ወንጌል ዘማቴዎስ 18 - ሐዲስ ኪዳን በልሳነ ግእዝ

ምዕራፍ 18 በእንተ ትምህርተ ትሕትና

¹ ወበይእቲ ሰዓት ቀርቡ ኀቤሁ አርዳኢሁ ለእግዚእ ኢየሱስ እንዘ ይብሉ መኑ እንጋ የዐቢ በመንግሥተ ሰማያት።

² ወጸውዐ ሕፃነ ወአቀሞ ማእከሎሙ።

³ ወይቤ አማን እብለክሙ እመ ኢተመየጥክሙ ወኢኮንክሙ ከመ ዝንቱ ሕፃን ኢትበውኡ ውስተ መንግሥተ ሰማያት።

⁴ ወዘአትሐተ ርእሶ ከመ ዝንቱ ሕፃን ዝ ውእቱ ዘየዐቢ በመንግሥተ ሰማያት።

⁵ ወዘሂ ተወክፈ አሐደ ሕፃነ ዘከመዝ በስምየ ኪያየ ተወክፈ።

⁶ ወለዘሂ አስሐቶ ለአሐዱ እምእሉ ንኡሳን እለ የአምኑ ብየ ይኄይሶ ከመ ይእስሩ በክሣዱ ማኅረጸ አድግ ወያስጥምዎ ውስተ ልጐተ ባሕር።

⁷ አሌ ሎቱ ለዓለም እመንሱት ዘይመጽእ እስመ ግብር ይመጽእ መንሱት ወባሕቱ አሌ ሎ ለውእቱ ብእሲ ዘያመጽኣ ለመንሱት።

⁸ ወእመኒ እዴከ አው እግርከ ታስሕተከ ምትራ ወግድፋ እምላዕሌከ እስመ ይኄይሰከ ትባእ ውስተ ሕይወት ሐንካሰከ ወፅዉሰከ እምእንዘ ብከ ክልኤ እድ ወክልኤ እግር ትትወደይ ውስተ እሳት ዘለዓለም።

⁹ ወእመኒ ዐይንከ ታስሕተከ ምልሓ ወግድፋ እምላዕሌከ እስመ ይኄይሰከ ነቋረከ ትባእ ውስተ ሕይወት እምእንዘ ክልኤ ዐይን ብከ ትትወደይ ውስተ እሳተ ገሃነም።

¹⁰ ዑቁ ኢታስተሐቅርዎ ለአሐዱ እምእሉ ንኡሳን እብለክሙ ከመ መላእክቲሆሙ በሰማያት ወትረ ይሬእዩ ገጾ ለአቡየ ዘበሰማያት።

¹¹ እስመ መጽአ ወልደ ዕጓለ እመሕያው ከመ ይኅሥሥ ወያድኅን ዘተኀጕለ።

በእንተ በግዕ ዘተኀጕለ

¹² ምንተ ትብሉ እመቦ ብእሲ ዘቦቱ ምእት አባግዕ ወእመ ተገድፈ አሐዱ እምውስቴቶሙ አኮሁ የኀድግ ተስዓ ወተስዐተ ውስተ ገዳም ወየሐውር ይኅሥሥ ዘተገድፎ።

