ወንጌል ዘማቴዎስ 15 - ሐዲስ ኪዳን በልሳነ ግእዝ

ምዕራፍ 15 በእንተ እለ የኀድጉ ትእዛዘ እግዚአብሔር

¹ ወእምዝ ቀርቡ ኀበ እግዚእ ኢየሱስ እለ መጽኡ እምኢየሩሳሌም ጸሐፍት ወፈሪሳውያን እንዘ ይብሉ።

² ለምንት ይትዐደዉ አርዳኢከ ሥርዐተ ረበናት ወትእዛዞሙ ለሊቃነ ካህናት እስመ ኢይትኀፀቡ እደዊሆሙ ሶበ ይበልዑ ኅብስተ።

³ ወአውሥአ ወይቤሎሙ ለምንት አንትሙኒ ትትዐደዉ ትእዛዘ እግዚአብሔር በእንተ ሥርዐትክሙ።

⁴ ወእግዚአብሔርሰ ይቤ አክብር አባከ ወእመከ ወዘአሕሠመ ቃለ ላዕለ አቡሁ ወእሙ ሞተ ለይሙት።

⁵ ወአንትሙሰ ትብሉ ዘይቤሎ ለአቡሁ ወለእሙ ሀብተ ቍርባን ዘረባኅከ እምኔየ ዝ ብሂል ኢያክብር አባሁ ወእሞ።

⁶ ወሰዐርክሙ ቃሎ ለእግዚአብሔር በእንተ ሥርዐትክሙ።

⁷ ኦ መደልዋን ሠናየ ተነበየ ኢሳይያስ ላዕሌክሙ እንዘ ይብል፤

⁸ «ዝ ሕዝብ በከናፍሪሆሙ ያከብሩኒ ወበልቦሙሰ ነዋኀ ይርኅቁ እምኔየ።

⁹ ወከንቶ ያመልኩኒ እንዘ ይሜህሩ ትምህርተ ሥርዐታተ ሰብእ።»

¹⁰ ወጸውዖሙ ለሕዝብ ወይቤሎሙ ስምዑ ወለብዉ።

¹¹ ከመ አኮ ዘይበውእ ውስተ አፍ ዘያረኵሶ ለሰብእ አላ ዘይወፅእ እምውስተ አፍ ውእቱ ያረኵሶ ለሰብእ።

¹² ወእምዝ ቀሪቦሙ አርዳኢሁ ይቤልዎ ተአምርሁ ከመ ፈሪሳውያን ሰሚዖሙ ቃለከ አንጐርጐሩ።

¹³ ወአውሥአ ወይቤ ኵላ ተክል እንተ ኢተከላ አቡየ ሰማያዊ ትሤሮ።

¹⁴ ኅድግዎሙ ለእሉ እስመ ዕዉራን እሙንቱ ወአምርሕተ ዕዉራን ዕዉር ዕዉረ ለእመ መርሐ ክልኤሆሙ ይወድቁ ውስተ ግብ።

¹⁵ ወአውሥአ ጴጥሮስ ወይቤሎ ፈክር ለነ ዘንተ ምሳሌ።

¹⁶ ወይቤሎሙ እግዚእ ኢየሱስ ዓዲሁ አንትሙኒ ኢለበውክሙኑ ዘንተ።

¹⁷ ኢተአምሩኑ ከመ ኵሉ ዘይበውእ ውስተ አፍ ውስተ ከርሥ ይትገመር ወጽመ ይትገደፍ።

¹⁸ ወዘሰ ይወፅእ እምውስተ አፍ እምልብ ይወፅእ ወዝ ውእቱ ዘያረኵሶ ለሰብእ።

¹⁹ እስመ እምውስተ ልብ ይወፅእ ኅሊና እኩይ ዘውእቱ ቀቲል ወዝሙት ስርቅ ስምዕ በሐሰት ወፅርፈት።

²⁰ እሉኬ ዘያረኵስዎ ለሰብእ ወዘእንበለ ተኀፅቦ እድሰ በሊዕ ኢያረኵሶ ለሰብእ።

በእንተ ከነናዊት ብእሲት

²¹ ወወፂኦ እግዚእ ኢየሱስ ተግኅሠ እምህየ ውስተ ደወለ ጢሮስ ወሲዶና።

²² ወናሁ ብእሲት ከነናዊት እምውእቱ አድዋል መጽአት እንዘ ትጸርሕ ወትብል መሐረኒ እግዚእየ ወልደ ዳዊት እስመ ለወለትየ እኩይ ጋኔን አኀዛ ወያአብዳ።

