ወንጌል ዘሉቃስ 8 - ሐዲስ ኪዳን በልሳነ ግእዝ

ምዕራፍ 8 ዘከመ ዖደ እግዚእ ኢየሱስ አህጉረ ገሊላ

¹ ወእምዝ በሳኒታ አንሶሰወ እግዚእ ኢየሱስ ውስተ አህጉር ወአዕጸዳት ወሰበከ ሎሙ ወመሀሮሙ በእንተ መንግሥተ እግዚአብሔር ወምስሌሁ ዐሠርቱ ወክልኤቱ አርዳኢሁ።

² ወአንስትኒ እለ አሕየዎን እምአጋንንት እኩያን ወእምደዌሆን ወእማንቱ ማርያም እንተ ይብልዋ መግደላዊት እንተ ሰብዐቱ አጋንንት ወፅኡ እምኔሃ።

³ ወዮሐና ብእሲተ ኩዛ መጋቢሁ ለሄሮድስ ወሶስና ወካልኣትሂ ብዙኃት እለ ተልእካሁ በንዋዮን።

በእንተ ምሳሌ ዘርዕ ወዘራዒ

⁴ ወእንዘ ያጸምዕዎ ኵሉ ሕዝብ ወእለሂ መጽኡ ኀቤሁ እምኵሉ አህጉር ይቤሎሙ ምሳሌ እንተ ከመዝ።

⁵ ወፈረ ዘይዘርዕ ከመ ይዝራዕ ዘርዖ ወእንዘ ይዘርዕ ቦ ዘወድቀ ውስተ ፍኖት ወመጽኡ ሰብእ ወኬድዎ ወበልዕዎ አዕዋፈ ሰማይ።

⁶ ወቦ ዘወድቀ ውስተ ኰኵሕ ወበቍሎ የብሰ በጊዜሃ እስመ አልቦ ሥርው።

⁷ ወቦ ዘወድቀ ማእከለ ሦክ ወበቊሎ ጠበቆ ሦክ።

⁸ ወቦ ዘወድቀ ውስተ ምድር ሠናይት ወበቈለሂ ወፈረየሂ ምእተ ምክዕቢተ ወዘንተ ብሂሎ ይቤሎሙ ዘቦ ዕዝን ሰሚዐ ለይስማዕ።

⁹ ወተስእልዎ አርዳኢሁ ወይቤልዎ ምንትኑ ይእቲ ዛቲ ምሳሌ።

¹⁰ ወይቤሎሙ ለክሙ ተውህበ ታእምሩ ምሥጢራ ለመንግሥተ እግዚአብሔር ወለእልክቱሰ በምሳሌ ከመ ርእዮሙኒ ኢይርአዩ ወሰሚዖሙኒ ኢይስምዑ ወኢይለብዉ።

¹¹ ወከመዝ ይእቲ ምሳሌሃ ዘርዕሰ ቃለ እግዚአብሔር ውእቱ።

¹² ወዘሰ ውስተ ፍኖት እሉ እሙንቱ እለ ይሰምዑ ቃለ ወይመጽእ ሰይጣን ወይነሥኦ ለቃል እምልቦሙ ከመ ኢይእመኑ ወኢይሕየዉ።

¹³ ወዘሰ ውስተ ኰኵሕ እለ ሰሚዖሙ ይትዌከፍዎ ለነገር በፍሥሓ ወባሕቱ ሥርው አልቦሙ ለሶቤሃ ዳእሙ የአምኑ ወእምከመ ተመንደቡ የዐልዉ።

¹⁴ ወዘሰ ውስተ ሦክ ወድቀ እሉ እሙንቱ እለ ይሰምዑ ቃለ ወኅሊና ብዕል ወትካዘ መንበርት ወሐውዘ ተድላ ወፈጊዕ ያጠውቆሙ ወኢይገብሩ።

¹⁵ ወዘሰ ውስተ ምድር ሠናይት እሉ እሙንቱ እለ ይሰምዑ ቃለ በሠናይ ልብ ወየዐቅብዎ ወበጥቡዕ ልብ ይትዔገሡ ወያጠብዑ ወይፈርዩ።

