ወንጌል ዘሉቃስ 6 - ሐዲስ ኪዳን በልሳነ ግእዝ

ምዕራፍ 6 በእንተ ሰንበት

¹ ወእምዝ ካዕበ ወፈረ እግዚእ ኢየሱስ እንተ ገራውህ በሰንበት ወመሐዉ አርዳኢሁ ሰዊተ ወሐሰዩ በእደዊሆሙ ወበልዑ።

² ወይቤልዎሙ ፈሪሳውያን ለምንት ትገብሩ ዘኢይከውን ለገቢር በሰንበት።

³ ወአውሥአ እግዚእ ኢየሱስ ወይቤሎሙ ኢያንበብክሙኑ ዘገብረ ዳዊት አመ ርኅበ ውእቱሂ ወእለ ምስሌሁ።

⁴ ዘከመ ቦአ ቤተ እግዚአብሔር ወነሥአ ኅብስተ ቍርባን ዘይሠርዑ ወበልዐ ውእቱኒ ወወሀቦሙ ለእለ ምስሌሁ ዘኢይከውኖሙ ለበሊዕ ዘእንበለ ለካህናት ለባሕቲቶሙ።

⁵ ወይቤሎሙ እግዚኣ ውእቱ ለሰንበት ወልደ ዕጓለ እመሕያው።

በእንተ ዘየብሰት እዴሁ

⁶ ወእምዝ በካልእት ሰንበት ቦአ ምኵራበ ወመሀሮሙ ወሀሎ ብእሲ ዘየብሰት እዴሁ እንተ የማን።

⁷ ወይትዐቀብዎ ጸሐፍት ወፈሪሳውያን ለእመ ይፌውሶ በሰንበት ከመ ይርከቡ ምክንያተ በዘያስተዋድይዎ።

⁸ ወውእቱሰ የአምሮሙ ዘይኄልዩ ወይቤሎ ለውእቱ ብእሲ ዘየብሰት እዴሁ ተንሥእ ወቁም ማእከለ ወተንሥአ ወቆመ።

⁹ ወይቤሎሙ እግዚእ ኢየሱስ እሴአለክሙ ዘይከውን በሰንበት ገቢረ ሠናይኑ አው ገቢረ እከይ አሕይዎ ነፍስኑ ወሚመ ቀቲል።

¹⁰ ወአርመሙ ወነጺሮ ኀበ ኵሎሙ በመዐት ይቤሎ ለውእቱ ብእሲ ስፋሕ እዴከ ወሰፍሐ ወሐይወት እዴሁ ወኮነት ከመ ካልእታ።

¹¹ ወእሙንቱሰ የአብዱ ፈድፋደ ወተማከሩ በበይናቲሆሙ ዘከመ ይሬስይዎ ለእግዚእ ኢየሱስ።

ዘከመ ኀረዮሙ ለዐሠርቱ ወክልኤቱ ሐዋርያት

¹² ወእምዝ ኮነ በውእቱ መዋዕል ዐርገ እግዚእ ኢየሱስ ውስተ ደብር ይጸሊ ወያሌሊ በጸሎት ኀበ እግዚአብሔር ።

¹³ ወጸቢሖ ጸውዖሙ ለአርዳኢሁ ወኀረየ እምውስቴቶሙ ዐሠርተ ወክልኤተ ወሰመዮሙ ሐዋርያተ።

¹⁴ ስምዖን ዘተሰምየ ጴጥሮስ ወእንድርያስ እኁሁ ወያዕቆብ ወዮሐንስ ወፊልጶስ ወበርተሎሜዎስ።

¹⁵ ወማቴዎስ ወቶማስ ወያዕቆብ ወልደ እልፍዮስ ወስምዖን ዘይብልዎ ቀናኢ።

¹⁶ ወይሁዳ ዘያዕቆብ ወይሁዳ አስቆሮታዊ ዘዐለዎ ወዘአግብኦ።

¹⁷ ወወረደ ምስሌሆሙ ወቆመ በገዳም ርሒብ ወብዙኃን ሰብእ እምአርዳኢሁኒ ወብዙኃን ጥቀ እምሕዝብ ዘእምኵሉ ይሁዳ ወእምኢየሩሳሌም ወእምጰራልያስ ወእምጢሮስ ወሲዶና እለ መጽኡ ይስምዕዎ ወይትፈወሱ እምደዌሆሙ።

