ወንጌል ዘማቴዎስ 17 - ሐዲስ ኪዳን በልሳነ ግእዝ

ምዕራፍ 17 ዘከመ አርአየ ስብሐቲሁ በደብረ ታቦር

¹ ወእምድኅረ ስሱ መዋዕል ነሥኦሙ እግዚእ ኢየሱስ ለጴጥሮስ ወለያዕቆብ ወለዮሐንስ እኁሁ ወአዕረጎሙ ደብረ ነዋኀ እንተ ባሕቲቶሙ።

² ወተወለጠ ራእዩ በቅድሜሆሙ ወአብርሀ ገጹ ከመ ፀሐይ ወአልባሲሁኒ ኮነ ጸዐዳ ከመ በረድ።

³ ወናሁ አስተርአይዎሙ ሙሴ ወኤልያስ እንዘ ይትናገሩ ምስሌሁ።

⁴ ወአውሥአ ጴጥሮስ ወይቤሎ ለእግዚእ ኢየሱስ እግዚኦ ሠናይ ውእቱ ለነ ሀልዎ ዝየ ወእመሰ ትፈቅድ ንግበር በዝየ ሠለስተ ማኅደረ አሐደ ለከ ወአሐደ ለሙሴ ወአሐደ ለኤልያስ።

⁵ ወእንዘ ዘንተ ይትናገሩ ናሁ ደመና ብሩህ ጸለሎሙ ወናሁ መጽአ ቃል እምውስተ ደመና ዘይብል ዝንቱ ውእቱ ወልድየ ዘአፈቅር ዘቦቱ ሠመርኩ ወሎቱ ስምዕዎ።

⁶ ወሰሚዖሙ አርዳኢሁ ደንገፁ ወፈርሁ ጥቀ ወወድቁ በገጾሙ ዲበ ምድር።

⁷ ወቀርበ እግዚእ ኢየሱስ ወለከፎሙ ወይቤሎሙ ተንሥኡ ወኢትፍርሁ።

⁸ ወአንሥኡ አዕይንቲሆሙ ወአልቦ ዘርእዩ ወኢመነሂ ዘእንበለ እግዚእ ኢየሱስ ባሕቲቱ።

⁹ ወእንዘ ይወርዱ እምደብር አዘዞሙ እግዚእ ኢየሱስ እንዘ ይብል ኢትንግሩ ወኢለመኑሂ ዘርኢክሙ እስከ አመ ወልደ ዕጓለ እመሕያው እሙታን ይትነሣእ።

¹⁰ ወተስእልዎ አርዳኢሁ እንዘ ይብሉ እፎ ይብሉ ጸሐፍት ኤልያስ ሀለዎ ይምጻእ ቅድመ።

¹¹ ወአውሥአ እግዚእ ኢየሱስ ወይቤሎሙ እወ ኤልያስ ይቀድም መጺአ ወያስተራትዕ ኵሎ።

¹² ወባሕቱ እብለክሙ ከመ ኤልያስ ወድአ መጽአ ወኢያእመርዎ ወባሕቱ ገብሩ ላዕሌሁ ኵሎ ዘከመ ፈቀዱ ወከማሁ ለወልደ ዕጓለ እመሕያውኒ ሀለዎ ይሕምም እምኔሆሙ።

¹³ ወእምዝ አእመሩ አርዳኢሁ ከመ በእንተ ዮሐንስ መጥምቅ ይቤሎሙ።

በእንተ ዘነገርጋር

¹⁴ ወበጺሖ ኀበ ሕዝብ ቀርበ ኀቤሁ ብእሲ ወሰገደ ሎቱ እንዘ ይትመሐለል ወይብል፤

¹⁵ እግዚኦ ተሣሀል ሊተ ወልድየ እስመ እኩይ ጋኔን አኀዞ ወያንገረግሮ ወበአርእስተ አውራኀ ይሣቅዮ ወመብዝኅቶሰ ያወድቆ ውስተ እሳት ወቦ አመ ያወድቆ ውስተ ማይ።

¹⁶ ወአምጻእክዎ ኀበ አርዳኢከ ወስእኑ ፈውሶቶ።

¹⁷ ወእምዝ አውሥአ እግዚእ ኢየሱስ ወይቤ ኦ ትውልድ ኢአማኒት ወዕሉት እስከ ማእዜኑ እሄሉ ምስሌክሙ ወእስከ ማእዜኑ እትዔገሠክሙ አምጽእዎ ሊተ ዝየ።

¹⁸ ወገሠጾ እግዚእ ኢየሱስ ወወፅአ ጋኔኑ እምላዕሌሁ ወሐይወ ወልዱ በይእቲ ሰዓት።

¹⁹ ወእምዝ ቀሪቦሙ አርዳኢሁ እንተ ባሕቲቶሙ ይቤልዎ ለእግዚእ ኢየሱስ በእንተ ምንት ንሕነ ስእነ አውፅኦቶ።

²⁰ ወይቤሎሙ እግዚእ ኢየሱስ በእንተ ሕጸጸ ሃይማኖትክሙ አማን እብለክሙ እመ ብክሙ ሃይማኖት መጠነ ኅጠተ ሰናፔ ወትብልዎ ለዝ ደብር ፍልስ እምዝየ ኀበ ከሃ ወይፈልስ ወአልቦ ዘይሰአነክሙ።

²¹ ወዝንቱ ዘመድ ኢይወፅእ ዘእንበለ በጾም ወበጸሎት።

²² ወእንዘ ያንሶስዉ ውስተ ገሊላ ይቤሎሙ እግዚእ ኢየሱስ ሀለዎ ለወልደ ዕጓለ እመሕያው ያግብእዎ ውስተ እደ ሰብእ።

²³ ወይቀትልዎ ወአመ ሣልስት ዕለት ይትነሣእ ወተከዙ ጥቀ አርዳኢሁ ሰሚዖሙ ዘንተ።

በእንተ ውሂበ ጸባሕት

²⁴ ወበጺሖ ቅፍርናሆም መጽኡ እለ ጸባሕተ ዲናር ይነሥኡ ኀበ ጴጥሮስ ወይቤልዎ ሊቅክሙሰ ኢይሁብኑ ጸባሐተ።

²⁵ ወይቤ እወ ወበዊኦ ውስተ ቤት አቅደመ እግዚእ ኢየሱስ ብሂሎቶ ምንተ ትብል ስምዖን ነገሥተ ምድር እምኀበ መኑ ይነሥኡ ጸባሐተ ወጋዳ እምኀበ ውሉዶሙኑ ወሚመ እምኀበ ነኪር።

²⁶ ወይቤ እምኀበ ነኪር ወይቤሎ እግዚእ ኢየሱስ እንጋ ውሉዶሙሰኬ አግዓዝያንኑ እሙንቱ።

²⁷ ወባሕቱ ከመ ኢያንጐርጕሩ ሑር ውስተ ባሕር ወደይ መቃጥነ ወዘቀዳሚ አሥገርከ ዓሣ ንሣእ ወክሥት አፉሁ ወትረክብ ዲናረ ስጢጥራስ ዘውእቱ አርባዕቱ ድርህም ኪያሁ ንሣእ ወሀቦሙ ህየንቴየ ወህየንቴከ።