¹⁶ ወአልቦ ዘያኀቱ ማኅቶተ ወይከድና ንዋየ ወያነብራ ታሕተ ዐራት ዘእንበለ ዲበ ተቅዋማ ከመ ይርአዩ ብርሃነ እለ ያንሶስዉ።

¹⁷ ወአልቦ ኅቡእ ዘኢይትከሠት ወአልቦ ክዱን ዘኢያስተርኢ ወገሃደ ይከውን።

¹⁸ ወአእምሩ እንከ ዘከመ ትሰምዑ እስመ ለዘቦ ይሁብዎ ወለዘሰ አልቦ እለሂ ቦ የሀይድዎ።

በእንተ እለ ይሰመዩ አኀዊሁ

¹⁹ ወመጽኡ ኀቤሁ እሙ ወአኀዊሁ ወስእኑ ረኪቦቶ እስመ ጽፉቅ ሰብእ።

²⁰ ወይቤልዎ እምከ ወአኀዊከ አፍኣ ይቀውሙ ወይፈቅዱ ይርአዩከ።

²¹ ወአውሥአ ወይቤሎሙ እምየ ወአኀውየ እሉ እሙንቱ እለ ይሰምዑ ቃለ እግዚአብሔር ወይገብሩ።

ዘከመ ገሠጸ ባሕረ

²² ወኮነ በአሐቲ ዕለት ዐርገ ውእቱ ውስተ ሐመር ወአርዳኢሁኒ ወይቤሎሙ ንዑ ንዕዱ ማዕዶተ ቀላይ ወሖሩ።

²³ ወእንዘ የሐውሩ ኖመ ወመጽአ ነፋሰ ዐውሎ ውስተ ባሕር ወመልአ ማየ ሐመሮሙ ወተመንደቡ።

²⁴ ወሖሩ ወአንቅህዎ ወይቤልዎ ኦ ሊቅ አድኀነነ ከመ ኢንሙት ወተንሥአ ወገሠጾሙ ለነፋሳትኒ ወለማዕበለ ባሕርኒ ወአርመሙ ወኮነ ዛኅነ ዐቢየ።

²⁵ ወይቤሎሙ አይቴኑ ሃይማኖትክሙ ወፈርሁ ወአንከሩ ወይቤሉ በበይናቲሆሙ መኑ እንጋ ውእቱ ዝንቱ ዘይትኤዘዙ ሎቱ ባሕርኒ ወነፋሳትኒ።

ዘከመ ፈወሶ እግዚእ ኢየሱስ ለዘቦቱ ጋኔን

²⁶ ወእምዝ ሖረ እግዚእ ኢየሱስ በሐመር ወነገዱ ብሔረ ጌርጌሴኖን ዘአንጻረ ማዕዶተ ገሊላ።

²⁷ ወወሪዶሙ ምድረ ተቀበሎ ብእሲ ዘጋኔን ወፂኦ እምሀገር ወጕንዱይ መዋዕል እምዘኢለብሰ ልብሶ ወኢቦአ ቤተ ዘእንበለ ዳእሙ ይነብር ውስተ መቃብር።

²⁸ ወሶበ ርእዮ ለእግዚእ ኢየሱስ ከልሐ ወሮጸ ወሰገደ ሎቱ ወዐውየወ በዐቢይ ቃል ወይቤ ምንት ብየ ምስሌከ ኢየሱስ ወልደ እግዚአብሔር ልዑል ወአስተብቍዖ ኢይሣቅዮ።

²⁹ እስመ አዘዞ ለውእቱ ጋኔን እኩይ ይፃእ እምላዕለ ውእቱ ብእሲ እስመ ዘልፈ ያአብዶ ወይሞቅሕዎ በመዋቅሕት ወየዐቅብዎ ደቅ ወይሰብር መዋቅሕቲሁ ወያረውጾ ጋኔኑ ውስተ ገዳም።

³⁰ ወተስእሎ እግዚእ ኢየሱስ ወይቤሎ መኑ ስምከ ወይቤሎ ሌጌዎን ስምየ እስመ ብዙኃን አጋንንት አኀዝዎ።

³¹ ወአስተብቍዕዎ ከመ ኢይፈንዎሙ ይረዱ ውስተ ሲኦል።

³² ወቦ ህየ መራዕየ አሕርው ብዙኅ ይትረዐይ ውስተ ደብር ወአስተብቍዕዎ ከመ ያብሖሙ ይባኡ ላእለ አሕርው ወአብሖሙ።

³³ ወወፂኦሙ እሙንቱ አጋንንት እምላዕለ ውእቱ ብእሲ ቦኡ ላዕለ አሕርው ወአብዱ ኵሉ መራዕየ አሕርው ወወድቁ እንተ ጸድፍ ወውስተ ቀላይ ወሞቱ።

³⁴ ወርእዮሙ ኖሎት ዘኮነ ጐዩ ወሖሩ ወአተዉ ወዜነዉ ለአህጉር ወለአዕጻዳት።

³⁵ ወወፅኡ ሰብእ ከመ ይርአዩ ዘኮነ ወሖሩ ወበጽሑ ኀበ እግዚእ ኢየሱስ ወረከብዎ ለውእቱ ብእሲ ዘወፅኡ እምኔሁ አጋንንት እንዘ ይነብር ኀበ እገሪሁ ለእግዚእ ኢየሱስ ወልቡሰ ልብሶ ወገብኦ ልቡ ወፈርሁ።

³⁶ ወነገርዎሙ እለሂ ርእዩ ዘከመ ሐይወ ዘጋኔን።

³⁷ ወአስተብቍዕዎ ኵሎሙ ሰብአ አድያም ዘጌርጌሴኖን ወይቤልዎ ከመ ይሑር እምኀቤሆሙ እስመ ፍርሀት ዐቢይ አኀዞሙ ወዐርገ እግዚእ ኢየሱስ ሐመረ ወተመይጠ።