¹⁸ ወእለሂ አጋንንት እኩያን የሐይዉ።

¹⁹ ወኵሎሙ አሕዛብ ይፈቅዱ ይግሥሥዎ እስመ ኀይል ይወፅእ እምኔሁ ወያሐይዎሙ ለኵሎሙ።

በእንተ ስብከቱ በውስተ ደብር

²⁰ ወውእቱሰ አንሥአ አዕይንቲሁ ኀበ አርዳኢሁ ወይቤሎሙ ብፁዓን አንትሙ ነዳያን እስመ ለክሙ ይእቲ መንግሥተ እግዚአብሔር።

²¹ ብፁዓን እለ ትርኅቡ ይእዜ እስመ ትጸግቡ ብፁዓን እለ ትበክዩ ይእዜ እስመ ትስሕቁ።

²² ብፁዓን አንትሙ ሶበ ይጸልኡክሙ ሰብእ ወይፈልጡክሙ ወይሰድዱክሙ ወይጼእሉክሙ ወያወፅኡ ለክሙ ስመ እኩየ በእንተ ወልደ ዕጓለ እመሕያው።

²³ ተፈሥሑ ወተሐሠዩ ይእተ አሚረ ወአንፈርዕጹ እስመ ብዙኅ ዕሴትክሙ በሰማያት እስመ ከማሁ ረሰይዎሙ ለነቢያት አበዊሆሙ።

²⁴ ወባሕቱ አሌ ለክሙ አብዕልት እስመ ሰለጥክሙ ትፍሥሕተክሙ።

²⁵ አሌ ለክሙ እለ ትጸግቡ ይእዜ እስመ ትርኅቡ አሌ ለክሙ እለ ትስሕቁ ይእዜ እስመ ትበክዩ ወትላሕዉ።

²⁶ አሌ ለክሙ ሶበ ሠናየ ይብሉ ሰብእ ላዕሌክሙ ወይዌድሱክሙ እስመ ከማሁ ረሰይዎሙ ለነቢያተ ሐሰት አበዊሆሙ።

²⁷ ወለክሙሰ ለእለ ትሰምዑኒ እብለክሙ አፍቅሩ ጸላእተክሙ ወግበሩ ሠናየ ለእለ ይፃረሩክሙ።

²⁸ ወደኀርዎሙ ለእለ ይረግሙክሙ ወጸልዩ ዲበ እለ ይትዔገሉክሙ።

²⁹ ወለዘሂ ጸፍዐከ መልታሕቴከ መጥዎ ካልእታኒ ወለዘኒ ነሥአከ ልብሰከ ክዳነከሂ ኢትክልኦ።

³⁰ ለኵሉ ዘሰአለከ ሀብ ወለዘኒ ሄደከ ንዋየከ ኢትትኃሠሦ።

³¹ ወበከመ ትፈቅዱ ይግበሩ ለክሙ ሰብእ ከማሁ ግበሩ ሎሙ አንትሙኒ።

³² ወእመሰ ዳእሙ ዘአፍቀረክሙ አፍቀርክሙ ምንትኑ እንከ ዕሴትክሙ ኃጥኣንሂ ዘሰ ይገብሩ ወዘያፈቅሮሙ ያፈቅሩ።

³³ ወእመኒ አሠነይክሙ ለእለ ያሤንዩ ለክሙ ምንትኑ እንከ ዕሴትክሙ ኃጥኣንሂ ከማሁሰ ይገብሩ።

³⁴ ወእመኒ ለቃሕክሙ እምኀበ ዘትሴፈዉ ትትፈደዩ እምኔሁ ምንትኑ እንከ ዕሴትክሙ ኃጥኣንሂ ይሌቅሕዎሙ ለኃጥኣን ከመ ይትፈደይዎሙ ዕሩየ።