¹³ ወእምከመ ረከቦ አማን እብለክሙ ከመ ይትፌሣሕ በእንቲኣሁ ፈድፋደ እምተስዓ ወተስዐቱ እለ ኢተገድፉ።

¹⁴ ከማሁኬ ኢይፈቅድ አቡየኒ ዘበሰማያት ከመ ይትኀጐል አሐዱ እምእሉ ንኡሳን።

በእንተ ገሥጾተ እኍ

¹⁵ ወእመኒ አበሰ ለከ እኁከ ሑር ወገሥጾ በባሕቲትከ በባሕቲቱ አንተ ወውእቱ ወእመ ሰምዐከ ረባኅኮ ለእኁከ።

¹⁶ ወእመሰ ኢሰምዐከ ንሣእ ምስሌከ በዳግም አሐደ አው ክልኤተ እስመ በአፈ ክልኤቱ ወሠለስቱ ሰማዕት ይቀውም ኵሉ ነገር።

¹⁷ ወእመሰ ኢሰምዖሙ ሎሙሂ ንግራ ለቤተ ክርስቲያን ወእመሰ ለቤተ ክርስቲያንሂ ኢሰምዓ ይኩን ከመ አረማዊ ወመጸብሓዊ።

¹⁸ አማን እብለክሙ ዘአሰርክሙ በምድር ይከውን እሱረ በሰማያት ወዘፈታሕክሙ በምድር ይከውን ፍቱሐ በሰማያት።

¹⁹ ወዓዲ እብለክሙ ለእመ ኀብሩ ክልኤቱ አው ሠለስቱ እምኔክሙ በውስተ ምድር በእንተ ኵሉ ግብር ዘሰአሉ ይትገበር ሎሙ በኀበ አቡየ ዘበሰማያት።

²⁰ እስመ ኀበ ሀለዉ ክልኤቱ ወሠለስቱ ጉቡኣን በስምየ ህየ እሄሉ አነ ማእከሎሙ።

²¹ ወእምዝ ቀርበ ኀቤሁ ጴጥሮስ ወይቤሎ እግዚኦ ስፍነ እመ አበሰ ሊተ እኁየ እኅድግ ሎቱ እስከ ስብዕኑ።

²² ወይቤሎ እግዚእ ኢየሱስ ኢይብለከ እስከ ስብዕ አላ እስከ ሰብዓ በበስብዕ።

በእንተ ምሳሌ ንጉሥ ወአግብርቲሁ

²³ በእንተዝ ትመስል መንግሥተ ሰማያት ብእሴ ንጉሠ ዘፈቀደ ይትሐሰቦሙ ለአግብርቲሁ።

²⁴ ወሶበ አኀዘ ይትሐሰቦሙ አምጽኡ ሎቱ አሐደ ዘይፈድዮ እልፈ መካልየ።

²⁵ ወኀጢኦ ዘይፈድዮ አዘዘ እግዚኡ ይሢጥዎ ምስለ ብእሲቱ ወምስለ ውሉዱ ወኵሎ ዘቦ እስከ ይፈዲ።

²⁶ ወወድቀ እንከ ውእቱ ገብር ታሕተ እገሪሁ ወሰገደ ሎቱ ወአስተብቍዖ እንዘ ይብል እግዚኦ ተዐገሠኒ ወኵሎ እፈድየከ።

²⁷ ወምሕሮ እግዚኡ ለውእቱ ገብር ወፈትሖ ወዕዳሁኒ ኀደገ ሎቱ።

²⁸ ወወፂኦ ውእቱ ገብር ረከበ አሐደ ገብረ እምነ አብያጺሁ ዘይፈድዮ ምእተ ዲናረ ወአኀዞ ወኀነቆ እንዘ ይብል ሀበኒ ዘትፈድየኒ።

²⁹ ወወድቀ ውእቱ ገብር ታሕተ እገሪሁ ወአስተብቍዖ እንዘ ይብል ተዐገሠኒ ወኵሎ እፈድየከ።

³⁰ ወአበዮ ወሖረ ወሞቅሖ እስከ ይፈድዮ።

³¹ ወርእዮሙ አብያጺሁ ዘገብረ ተከዙ ጥቀ ወሐዊሮሙ ነገርዎ ለእግዚኦሙ ኵሎ ዘገብረ።

³² ወእምዝ ጸውዖ እግዚኡ ወይቤሎ ኦ ገብር እኩይ ኵሎ ዕዳከ ኀደጉ ለከ እስመ አስተብቋዕከኒ።

³³ አኮሁ መፍትው አንተሂ ትምሀር ቢጸከ በከመ አነ መሐርኩከ።

³⁴ ወተምዐ እግዚኡ ወመጠዎ ለእለ ይሣቅይዎ እስከ አመ ይሤልጥ ኵሎ ዘይፈድዮ።

³⁵ ከማሁኬ አቡየኒ ሰማያዊ ይገብር ብክሙ እመ ኢኀደግሙ አበሳሆሙ ለቢጽክሙ እምኵሉ ልብክሙ።