³⁸ ወአስተብቍዖ ለእግዚእ ኢየሱስ ውእቱ ብእሲ ዘወፅኡ እምኔሁ አጋንንት ከመ ይሑር ምስሌሁ ወፈነዎ ወይቤሎ።

³⁹ እቱ ቤተከ ወንግር ኵሎ ዘገብረ ለከ እግዚአብሔር ወሖረ ውስተ ኵሉ አህጉር ወነገረ ኵሎ ዘገብረ ሎቱ እግዚእ ኢየሱስ።

⁴⁰ ወሶበ ተመይጠ እግዚእ ኢየሱስ ተቀበልዎ ሕዝብ ኅቡረ እስመ ኮኑ ኵሎሙ ይጸንሕዎ።

በእንተ ወለተ ኢያኢሮስ ወበእንተ እንተ ደም ይውኅዛ

⁴¹ ወመጽአ ብእሲ ዘስሙ ኢያኢሮስ ወውእቱ መጋቤ ምኵራብ ወሰገደ ሎቱ ታሕተ እገሪሁ ለእግዚእ ኢየሱስ ወአስተብቍዖ ይባእ ቤቶ።

⁴² እስመ ቦቱ አሐቲ ወለት ዘዐሠርቱ ወክልኤቱ ክረምታ ወይእቲ አልጸቀት ትሙት።

⁴³ ወእምዝ እንዘ የሐውር ምስሌሁ እግዚእ ኢየሱስ ይትጋፍዕዎ ሰብእ ወመጽአት ብእሲት እንተ ደም ይውኅዛ እምዐሠርቱ ወክልኤቱ ክረምት ወአኅለቀት ኵሎ ንዋያ ለዐቀበተ ሥራይ ወአልቦ ዘክህለ ፈውሶታ።

⁴⁴ ወቀርበት ወቆመት እንተ ድኅሬሁ ለእግዚእ ኢየሱስ ወገሠሠት ጽንፈ ልብሱ ወቆመ ሶቤሃ ውኅዘተ ደማ፤

⁴⁵ ወይቤ እግዚእ ኢየሱስ መኑ ገሠሠኒ ወክሕዱ ኵሎሙ ወይቤልዎ ጴጥሮስ ወእለሂ ምስሌሁ ሊቅ አኮኑ ሰብእ ይጣወቅ ወይጻዐቀከ ወትብል መኑ ገሠሠኒ።

⁴⁶ ወይቤሎሙ እግዚእ ኢየሱስ ቦ ዘገሠሠኒ እስመ አነ አአምር ከመ ኀይል ወፅአ እምኔየ።

⁴⁷ ወርእያ ይእቲ ብእሲት ከመ ኢተከብተ ላቲ ርዕደት ወሖረት ወሰገደት ሎቱ ወነገረት በቅድመ ኵሉ ሕዝብ ዘከመ ሐይወት ሶቤሃ።

⁴⁸ ወይቤላ እመኒ ወለትየ ሃይማኖትኪ አሕየወተኪ እትዊ በሰላም።

⁴⁹ ወእንዘ ዘንተ ይትናገር መጽአ አሐዱ ብእሲ እምቤተ መጋቤ ምኵራብ ወይቤሎ ወለትከሰ ሞተት ወኢታጻምዎ እንከ ለሊቅ።

⁵⁰ ወሰሚዖ እግዚእ ኢየሱስ ይቤሎ ለመጋቤ ምኵራብ ኢትፍራህ ዳእሙ ተአመን ወለትከሰ ተሐዩ።

⁵¹ ወበዊኦ ቤተ ከልአ ባዕደ ኢይባእ ምስሌሁ ወኢመኑሂ ዘእንበለ ጴጥሮስ ወያዕቆብ ወዮሐንስ ወአቡሃ ወእማ ለሕፃን።

⁵² ወኵሎሙ ይበክዩ ወያስቈቅውዋ ወይቤሎሙ እግዚእ ኢየሱስ ኢትብክዩ ሕፃንሰ ኢሞተት አላ ትነውም።

⁵³ ወሰሐቅዎ እስመ አእመሩ ከመ ሞተት።

⁵⁴ ወአውፅአ አፍኣ ኵሎ ወአኀዛ እዴሃ ወጸውዓ ወይቤላ ተንሥኢ ወለትየ።

⁵⁵ ወሶቤሃ ገብአ ነፍሳ ወተሰውጠ መንፈሳ ላዕሌሃ ወተንሥአት ሶቤሃ ወአዘዘ የሀብዋ ዘትበልዕ።

⁵⁶ ወደንገፁ አቡሃ ወእማ ወከልኦሙ ኢይንግሩ ወኢለመኑሂ ዘኮነ።