ወንጌል ዘማቴዎስ 20 - ሐዲስ ኪዳን በልሳነ ግእዝ

ምዕራፍ 20 በእንተ ምሳሌ ዐቀብተ ወይን

¹ እስመ ትመስል መንግሥተ ሰማያት ብእሴ በዓለ ቤት ዘወፅአ በነግህ ይትዐሰብ ገባእተ ለዐጸደ ወይኑ።

² ወተካሀሎሙ ዐስቦሙ በበ ዲናር ለዕለት ወፈነዎሙ ውስተ ዐጸደ ወይኑ ይትቀነዩ።

³ ወወፂኦ ጊዜ ሠለስቱ ሰዓት ርእየ ካልኣነ እንዘ ይቀውሙ ውስተ ምሥያጥ ፅሩዓነ።

⁴ ወሎሙኒ ይቤሎሙ ሑሩ አንትሙኒ ውስተ ዐጸደ ወይንየ ተቀነዩ ወዘረትዐኒ እሁበክሙ ወእሙንቱሂ ሖሩ።

⁵ ወካዕበ ወፂኦ ጊዜ ስሱ ወተስዑ ሰዓት ገብረ ከማሁ ክመ።

⁶ ወጊዜ ዐሥሩ ወአሐዱ ሰዓት ወፂኦ ረከበ ካልኣነ እንዘ ይቀውሙ ወይቤሎሙ ምንትኑ ዘአቀመክሙ ዝየ ኵሎ ዕለተ ፅሩዓኒክሙ።

⁷ ወይቤልዎ እስመ አልቦ ዘተዐሰበነ ወይቤሎሙ ሑሩ አንትሙኒ ውስተ ዐጸደ ወይንየ ወተቀነዩ ወዘረትዐኒ እሁበክሙ።

⁸ ወመስዮ ይቤሎ በዓለ ዐጸደ ወይን ለመጋቢሁ ጸውዖሙ ለገባእት ወሀቦሙ ዐስቦሙ ወአኀዝ ቅድመ እምደኀርት እስከ ቀደምት።

⁹ ወመጽኡ እለ ዐሥሩ ወአሐዱ ሰዓት ወነሥኡ በበ ዲናር።

¹⁰ ወመጽኡ ቀደምት ወመሰሎሙ ዘያፈደፍዱ ነሢአ እምእሉ ወነሥኡ በበ ዲናር እሙንቱሂ።

¹¹ ወነሢኦሙ አንጐርጐሩ ላዕሌሁ ለበዓለ ቤት።

¹² እንዘ ይብሉ ለእሉ ደኀርት ዘአሐተ ሰዓተ ተቀንዩ አስተዓረይኮሙ ምስሌነ ለእለ ጾርነ ክበዳ ወላህባ ለዕለት።

¹³ ወአውሥአ ወይቤሎ ለአሐዱ እምኔሆሙ ኢዐመፅኩከ ዐርክየ አኮኑ በዲናር ተካሀልኩከ።

¹⁴ ንሣእ ዘይረክበከ ወሑር ወፈቀድኩ አነ ለዝንቱ ደኃራዊ አሀቦ ከማከ።

¹⁵ ወሚመ ኢይከውነኒሁ እግበር ዘፈቀድኩ በንዋይየ አው ዐይንከኑ ሐማሚ ውእቱ እስመ አነ ኄር አነ።

¹⁶ ከማሁኬ ይከውኑ ደኀርት ቀደምተ ወቀደምትኒ ደኀርተ እስመ ብዙኃን ጽዉዓን ወኅዳጣን ኅሩያን።

ዘከመ ነገሮሙ በእንተ ሕማሙ ወሞቱ

¹⁷ ወእንዘ የዐርግ እግዚእ ኢየሱስ ኢየሩሳሌም ነሥኦሙ ለዐሠርቱ ወክልኤቱ አርዳኢሁ እንተ ባሕቲቶሙ ወአግኀሦሙ እምፍኖት ወይቤሎሙ።