²³ ወኢያውሥኣ እግዚእ ኢየሱስ ቃለ ወቀሪቦሙ አርዳኢሁ አስተብቍዕዎ እንዘ ይብሉ ፈንዋ ለዛቲ ብእሲት እስመ ትጸርሕ በድኅሬነ።

²⁴ ወአውሥአ ወይቤሎሙ ኢተፈነውኩ ዘእንበለ ኀበ አባግዕ ዘተኀጕላ ዘቤተ እስራኤል።

²⁵ ወቀሪባ ሰገደት ሎቱ እንዘ ትብል እግዚኦ ርድአኒ።

²⁶ ወአውሥኣ ወይቤላ ኢኮነ ሠናየ ነሢአ ኅብስተ ውሉድ ወውሂብ ለከለባት።

²⁷ ወትቤ እወ እግዚኦ ከለባትኒ ጓ ይበልዑ እምፍርፋራት ዘይወድቅ እማእደ አጋዕዝቲሆሙ።

²⁸ ወእምዝ አውሥኣ እግዚእ ኢየሱስ ወይቤላ ኦ ብእሲቶ ዐቢይ ሃይማኖትኪ ይኩንኪ በከመ ተአመንኪ ወሐይወት ወለታ እምይእቲ ሰዓት።

ዘከመ ተፈወሱ አሕዛብ እምብዙኅ ደዌሆሙ

²⁹ ወኀሊፎ እምህየ እግዚእ ኢየሱስ በጽሐ ኀበ ሐይቀ ባሕር ዘገሊላ ወዐሪጎ ደብረ ነበረ ህየ።

³⁰ ወቀርቡ ኀቤሁ አሕዛብ ብዙኃን ወአምጽኡ ምስሌሆሙ ሐንካሳነ ወዕዉራነ ወጽሙማነ ወፅዉሳነ ወባዕዳነ ብዙኃነ ወገደፍዎሙ ኀበ እገሪሁ ለእግዚእ ኢየሱስ ወፈወሶሙ።

³¹ እስከ ሶበ ያነክሩ አሕዛብ እንዘ ይሬእዩ ከመ በሃማን ይትናገሩ ወሐንካሳን የሐውሩ ወዕዉራን ይሬእዩ ወሰብሕዎ ለአምላከ እስራኤል ዘወሀበ ዘከመዝ ሥልጣነ ለሰብእ።

በእንተ ሰብዑ ኅብስት ወኅዳጥ ዓሣ

³² ወጸውዖሙ እግዚእ ኢየሱስ ለአርዳኢሁ ወይቤሎሙ ያምሕሩኒ እሉ ሕዝብ እስመ ናሁ ሠሉስ መዋዕል እምዘበልዑ እክለ ወአልቦሙ ዘይበልዑ ወኢይፈቅድ እፈንዎሙ ርኁባኒሆሙ ከመ ኢይመጽልዉ በፍኖት።

³³ ወይቤልዎ አርዳኢሁ እምአይቴ እንከ ለነ በገዳም ኅብስት ዘያጸግብ ለዘመጠነዝ ሕዝብ።

³⁴ ወይቤሎሙ እግዚእ ኢየሱስ ሚመጠን ኀባውዝ ብክሙ ወይቤልዎ ሰብዑ ኅብስት ወኅዳጥ ዓሣ።

³⁵ ወአዘዞሙ ለሕዝብ ይርፍቁ ዲበ ምድር።

³⁶ ወነሥአ ሰቡዐ ኅብስተ ወዓሣኒ ወይእተ ጊዜ አእኰተ ወፈተተ ወወሀቦሙ ለአርዳኢሁ ወአርዳኢሁኒ አቅረቡ ለሕዝብ።

³⁷ ወበልዑ ኵሎሙ ወጸግቡ ወአግኀሡ ዘተርፈ ፍተታተ ሰብዐተ አስፈሬዳተ ምሉአ።

³⁸ ወእለሰ በልዑ ዕደው የአክሉ አርብዓ ምእት ብእሲ ዘእንበለ አንስት ወደቅ።

³⁹ ወፈቲሖ አሕዛበ ዐርገ ውስተ ሐመር ወሖረ ውስተ ደወለ መጌዶል።