ወንጌል ዘማቴዎስ 19 - ሐዲስ ኪዳን በልሳነ ግእዝ

ምዕራፍ 19 ዘከመ አሕየዎሙ ለብዙኃን ሕሙማን

¹ ወሶበ ፈጸመ እግዚእ ኢየሱስ ዘንተ ነገረ ተንሥአ እምገሊላ ወበጽሐ ውስተ ብሔረ ይሁዳ ማዕዶተ ዮርዳኖስ።

² ወተለውዎ አሕዛብ ብዙኃን ወፈወሶሙ በህየ።

በእንተ ዘኢይደሉ ኀዲገ ብእሲት

³ ወመጽኡ ኀቤሁ ፈሪሳውያን እንዘ ያሜክርዎ ወይቤልዎ ይከውኖሁ ለብእሲ ይድኀር ብእሲቶ በኵሉ ዘአበሰት ሎቱ።

⁴ ወአውሥአ ወይቤሎሙ ኢያንበብክሙኑ ዘውስተ ኦሪት ከመ ዘፈጠሮሙ እግዚአብሔር እምትካት ተባዕተ ወአንስተ ገብሮሙ።

⁵ ወይቤ «በእንተዝ የኀድግ ብእሲ አባሁ ወእሞ ወይተልዋ ለብእሲቱ ወይከውኑ ክልኤሆሙ አሐደ ሥጋ።»

⁶ እንከሰኬ ኢኮኑ ክልኤተ አላ አሐዱ ሥጋ እሙንቱ ዘእግዚአብሔር አስተፃመረ ሰብእ ኢይፍልጥ።

⁷ ወይቤልዎ ለምንት እንከ አዘዘ ሙሴ ከመ የሀብዋ መጽሐፈ ኅዳጋቲሃ ወይኅድግዋ።

⁸ ወይቤሎሙ ሙሴሰ አዘዘክሙ በከመ እከየ ልብክሙ ትኅድጉ አንስቲያክሙ ትካትሰ አኮ ከማሁ ዘተገብረ።

⁹ እብለክሙ አነሂ ኵሉ ዘይድኅር ብእሲቶ ዘእንበለ ትዘሙ በላዕሌሁ ለሊሁ ረሰያ ዘማ ወአውሰበ ካልእተ ዘመወ ወእንተሂ ደኀርዋ አውሰበ ዘመወ።

¹⁰ ወይቤልዎ አርዳኢሁ እመሰ ከመዝ ውእቱ ሥርዐተ ብእሲ ወብእሲት አኮ ሠናይ አውስቦ።

¹¹ ወይቤሎሙ አኮ ለኵሉ ዘይትከሀል ዝንቱ ዘእንበለ ዳዕሙ ለዘተውህቦ።

¹² እስመ ቦ ሕፅዋን እለ ከማሁ ተወልዱ እምከርሠ እሞሙ ወቦ ሕፅዋን እለ ሐፀውዎሙ ሰብእ ወቦ ሕፅዋን እለ ሐፀዉ ርእሶሙ በእንተ መንግሥተ ሰማያት ወዘሰ ይክል ተዐግሦ ለይትዐገሥ።

በእንተ ሕፃናት እለ መጽኡ ኀበ እግዚእ ኢየሱስ

¹³ ወእምዝ አምጽኡ ሎቱ ሕፃናተ ከመ ያንብር እዴሁ ላዕሌሆሙ ወይጸሊ ወገሠጽዎሙ አርዳኢሁ።

¹⁴ ወይቤሎሙ እግዚእ ኢየሱስ ኢትክልእዎሙ ለሕፃናት ይምጽኡ ኀቤየ እስመ ለዘከመ እሉ ይእቲ መንግሥተ ሰማያት።

¹⁵ ወአንበረ እዴሁ ላዕሌሆሙ ወኀለፈ እምህየ።

በእንተ ባዕል ዘተስእሎ ለእግዚእነ

¹⁶ ወናሁ መጽአ አሐዱ ወሬዛ ወይቤሎ ሊቅ ኄር ምንተ እግበር እምሠናያት ከመ እረስ ሕይወተ ዘለዓለም።

¹⁷ ወይቤሎ ለምንት ትብለኒ ኄር አልቦ ኄር ዘእንበለ አሐዱ እግዚአብሔር ወእመሰ ትፈቅድ ትባእ ውስተ ሕይወት ዕቀብ ትእዛዛተ።

¹⁸ ወይቤሎ አያተኑ ዘአዐቅብ ወይቤሎ እግዚእ ኢየሱስ ኢትቅትል ነፍሰ ኢትዘሙ ኢትስርቅ ኢትኩን ስምዐ በሐሰት።

¹⁹ አክብር አባከ ወእመከ ወአፍቅር ቢጸከ ከመ ነፍስከ።

²⁰ ወይቤሎ ውእቱ ወሬዛ ዘንተሰ ኵሎ ዐቀብኩ እምንእስየ ምንት እንከ ዘተርፈኒ።

²¹ ወነጸሮ እግዚእ ኢየሱስ ወይቤሎ አሐቲ ተርፈተከ እመሰ ትፈቅድ ፍጹመ ትኩን ሑር ወሢጥ ኵሎ ዘብከ ወሀብ ለነዳያን ወታጠሪ ለከ መዝገበ ዘበሰማያት ወነዓ ትልወኒ።

²² ወሰሚዖ ወሬዛ ዘንተ ነገረ ኀለፈ ትኩዞ እስመ ብዙኅ ጥሪቱ።

²³ ወይቤሎሙ እግዚእ ኢየሱስ ለአርዳኢሁ አማን እብለክሙ ከመ ባዕል እምዕፁብ ይበውእ ውስተ መንግሥተ ሰማያት።

²⁴ ወካዕበ እብለክሙ ይቀልል ይኅልፍ ገመል እንተ ስቍረተ መርፍእ እምባዕል ይባእ ውስተ መንግሥተ እግዚአብሔር።

²⁵ ወሰሚዖሙ አርዳኢሁ አንከሩ ጥቀ እንዘ ይብሉ መኑ እንጋ ይክል ድኂነ።

²⁶ ወነጸሮሙ እግዚእ ኢየሱስ ወይቤሎሙ በኀበ ሰብእ ኢይትከሀል ዝ ወበኀበ እግዚአብሔርሰ ኵሉ ይትከሀል።

በእንተ ነሢአ ዕሴት ምክዕቢት

²⁷ ወእምዝ አውሥአ ጴጥሮስ ወይቤሎ ናሁኬ ንሕነ ኀደግነ ኵሎ ወተሎናከ ምንተ እንከ ንረክብ።

²⁸ ወይቤሎሙ እግዚእ ኢየሱስ አማን እብለክሙ አንትሙ እለ ተለውክሙኒ አመ ዳግም ልደት አመ ይነብር ወልደ ዕጓለ እመሕያው ዲበ መንበረ ስብሐቲሁ አንትሙኒ ትነብሩ ዲበ ዐሠርቱ ወክልኤቱ መናብርት ወትኴንኑ ዐሠርተ ወክልኤተ ሕዝበ እስራኤል።

²⁹ ወኵሉ ዘኀደገ አብያተ ወአኀወ ወአኃተ ወአበ ወእመ ወብእሲተ ወውሉደ ወገራውሀ በእንተ ስምየ ምእተ ምክዕቢተ ይነሥእ ወሕይወተ ዘለዓለም ይወርስ።

³⁰ ወብዙኃን ቀደምት ይከውኑ ደኀርተ ወደኀርትኒ ይከውኑ ቀደምተ።