¹⁸ ናሁ ነዐርግ ኢየሩሳሌም ወይእኅዝዎ ለወልደ ዕጓለ እመሕያው ወያገብእዎ ኀበ ሊቃነ ካህናት ወጸሐፍት ወይኴንንዎ በሞት።

¹⁹ ወይሜጥውዎ ለሕዝብ ወይሣለቁ ላዕሌሁ ወይቀሥፍዎ ወይሰቅልዎ ወበሣልስት ዕለት ይትነሣእ።

በእንተ ደቂቀ ዘብዴዎስ

²⁰ ወእምዝ መጽአት ኀቤሁ እሞሙ ለደቂቀ ዘብዴዎስ ምስለ ደቂቃ ወሰገደት ሎቱ እንዘ ትስእል እምኀቤሁ።

²¹ ወይቤላ ምንተ ትፈቅዲ እግበር ለኪ ወትቤሎ ረሲ ሊተ ከመ ይንበሩ እሉ ደቂቅየ ክልኤሆሙ አሐዱ በየማንከ ወአሐዱ በጸጋምከ በመንግሥትከ።

²² ወአውሥአ እግዚእ ኢየሱስ ወይቤ ኢተአምሩ ዘትስእሉ ትክሉኑ ሰትየ ጽዋዕ ዘአነ እሰቲ ወጥምቀትየኒ ዘአነ እጠመቅ ትጠመቁኑ ወይቤልዎ እወ ንክል።

²³ ወይቤሎሙ ጽዋዕየሰ ትሰትዩ ወጥምቀትየኒ ትጠመቁ ወነቢረሰ በየማንየ ወበጸጋምየ አኮ አነ ዘእሁብ ዘእንበለ ለእለ አስተዳለወ ሎሙ አቡየ ዘበሰማያት።

²⁴ ወሰሚዖሙ ዐሠርቱ አንጐርጐሩ ላዕለ ክልኤቱ አኀው።

²⁵ ወጸውዖሙ እግዚእ ኢየሱስ ወይቤሎሙ ኢተአምሩኑ ከመ መኳንንቲሆሙ ለአሕዛብ ይኴንንዎሙ ወዐበይቶሙ ይሤለጡ ላዕሌሆሙ።

²⁶ ወለክሙሰ አኮ ከማሁ ወባሕቱ ዘይፈቅድ እምኔክሙ ይኩን ዐቢየ ይኩንክሙ ገብረ።

²⁷ ወዘሂ ይፈቅድ እምኔክሙ ይኩን ሊቀ ይኩንክሙ ላእከ።

²⁸ እስመ ኢመጽአ ወልደ ዕጓለ እመሕያው ከመ ይትለአክዎ ዘእንበለ ዳእሙ ከመ ይትለአክ ወየሀብ ነፍሶ ቤዛ ብዙኃን።

በእንተ ክልኤቱ ዕዉራን

²⁹ ወወፂኦ እምኢያሪሆ ተለውዎ ሰብእ ብዙኃን።

³⁰ ወናሁ ክልኤቱ ዕዉራን ይነብሩ ጥቃ ፍኖት ወሰሚዖሙ ከመ እግዚእ ኢየሱስ የኀልፍ ጸርሑ እንዘ ይብሉ ተሣሀለነ እግዚኦ ወልደ ዳዊት።

³¹ ወሰብእሰ ይጌሥጽዎሙ ከመ ያርምሙ ወአፈድፈዱ ጸሪሐ እንዘ ይብሉ ተሣሀለነ እግዚኦ ወልደ ዳዊት።

³² ወቆመ እግዚእ ኢየሱስ ወጸውዖሙ ወይቤሎሙ ምንተ ትፈቅዱ እግበር ለክሙ።

³³ ወይቤልዎ እግዚኦ ከመ ይትከሠታ አዕይንቲነ።

³⁴ ወአምሐርዎ ለእግዚእ ኢየሱስ ወገሠሦሙ አዕይንቲሆሙ ወበጊዜሃ ነጸሩ ወተለውዎ።