ወንጌል ዘሉቃስ 7 - ሐዲስ ኪዳን በልሳነ ግእዝ

ምዕራፍ 7 በእንተ ወዓሊ ዘመስፍን

¹ ወፈጺሞ ነጊሮቶሙ ቃሎ ለሕዝብ ቦአ ቅፍርናሆም።

² ወሀሎ አሐዱ መስፍን ወገብሩ ይደዊ ወአልጸቀ ይሙት ወክቡር ውእቱ በኀቤሁ።

³ ወሰሚዖ በእንተ እግዚእ ኢየሱስ ለአከ ኀቤሁ ረበናተ አይሁድ ያስተብቍዕዎ ከመ ይምጻእ ወያሕዩ ሎቱ ቍልዔሁ።

⁴ ወመጽኡ ኀበ እግዚእ ኢየሱስ ወአስተብቍዕዎ ወይቤልዎ ፍጡነ ረድ እስመ ይደልዎ ትግበር ሎቱ ዘንተ።

⁵ እስመ ያፈቅር ሕዝበነ ወምኵራበነኒ ውእቱ ሐነጸ ለነ።

⁶ ወሖረ እግዚእ ኢየሱስ ምስሌሆሙ ወአልጺቆ ኀበ ቤቱ ለአከ አዕርክቲሁ ውእቱ መስፍን ኀቤሁ እንዘ ይብል እግዚኦ ኢትጻሙ እስመ ኢይደልወኒ ከመ ትባእ ታሕተ ጠፈረ ቤትየ።

⁷ ወለልየኒ ኢይደልወኒ እምጻእ ኀቤከ ወባሕቱ አዝዝ በቃልከ ወየሐዩ ቍልዔየ።

⁸ እስመ አነሂ ብእሲ መኰንን አነ ወብየ ወዐልት ወእብሎ ለዝ ሑር ወየሐውር ወለካልኡ ነዓ ወይመጽእ ወለገብርየኒ ግበር ከመዝ ወይገብር።

⁹ ወሰሚዖ እግዚእ ኢየሱስ ዘንተ እምኔሁ አንከሮ ወተመዪጦ ይቤሎሙ ለሕዝብ እለ ተለውዎ ኢረከብኩ ዘከመዝ ዘይትአመን በውስተ እስራኤል።

