጕንደ ዕፀው ይንበር ኵሉኬ ዕፅ ዘኢይፈሪ ፍሬ ሠናየ ይትገዘም ወውስተ እሳት ይትወደይ።

¹¹ አንሰኬ አጠምቀክሙ በማይ ለንስሓ ወዘእምድኅሬየሰ ይመጽእ ውእቱ ይጸንዕ እምኔየ ዘኢይደልወኒ እጹር አሣእኖ ወውእቱ ያጠምቀክሙ በመንፈስ ቅዱስ ወበእሳት።

¹² ዘመሥኤ ውስተ እዴሁ ዘቦቱ ያነጽሕ ዐውደ እክሉ ወያስተጋብእ ሥርናዮ ውስተ መዛግብቲሁ ወሐሠሮሰ ያውዒ በእሳት ዘኢይጠፍእ።

በእንተ ጥምቀተ እግዚእ ኢየሱስ

¹³ አሜሃ መጽአ እግዚእ ኢየሱስ እምገሊላ ውስተ ዮርዳኖስ ከመ ይጠመቅ እም ዮሐንስ በፈለገ ዮርዳኖስ።

¹⁴ ወዮሐንስሰ አበዮ እንዘ ይብል አነ እፈቅድ እምኀቤከ እጠመቅ ወአንተኑ ትመጽእ ኀቤየ።

¹⁵ ወአውሥአ እግዚእ ኢየሱስ ወይቤሎ ኅድግ ምዕረሰ እስመ ከመዝ ተድላ ለነ ወይደልወነ ከመ ንፈጽም ኵሎ ጽድቀ ወእምዝ ኀደጎ።

¹⁶ ወተጠሚቆ እግዚእ ኢየሱስ ሶቤሃ ወፅአ እማይ ወናሁ ተርኅወ ሎቱ ሰማይ ወርእየ መንፈሰ እግዚአብሔር እንዘ ይወርድ በአምሳለ ርግብ ወነበረ ዲቤሁ።

¹⁷ ወናሁ መጽአ ቃል እምሰማይ ዘይብል ዝንቱ ውእቱ ወልድየ ዘአፈቅር ዘቦቱ ሠመርኩ።