ወንጌል ዘማቴዎስ 16 - ሐዲስ ኪዳን በልሳነ ግእዝ

ምዕራፍ 16 ዘከመ ኀሠሡ ሰብእ ትእምርተ እምሰማይ

¹ ወመጽኡ ፈሪሳውያን ወሰዱቃውያን እንዘ ያሜክርዎ ወሰአልዎ ትእምርተ እምሰማይ ያርእዮሙ።

² ወአውሥአ እግዚእ ኢየሱስ ወይቤሎሙ እምከመ መስየ ወኮነ ሕዋየ ትብሉ ጽሕወ ብሔር እስመ ያቅየሐይሕ ሰማይ።

³ ወእምከመ ጸብሐ ትብሉ ዮምሰኬ ይዘንም እስመ ያቅሐይሕ ሰማይ ድሙነ ኦ! መደልዋን ለገጸ ሰማይኑ ተአምሩ ፈክሮቶ ወተአምረ መዋዕልሰ እፎ ኢተአምሩ።

⁴ ወይቤሎሙ ትውልድ ዕሉት ወዘማ ትእምርተ ተኀሥሥ ወትእምርትሰ ኢይትወሀባ ዘእንበለ ትእምርተ ዮናስ ነቢይ ወእምዝ ኀደጎሙ ወሖረ።

በእንተ ተዐቅቦ እምትምህርቶሙ ለፈሪሳውያን

⁵ ወበጺሖሙ አርዳኢሁ ማዕዶተ ረስዑ ነሢአ ኅብስት።

⁶ ወይቤሎሙ እግዚእ ኢየሱስ ዑቁ ወተዐቀቡ እምብኁኦሙ ለፈሪሳውያን ወሰዱቃውያን።

⁷ ወኀለዩ በበይናቲሆሙ እንዘ ይብሉ እስመሁ እንጋ ኅብስተ ኢነሣእነ ይብለነ።

⁸ ወአእመሮሙ እግዚእ ኢየሱስ ወይቤሎሙ ምንተ ትኄልዩ በበይናቲክሙ ኦ ሕጹጻነ ሃይማኖት እስመሁ ኅብስት አልብክሙ።

⁹ ዓዲሁ ኢትሌብዉኑ ወኢትዜከሩ ዘአመ ኀምስ ኅብስት እለ ለኀምሳ ምእት ብእሲ ሚመጠነ መዛርዐ አግኀሥክሙ ወይቤልዎ ዐሠርተ ወክልኤተ።

¹⁰ ወአመ ሰብዑ ኅብስት እለ ለአርብዓ ምእት ብእሲ ሚመጠነ አስፈሬዳተ አግኀሥክሙ ወይቤልዎ ሰብዑ።

¹¹ እፎ ዘኢትሌብዉ ከመ አኮ በእንተ ኅብስት ዘእቤለክሙ ዑቁ ወተዐቀቡ እምነ ብኁኦሙ ለፈሪሳውያን ወሰዱቃውያን።

¹² ወእምዝ ለበዉ አርዳኢሁ ከመ አኮ ዘይቤሎሙ በእንተ ብኅአተ ኅብስት ይትዐቀቡ አላ እምነ ትምህርቶሙ ለፈሪሳውያን ወሰዱቃውያን።

ዘከመ ተስእሎሙ እግዚእ ኢየሱስ በቂሳርያ

¹³ ወበጺሖ እግዚእ ኢየሱስ ብሔረ ቂሳርያ ዘፊልጶስ ተስእሎሙ ለአርዳኢሁ እንዘ ይብል መነ ይብልዎ ሰብእ ለወልደ ዕጓለ እመሕያው።

¹⁴ ወይቤልዎ ቦ እለ ይብሉከ ዮሐንስሃ መጥምቀ ወካልኣን ይብሉከ ኤልያስሃ ወመንፈቆሙ ኤርምያስሃ ወእመአኮ አሐዱ እምነቢያት ቀደምት።

¹⁵ ወይቤሎሙ አንትሙሰኬ መነ ትብሉኒ።

¹⁶ ወአውሥአ ስምዖን ጴጥሮስ ወይቤ አንተ ውእቱ ክርስቶስ ወልደ እግዚአብሔር ሕያው።

¹⁷ ወአውሥአ እግዚእ ኢየሱስ ወይቤሎ ብፁዕ አንተ ስምዖን ወልደ ዮና እስመ ኢከሠተ ለከ ዘሥጋ ወደም አላ አቡየ ዘበሰማያት።

¹⁸ ወአንሰ እብለከ ከመ አንተ ኰኵሕ ወዲበ ዛቲ ኰኵሕ አሐንጻ ለቤተ ክርስቲያንየ ወአናቅጸ ሲኦል ኢይኄይልዋ።

¹⁹ ወእሁበከ መራኁተ መንግሥተ ሰማያት ወዘአሰርከ በምድር ይከውን እሱረ በሰማያት ወዘፈታሕከ በምድር ይከውን ፍቱሐ በሰማያት።

²⁰ ወእምዝ ገሠጾሙ ለአርዳኢሁ ከመ ኢይንግሩ ወኢለመኑሂ ከመ ውእቱ ኢየሱስ ክርስቶስ።

በእንተ ሕማሙ ወሞቱ

²¹ ወእምአሜሃ እግዚእ ኢየሱስ አኀዘ ይንግሮሙ ለአርዳኢሁ ከመ ሀለዎ ይሑር ኢየሩሳሌም ወብዙኀ ያሐምምዎ ረበናት ወሊቃነ ካህናት ወጸሐፍት ወይትቀተል ወበሣልስት ዕለት ይትነሣእ።

²² ወተሰጥዎ ጴጥሮስ ወአኀዘ ይክልኦ እንዘ ይብል ሐሰ ለከ እግዚኦ ይኩን ላዕሌከ ዝንቱ።

²³ ወተመዪጦ ይቤሎ ለጴጥሮስ ሑር እምድኅሬየ ሰይጣን እስመ ኮንከ ማዕቅፍየ ሊተ እስመ ኢትኄሊ ዘእግዚአብሔር ዘእንበለ ዘሰብእ።

²⁴ ወእምዝ ይቤሎሙ እግዚእ ኢየሱስ ለአርዳኢሁ ዘይፈቅድ ይትልወኒ ይጽልኣ ለነፍሱ ወያጥብዕ ወይንሣእ መስቀለ ሞቱ ወይትልወኒ።

²⁵ ወዘይፈቅድ ያድኅና ለነፍሱ ለይግድፋ ወዘሰ ገደፋ ለነፍሱ በእንቲኣየ ይረክባ።

²⁶ ወምንት ይበቍዖ ለሰብእ ለእመ ኵሎ ዓለመ ረብኀ ወነፍሶ ኀጕለ ወምንተ እምወሀበ ሰብእ ቤዛሃ ለነፍሱ።

²⁷ እስመ ሀለዎ ለወልደ ዕጓለ እመሕያው ይምጻእ በስብሐተ አቡሁ ምስለ መላእክቲሁ ወአሜሃ የዐስዮ ለኵሉ በከመ ምግባሩ።

²⁸ አማን እብለክሙ ቦ እምእለ ሀለዉ ይቀውሙ ዝየ እለ ኢይጥዕምዎ ለሞት እስከ አመ ይሬእይዎ ለወልደ ዕጓለ እመሕያው እንዘ ይመጽእ በስብሐተ አቡሁ።