ወንጌል ዘሉቃስ 3 - ሐዲስ ኪዳን በልሳነ ግእዝ

ምዕራፍ 3 በእንተ ስብከት ዘዮሐንስ መጥምቅ

¹ ወአመ ዐሠርቱ ወኀምስቱ ዓመተ መንግሥቱ ለጢባርዮስ ቄሳር እንዘ ጲላጦስ ጰንጤናዊ መልአከ ይሁዳ ወሄሮድስ ንጉሥ ላዕለ ገሊላ ወፊልጶስ እኁሁ መልአከ ኢጡርያስ ወለብሔረ ጥራኮኒዶስ ወሊሳንዩስ ሀቢ እንተ ሳብላኔስ።

² ወአመ ሐና ወቀያፋ ሊቃነ ካህናት መጽአ ቃለ እግዚአብሔር ላዕለ ዮሐንስ ወልደ ዘካርያስ በገዳም።

³ ወዖደ አድያመ ዮርዳኖስ ወሰበከ ጥምቀተ ለንስሓ በዘይትኀደግ ኀጢአት።

⁴ በከመ ይብል ቃለ መጽሐፈ ኢሳይያስ ነቢይ ዘይቤ፤ «ናሁ ቃለ ዐዋዲ ዘይሰብክ በገዳም ወይብል ጺሑ ፍኖተ እግዚአብሔር ወዐርዩ መጽያሕቶ።

⁵ ኵሉ ማዕምቅ ይምላእ ወኵሉ ደብር ወወግር ይተሐት ወይኩን መብእስ መጽያሕተ ርቱዐ ወይዕሪ ፍኖት መብእስ።

⁶ ወይርአይ ኵሉ ዘነፍስ አድኅኖቶ ለእግዚአብሔር።»

⁷ ወይቤሎሙ ዮሐንስ ለሕዝብ እለ መጽኡ ኀቤሁ ያጥምቆሙ ኦ ትውልደ ሰበድዓት መኑ ነገረክሙ ታምሥጡ እመቅሠፍት ዘይመጽእ።

⁸ ግበሩ እንከ ፍሬ ዘይደልወክሙ ለንስሓ ወኢይምሰልክሙ በብሂለ ሀሎ አቡነ አብርሃም እብለክሙ ከመ ይክል እግዚአብሔር አንሥኦ ውሉድ ለአብርሃም እምእላንቱ አእባን።

⁹ እስመ ናሁ ወድአ ተሠይመ ጕድብ ኀበ ጕንደ ዕፀው ወለኵሉ ዕፅ ዘኢይፈሪ ፍሬ ሠናየ ይገዝምዎ ወውስተ እሳት ይወድይዎ።

በእንተ እለ ተስእልዎ ለዮሐንስ

¹⁰ ወተስእልዎ ሕዝብ ወይቤልዎ ምንተ ንግበር።

¹¹ ወአውሥአ ወይቤሎሙ ዘቦ ክልኤ ልብስ ኪዳናት የሀብ ለዘአልቦ ወዘሂቦ እክል ከማሁ ይግበር።

¹² ወመጽኡ መጸብሓንሂ ያጥምቆሙ ወተስእልዎ ወይቤልዎ ሊቅ ምንተ ንግበር።

¹³ ወይቤሎሙ አልቦ ዘትገብሩ ፈድፋደ እምዘተአዘዝክሙ።

¹⁴ ወተስእልዎ ሐራሂ ወይቤልዎ ንሕነኬ ምንተ ንግበር ወይቤሎሙ ኢትትዐገሉ ወኢመነሂ ወኢትሂዱ አላ ንበሩ በበሲሳይክሙ።

¹⁵ ወኀለዩ ኵሉ ሕዝብ በልቦሙ ወመሰሎሙ ዮሐንስ ከመ ውእቱ ክርስቶስ።

¹⁶ ወአውሥአ ዮሐንስ ወይቤሎሙ ለኵሎሙ አንሰ አጠምቀክሙ በማይ ወይመጽእ ዘይጸንዐኒ ዘኢይደልወኒ እፍታሕ ቶታነ አሣእኒሁ ወውእቱ ያጠምቀክሙ በመንፈስ ቅዱስ ወበእሳት።