³⁵ ወይእዜኒ አፍቀሩ ጸላእተክሙ ወአሠንዩ ሎሙ ወለቅሑ እንዘ ኢትሴፈዉ ትትፈደዩ ወይከውን ብዙኀ ዕሴትክሙ ወትከውኑ ውሉዶ ለልዑል እስመ ውእቱ ኄር ላዕለ ኄራን ወላዕለ እኩያን።

³⁶ ወኩኑ መሓርያነ ከመ አቡክሙ ሰማያዊ መሓሪ ውእቱ።

³⁷ ኢትኰንኑ ወኢትትኴነኑ ኢትግፍዑ ወኢይገፍዑክሙ ኅድጉ ወየኀድጉ ለክሙ።

³⁸ ሀቡ ወይትወሀበክሙ መስፈርተ ሠናየ ንሕኑሐ ወምሉአ ወዝሕዙሐ ይሁቡክሙ ውስተ ሕፅንክሙ ወበመስፈርት ዘሰፈርክሙ ይሰፍሩ ለክሙ።

³⁹ ወመሰለ ሎሙ ወይቤሎሙ ይክልኑ ዕዉር ለዕዉር መሪሖቶ አኮኑ ክልኤሆሙ ይወድቁ ውስተ ግብ።

⁴⁰ አልቦ ረድእ ዘየዐቢ እምሊቁ መጠኑ ለኵሉ ይኩን ከመ ሊቁ።

⁴¹ ምንተኑ ትኔጽር ሐሠረ ዘውስተ ዐይነ ቢጽከ ወኢትሬኢ ሠርዌ ዘውስተ ዐይንከ።

⁴² ወእፎ ትክል ብሂሎቶ ለቢጽከ ተዐገሥ እኁየ አውፅእ ሐሠረ እምዐይንከ ወአንተሰ ኢትሬኢ ሠርዌ ዘውስተ ዐይንከ ኦ መደልው አውፅእ ቅድመ ሠርዌ እምዐይንከ ወእምዝ ትኔጽር ታውፅእ ሐሠረ እምዐይነ ቢጽከ።

⁴³ አልቦ ዕፅ ሠናይ ዘይፈሪ ፍሬ እኩየ ወአልቦ ዕፅ እኩይ ዘይፈሪ ፍሬ ሠናየ።

⁴⁴ ወኵሉ ዕፅ እምፍሬሁ ይትዐወቅ ወኢየአርሩ በለሰ እም አሥዋክ ወኢይቀሥሙ አስካለ እምአሜከላ።

⁴⁵ ኄር ብእሲ እምሠናይ መዝገበ ልቡ ያወፅኣ ለሠናይት ወእኩይሰ ብእሲ እምእኩይ መዝገበ ልቡ ያወፅኣ ለእኪት እስመ እምተረፈ ልብ ይነብብ አፍ።

⁴⁶ ለምንት እንከ ትብሉኒ እግዚኦ እግዚኦ ወኢትገብሩ ዘእቤለክሙ።

⁴⁷ ኵሉ ዘይመጽእ ኀቤየ ወይሰምዐኒ ቃልየ ወይገብሮ አርእየክሙ ዘይመስል።

⁴⁸ ይመስል ብእሴ ጠቢበ ዘሐነጸ ቤቶ ወከረየ ወአዕመቀ ወሣረረ መሠረቶ ዲበ ኰኵሕ ወብዙኃን አፍላግ መጺኦሙ ገፍዕዎ ወኀይዝት ለውእቱ ቤት ወስእኑ አንቀልቅሎቶ እስመ ዲበ ኰኵሕ ተሣረረ።

⁴⁹ ወዘሰ ይሰምዐኒ ቃልየ ወኢይገብሮ ይመስል ብእሴ ዘሐነጸ ቤቶ መልዕልተ ምድር ዘእንበለ መሠረት ወገፍዕዎ ወኀይዝት ወወድቀ ሶቤሃ ወኮነ ድቀቱ ለውእቱ ቤት ዐቢየ።