¹⁰ ወአቲዎሙ እለ ተፈነዉ ረከብዎ ለገብሩ በዘሐይወ።

በእንተ ወልደ መበለት

¹¹ ወበሳኒታ ሖረ ሀገረ እንተ ስማ ናይን ወሖሩ ምስሌሁ አርዳኢሁ ወሕዝብኒ ብዙኅ።

¹² ወበጺሖ ኀበ አንቀጸ ሀገር ረከበ ቀበረ ፅዉረ ዘወልደ ብእሲት መበለት ወውእቱ አሐዱ ለእሙ ወብዙኃን ሰብአ ሀገር ምስሌሃ።

¹³ ወሶበ ርእያ እግዚእነ መሐራ ወተሣህላ ወይቤላ ኢትብክዪ።

¹⁴ ወቀርበ ወአኀዘ ነፍቆ ወቆሙ እለ ይጸውርዎ ወይቤሎ ለከ እብለከ ወሬዛ ተንሥእ።

¹⁵ ወተንሥአ ውእቱ በድን ወነበረ ወተናገረ ርቱዐ ወአወፈዮ ለእሙ።

¹⁶ ወፈርሁ ኵሎሙ ወሰብሕዎ ለእግዚአብሔር ወይቤሉ ዐቢይ ነቢይ ተንሥአ ለነ ወተሣሀሎሙ እግዚአብሔር ለሕዝቡ።

¹⁷ ወተሰምዐ ዝንቱ ነገር በኵሉ በሓውርተ ይሁዳ ወበኵሉ አድያሚሃ በእንቲኣሁ።

በእንተ እለ ተፈነዉ እምኀበ ዮሐንስ

¹⁸ ወነገርዎ አርዳኢሁ ለዮሐንስ ዘንተ ኵሎ።

¹⁹ ወጸውዐ ዮሐንስ ክልኤተ እምአርዳኢሁ ወለአኮሙ ኀበ እግዚእ ኢየሱስ ወይቤ አንተኑአ ዘይመጽእ ወሚመ ቦኑ ካልእ ዘንሴፎ።

²⁰ ወበጺሖሙ እለ ለአኮሙ ኀቤሁ ይቤልዎ ዮሐንስ መጥምቅ ለአከነ ኀቤከ ወይቤ አንተኑአ ዘይመጽእ ወቦኑ ካልእ ዘንሴፎ።

²¹ ወፈወሶሙ ለብዙኃን ሶቤሃ እምደዌሆሙ ወእምሕማሞሙ ወእምአጋንንት እኩያን ወለብዙኃን ዕዉራን ጸገዎሙ ብርሃነ ይርአዩ።

²² ወአውሥአ እግዚእ ኢየሱስ ወይቤሎሙ ሑሩ ንግርዎ ለዮሐንስ ዘሰማዕክሙ ወዘርኢክሙ ዕዉራን ይሬእዩ ወስቡራን የሐውሩ ወእለ ለምጽ ይነጽሑ ወጽሙማን ይሰምዑ ወምዉታን ይትነሥኡ ወነዳያን ይዜነዉ ወይትፌሥሑ።

²³ ወብፁዓን እለ ኢይትዐቀፉ ብየ።

ዘከመ ወደሶ እግዚእ ኢየሱስ ለዮሐንስ መጥምቅ

²⁴ ወኀሊፎሙ አርዳኢሁ ለዮሐንስ አኀዘ ይበሎሙ ለሕዝብ በእንተ ዮሐንስ መጥምቅ ምንተኑ ወፃእክሙ ገዳመ ትርአዩ ብርዐኑ ዘይትሐወስ እምነፋስ።

²⁵ ወምንተኑመ ወፃእክሙ ትርአዩ ብእሴኑ ዘርሡይ በቀጠንተ አልባስ ናሁ እለሰ ርሡያን በአልባሰ ክብር ውስተ አብያተ ነገሥት ሀለዉ፤

²⁶ ወምንተኑመ ወፃእክሙ ትርአዩ ነቢየኑ እወ እብለክሙ የዐቢ እምነቢይ።

²⁷ ዝውእቱ ዘበእንቲአሁ ተጽሕፈ «ናሁ አነ እፌኑ መልአኪየ ቅድመ ገጽከ ዘይጸይሕ ፍኖተከ በቅድሜከ።»

²⁸ አማን እብለክሙ ኢተንሥአ እምትውልደ አንስት ዘየዐቢ እምዮሐንስ መጥምቅ ወኢመኑሂ ወበመንግሥተ እግዚአብሔርሰ ዘይንእሶ የዐብዮ።

²⁹ ወሰሚዖሙ ኵሎሙ ሕዝብ ወመጸብሓን አጽደቅዎ ለእግዚአብሔር እስመ ተጠምቁ ጥምቀተ ዮሐንስ።

³⁰ ወፈሪሳውያንሰ ወጸሐፍተ ሕግ ዐለዉ ትእዛዘ እግዚአብሔር ወኢተጠምቁ በኀቤሁ።

³¹ በምንት አስተማስሎሙ ለሰብአ ዛቲ ትውልድ ወመነ ይመስሉ።

³² ይመስሉ ደቂቀ እለ ይነብሩ ውስተ ምሥያጥ ወይጼውዑ ቢጾሙ ወይብልዎሙ ሐለይነ ለክሙ ወኢዘፈንክሙ አስቈቀውነሂ ለክሙ ወኢበከይክሙ።