¹⁷ ዘመሥኤ ውስተ እዴሁ ወያነጽሕ ዐውደ እክሉ ወያስተጋብእ ሥርናዮ ውስተ መዛግብቲሁ ወሐሠሮሰ ያውዒ በእሳት ዘኢይጠፍእ።

¹⁸ ወቦ ባዕድኒ ብዙኅ ዘመሀሮሙ ለሕዝብ ወገሠጾሙ።

ዘከመ ተሞቅሐ ዮሐንስ መጥምቅ

¹⁹ ወኮነ ዮሐንስ ይጌሥጾ ለሄሮድስ ወይዘልፎ በእንተ ሄሮድያዳ ብእሲተ ፊልጶስ እኁሁ ወበእንተ ኵሉ እኩይ ዘገብረ ሄሮድስ።

²⁰ ወዓዲ ወሰከ እንበይነ ዝኒ ተቀየሞ ለዮሐንስ ወዐጸዎ ውስተ ቤተ ሞቅሕ።

በእንተ ጥምቀቱ ለእግዚእነ ኢየሱስ

²¹ ወእምድኅረ ተጠምቁ ኵሉ ሕዝብ ተጠምቀ እግዚእ ኢየሱስኒ።

²² ወእንዘ ይጼሊ ተርኅወ ሰማይ ወወረደ መንፈስ ቅዱስ ላዕሌሁ በአምሳለ ሥጋ ርእየተ ርግብ ጸዓዳ ወመጽአ ቃል እምሰማይ ዘይብል አንተ ውእቱ ወልድየ ዘአፈቅር ወኪያከ ሠመርኩ።

በእንተ መጽሐፈ ትውልድ ዘኢየሱስ

²³ ወየአክል ሠላሳ ክረምቱ ለእግዚእ ኢየሱስ ወይመስሎሙ ወልደ ዮሴፍ ውእቱ።

²⁴ ወልደ ዔሊ ወልደ ማቲ ወልደ ሌዊ ወልደ ሜልኪ ወልደ ዮና ወልደ ዮሴፍ።

²⁵ ወልደ ማታትዩ ወልደ አሞጽ ወልደ ናሆም ወልደ ኤስሎም ወልደ ናጌ።

²⁶ ወልደ ማአት ወልደ ማታትዩ ወልደ ሴሜይ ወልደ ዮሴፍ ወልደ ዮዳ።

²⁷ ወልደ ዮናን ወልደ ሬስ ወልደ ዘሩባቤል ወልደ ሰላትያል ወልደ ኔሪ።

²⁸ ወልደ ሜልኪ ወልደ ሐዲ ወልደ ዮሳ ወልደ ቆሳም ወልደ ኤልሞዳም ወልደ ኤር።

²⁹ ወልደ ዮሴዕ ወልደ አልዓዛር ወልደ ዮራም ወልደ ማጣት ወልደ ሌዊ።

³⁰ ወልደ ስምዖን ወልደ ይሁዳ ወልደ ዮሴፍ ወልደ ዮናን ወልደ ኤልያቄም።

³¹ ወልደ ሜልያ ወልደ ማይናን ወልደ ማጣት ወልደ ናታን ወልደ ዳዊት።

³² ወልደ ዕሤይ ወልደ ኢዮቤድ ወልደ ቦዔዝ ወልደ ሰልሞን ወልደ ነአሶን።

³³ ወልደ አሚናዳብ ወልደ አራም ወልደ ኦርኒ ወልደ ኤስሮም ወልደ ፋሬስ ወልደ ይሁዳ።

³⁴ ወልደ ያዕቆብ ወልደ ይስሐቅ ወልደ አብርሃም ወልደ ታራ ወልደ ናኮር።

³⁵ ወልደ ሴሩኅ ወልደ ራግው ወልደ ፋሌቅ ወልደ ኤቦር ወልደ ሳላ።

³⁶ ወልደ ቃይንም ወልደ አርፋክስድ ወልደ ሴም ወልደ ኖኅ ወልደ ላሜሕ።

³⁷ ወልደ ማቱሳላ ወልደ ሄኖክ ወልደ ያሬድ ወልደ መላልኤል ወልደ ቃይናን።

³⁸ ወልደ ሄኖስ ወልደ ሴት ወልደ አዳም ወልደ እግዚአብሔር።