ወንጌል ዘማቴዎስ 11 - ሐዲስ ኪዳን በልሳነ ግእዝ

ምዕራፍ 11 በእንተ እለ ተፈነዉ እምኀበ ዮሐንስ

¹ ወሶበ ፈጸመ እግዚእ ኢየሱስ አዝዞቶሙ ለዐሠርቱ ወክልኤቱ አርዳኢሁ ኀለፈ እምህየ ከመ ይምሀር ወይስብክ ውስተ አህጉሪሆሙ።

² ወሰሚዖ ዮሐንስ ምግባሮ ለክርስቶስ እንዘ ሀሎ በቤተ ሞቅሕ ፈነወ ኀቤሁ ክልኤተ እምአርዳኢሁ።

³ ወይቤሎ አንተኑ ዘይመጽእ ወቦኑ ካልእ ዘንሴፎ።

⁴ ወአውሥአ እግዚእ ኢየሱስ ወይቤሎሙ ሐዊረክሙ ዜንውዎ ለዮሐንስ ዘርኢክሙ ወዘሰማዕክሙ።

⁵ ዕዉራን ይሬእዩ ወሐንካሳን የሐውሩ እለ ለምጽ ይነጽሑ ወጽሙማን ይሰምዑ ሙታን ይትነሥኡ ወነዳያን ይዜነዉ።

⁶ ወብፁዕ ውእቱ ዘኢተዐቅፈ ብየ።

ዘከመ ወደሶ እግዚእ ኢየሱስ ለዮሐንስ መጥምቅ

⁷ ወእምድኅረ ኀለፉ ላእካነ ዮሐንስ አኀዘ እግዚእ ኢየሱስ ይበሎሙ ለሕዝብ በእንተ ዮሐንስ መጥምቅ ምንተኑመ ወፃእክሙ ገዳመ ትርአዩ ብርዐኑ ዘይትሐወስ እምነፋስ።

⁸ ወምንተኑመ ወፃእክሙ ትርአዩ ብእሴኑ ዘርሡይ በቀጠንተ አልባስ እለሰ ቀጠንተ ይለብሱ ናሁ ውስተ አብያተ ነገሥት ሀለዉ።

⁹ ወምንተኑመ ወፃእክሙ ትርአዩ ነቢየኑ እወ እብለክሙ ውእቱ ፈድፋደ የዐቢ እምነቢያት።

¹⁰ እስመ ዝንቱ ውእቱ ዘበእንቲኣሁ ተጽሕፈ «ናሁ አነ እፌኑ መልአክየ ቅድመ ገጽከ ዘይጸይሕ ፍኖተከ በቅድሜከ።»

¹¹ አማን እብለክሙ ኢተንሥአ እምትውልደ አንስት ዘየዐቢ እምዮሐንስ መጥምቅ ወበመንግሥተ ሰማያትሰ ዘይንእሶ የዐብዮ።

¹² ወእመዋዕለ ዮሐንስ መጥምቅ እስከ ይእዜ ትትገፋዕ መንግሥተ ሰማያት ወግፉዓን ይትማሠጥዋ።

¹³ እስመ ኵሎሙ ኦሪት ወነቢያት እስከ ዮሐንስ ተነበዩ።

¹⁴ ወእመሰ ትፈቅዱ ትትወከፍዎ ዝ ውእቱ ኤልያስ ዘሀለዎ ይምጻእ፤

¹⁵ ዘቦ እዝን ሰሚዐ ለይስማዕ፤

¹⁶ በመኑ አስተማስሎሙ ለሰብአ ዛቲ ትውልድ ይመስሉ ደቂቀ እለ ይነብሩ ውስተ ምሥያጥ ወይጼውዑ ቢጾሙ።

¹⁷ ወይብልዎሙ ሐለይነ ለክሙ ወኢዘፈንክሙ አስቈቀውነሂ ለክሙ ወኢበከይክሙ።

¹⁸ እስመ መጽአ ዮሐንስ እንዘ ኢይበልዕ ወኢይሰቲ ወይቤልዎ ጋኔን ቦቱ።

¹⁹ ወመጽአ ወልደ ዕጓለ እመሕያው እንዘ ይበልዕ ወይሰቲ ወይቤልዎ ነዋ ብእሲ በላዒ ወሰታዬ ወይን ዐርከ መጸብሓን ወኃጥኣን። ወጸድቀት ጥበብ እምደቂቃ ወእምግባራ።

ዘከመ ኄሶን ለአህጉር ኢነሳሕያት

²⁰ ወእምዝ አኀዘ እግዚእ ኢየሱስ ይኂሶን ለአህጉር እለ በውስቴቶን ገብረ ኀይለ ብዙኀ እስመ ኢነስሓ።

²¹ ወይቤሎን አሌ ለኪ ኰራዚ አሌ ለኪ ቤተ ሰይዳ ሶበሁ በጢሮስ ወበሲዶና ተገብረ ኀይል ዘተገብረ በውስቴትክን በሠቅ ወበሐመድ እምነስሓ።

²² ወባሕቱ እብለክን ጢሮስ ወሲዶና ይረክባ ሣኅተ አመ ዕለተ ደይን ፈድፋደ እምኔክን።

²³ ወአንቲኒ ቅፍርናሆም ለእመ እስከ ሰማይ ትትሌዐሊ ሀለወኪ እስከ ሲኦል ትረዲ ሶበሁ በሰዶም ተገብረ ኀይል ዘተገብረ በውስቴትኪ እምሀለወት እስከ ዮም።

²⁴ ወባሕቱ እብለኪ ከመ ምድረ ሰዶም ትረክብ ሣኅተ በዕለተ ደይን እምኔኪ።

²⁵ ወይእተ ጊዜ አውሥአ እግዚእ ኢየሱስ ወይቤ አአምነከ አባ እግዚአ ሰማያት ወምድር እስመ ኀባእኮ ለዝንቱ እምጠቢባን ወእማእምራን ወከሠትኮ ለሕፃናት።

²⁶ እወ አባ እስመ ከማሁ ኮነ ሥምረትከ በቅድሜከ።

²⁷ ኵሉ ተውህበኒ እምኀበ አቡየ ወአልቦ ዘየአምሮ ለወልድ ዘእንበለ አብ ወለአብኒ አልቦ ዘየአምሮ ዘእንበለ ወልድ ወለዘፈቀደ ወልድ ይከሥት ሎቱ።

²⁸ ንዑ ኀቤየ ኵልክሙ ስሩሓን ወክቡዳነ ጾር ወአነ አዐርፈክሙ።

²⁹ ንሥኡ አርዑትየ ላዕሌክሙ ወተመሀሩ እምኔየ ወአእምሩ እስመ የዋህ አነ ወትሑት ልብየ ወትረክቡ ዕረፍተ ለነፍስክሙ።

³⁰ እስመ አርዑትየኒ ሠናይ ወጾርየኒ ቀሊል ውእቱ።