³³ እስመ መጽአ ዮሐንስ መጥምቅ ኢይበልዕ እክለ ወኢይሰቲ ወይነ ወትቤልዎ ጋኔን ቦቱ።

³⁴ ወመጽአ ወልደ ዕጓለ እመሕያው ይበልዕ ወይሰቲ ወትቤሉ ነዋ ብእሲ በላዒ ወሰታዬ ወይን ዐርከ መጸብሓን ወኃጥኣን።

³⁵ ወጸድቀት ጥበብ እምኵሉ ውሉዳ።

በእንተ ፈሪሳዊ ወኃጥእት ብእሲት

³⁶ ወይቤሎ አሐዱ እምፈሪሳውያን ከመ ይምሳሕ በኀቤሁ ወቦአ ቤተ ፈሪሳዊ ወረፈቀ።

³⁷ ወናሁ መጽአት ብእሲት ኃጥእት እምሰብአ ይእቲ ሀገር አእሚራ ከመ ይመስሕ ውስተ ቤተ ፈሪሳዊ ወተሣየጠት ዕፍረተ ዘአልባጥሮስ።

³⁸ ወቆመት ድኅሬሁ ኀበ እገሪሁ ወበከየት ወአርሐሰት እገሪሁ በአንብዓ ወትመዘምዝ በሥዕርተ ርእሳ ወትስዕም እገሪሁ ወትቀብዖ ዕፍረተ።

³⁹ ወርእዮ ፈሪሳዊ ዘጸውዖ ኀለየ በልቡ ወይቤ ሶበሁ ነቢይ ውእቱ ዝንቱ እምኢያእመረኑ ከመ ምንት ዛቲ ብእሲት ወዘከመ እፎ ይእቲ እንተ ትገሥሦ እስመ ኃጥእት ይእቲ።

⁴⁰ ወአውሥአ እግዚእ ኢየሱስ ወይቤሎ ስምዖን ብየ ዘእብለከ ወይቤሎ ሊቅ በል።

⁴¹ ወይቤሎ ክልኤቱ ይፈድይዎ ለአሐዱ በዓለ ዕዳ አሐዱ ይፈድዮ ኀምስተ ምእተ ዲናረ ወካልኡኒ ኀምሳ።

⁴² ወኀጢኦሙ ዘይፈድይዎ ኀደገ ሎሙ ለክልኤሆሙ መኑ እንከ ርቱዕ ፈድፋደ ያፈቅሮ እምኔሆሙ።

⁴³ ወተሰጥወ ስምዖን ወይቤሎ እብልሰ ዘብዙኀ ኀደገ ሎቱ ወይቤሎ ሠናየ ፈታሕከ።

⁴⁴ ወተመይጠ ኀበ ይእቲ ብእሲት ወይቤሎ ለስምዖን ትሬእያኑ ለዛቲ ብእሲት ቦእኩ ቤተከ ወኢወሀብከኒ ማየ ጥቀ ለእገርየ ወይእቲሰ በከየት ወበአንብዓ አርሐሰት እገርየ ወበሥዕርታ መዝመዘተኒ።

⁴⁵ ወአንተሰ ኢተአማኅከኒ ወይእቲሰ እምዘቦእኩ ኢያንተገት ስዒመ እገርየ።

⁴⁶ ወአንተሰ ኢቀባዕከኒ በዘይት ርእስየ ወይእቲሰ ዕፍረተ ቀብዐተኒ እገርየ።

⁴⁷ በእንተ ዝንቱ እብለከ ተኀድገ ላቲ ኀጢአታ ብዙኅ እስመ ብዙኀ አፍቀረተኒ ወዘሰ ውኁደ አፍቀረኒ ውኁድ ይትኀደግ ሎቱ ወዘሰ ብዙኀ አፍቀረኒ ብዙኅ ይትኀደግ ሎቱ።

⁴⁸ ወይቤላ ለይእቲ ብእሲት ተኀድገ ለኪ ኀጢአትኪ።

⁴⁹ ወአኀዙ እለ ይረፍቁ ይበሉ በበይናቲሆሙ መኑ ውእቱ ዝንቱ ዘየኀድግ ኀጢአተ።

⁵⁰ ወይቤላ ለይእቲ ብእሲት ሃይማኖትኪ አድኀነተኪ እትዊ በሰላም።