ወንጌል ዘሉቃስ 2 - ሐዲስ ኪዳን በልሳነ ግእዝ

ምዕራፍ 2 በእንተ ተጽሕፎተ ሕዝብ

¹ ወኮነ በውእቱ መዋዕል ወፅአ ትእዛዝ እምኀበ አውግስጦስ ቄሳር ከመ ይጸሐፍ ኵሉ ዓለም።

² ወውእቱ ጻሕፍ ቀዳሚ አመ ቄሬኔዎስ መስፍን ለሶርያ።

³ ወሖረ ኵሉ ሰብእ ይጸሐፍ በበ ሀገሩ።

⁴ ወዐርገ ዮሴፍኒ እምገሊላ እምሀገረ ናዝሬት መንገለ ይሁዳ ኀበ ሀገረ ዳዊት እንተ ስማ ቤተ ልሔም እስመ እምቤተ ዳዊት ወእምአዝማደ ቤቱ ውእቱ።

⁵ ወሖረ ይጸሐፍ ምስለ ማርያም እንተ ፈኀሩ ሎቱ እንዘ ፅንስት ይእቲ።

በእንተ ልደተ እግዚእነ

⁶ ወእምዝ እንዘ ሀለዉ ህየ በጽሐ ዕለተ ወሊዶታ።

⁷ ወወለደት ወልደ ዘበኵራ ወአሰረቶ መንኮብያቲሁ ወጠብለለቶ በአጽርቅት ወአስከበቶ ውስተ ጎል እስመ አልቦሙ መካን ውስተ ማኅደሮሙ።

⁸ ወሀለዉ ኖሎት ውስተ ውእቱ ብሔር ይተግሁ ወይሔልዉ ወየዐቅቡ መራዕይሆሙ ሌሊተ በበ እብሬቶሙ።

⁹ ወናሁ ቆመ መልአከ እግዚአብሔር ኀቤሆሙ ወስብሐተ እግዚአብሔር ሠረቀ ላዕሌሆሙ ወፈርሁ ዐቢየ ፍርሀተ።

¹⁰ ወይቤሎሙ መልአክ ኢትፍርሁ እስመ ናሁ እዜንወክሙ ዐቢየ ዜና ዘይከውን ፍሥሓ ለክሙ ወለኵሉ ዓለም።

¹¹ እስመ ናሁ ተወልደ ለክሙ ዮም መድኅን ዘውእቱ ክርስቶስ እግዚእ ቡሩክ በሀገረ ዳዊት።

¹² ወከመዝ ትእምርቱ ለክሙ ትረክቡ ሕፃነ እሱረ መንኮብያቲሁ ወጥብሉለ በአጽርቅት ወስኩበ ውስተ ጎል።

¹³ ወግብተ መጽኡ ምስለ ውእቱ መልአክ ብዙኃን ሐራ ሰማይ እንዘ ይሴብሕዎ ለእግዚአብሔር፤

¹⁴ ወይብሉ ስብሐት ለእግዚአብሔር በሰማያት ወሰላም በምድር ለዕጓለ እመሕያው ሥምረቱ።

¹⁵ ወእምዝ ዐሪጎሙ መላእክት እምኀቤሆሙ ውስተ ሰማይ ይቤሉ እሙንቱ ሰብእ ኖሎት በበይናቲሆሙ ንሑር ወናንሶሱ እስከ ቤተ ልሔም ወናእምር ዘንተ ነገረ ዘአርአየነ እግዚአብሔር።

¹⁶ ወሖሩ ፍጡነ ወረከብዎሙ ለማርያም ወለዮሴፍ ወለሕፃንኒ ይሰክብ ውስተ ጎል።

¹⁷ ወርእዮሙ አእመሩ ከመ በእንተ ውእቱ ሕፃን ዘነገርዎሙ።

¹⁸ ወኵሎሙ እለ ሰምዑ አንከሩ ዘነገርዎሙ ኖሎት።

¹⁹ ወማርያምሰ ተዐቅብ ዘንተ ኵሎ ነገረ ወትወድዮ ውስተ ልባ።

²⁰ ወተመይጡ ኖሎት እንዘ ይሴብሕዎ ወየአኵትዎ ለእግዚአብሔር በእንተ ኵሉ ዘርእዩ ወሰምዑ ዘከመ ይቤልዎሙ።

ዘከመ ተገዝረ እግዚእ ኢየሱስ ወዘከመ አቀምዎ ውስተ ቤተ መቅደስ

²¹ ወአመ ተፈጸመ ሰሙን ዕለት ወሰድዎ ለሕፃን ከመ ይግዝርዎ ወሰመይዎ ስሞ ኢየሱስ በከመ ሰመዮ መልአክ እምቅድመ ትፅንሶ በከርሣ።

²² ወአመ ተፈጸመ መዋዕለ ንጽሖሙ በከመ ሕገ ሙሴ ወሰድዎ ኢየሩሳሌም ያቅምዎ ቅድመ እግዚአብሔር።

²³ በከመ ጽሑፍ ውስተ ሕገ እግዚአብሔር «ኵሉ ተባዕት ዘይፈትሕ ማሕፀነ እሙ ቅዱሰ ይሰመይ ለእግዚአብሔር።»

²⁴ ወከመ ያብኡ መሥዋዕተ በእንቲኣሁ በከመ ተብህለ ውስተ ሕገ እግዚአብሔር «ዘውገ ማዕነቅ፥ ወእመአኮ ክልኤቲ ዕጕለ ርግብ።»

በእንተ ስምዖን

²⁵ ወሀሎ አሐዱ ብእሲ በኢየሩሳሌም ዘስሙ ስምዖን ወውእቱ ጻድቅ ወየዋህ ወይሴፎ ይርአይ መድኀኒቶሙ ወፍሥሓሆሙ ለእስራኤል ወመንፈስ ቅዱስ ላዕሌሁ።

²⁶ ወአርአዮ መንፈስ ቅዱስ ከመ ኢይመውት ዘእንበለ ይርአይ መሲሖ ለእግዚአብሔር።

²⁷ ወወሰዶ መንፈስ ምኵራበ ወሶበ አብእዎ አዝማዲሁ ለሕፃን እግዚእ ኢየሱስ ከመ ይግበሩ ሎቱ ዘበሕጉ።

²⁸ ተወክፎ ውእቱኒ፤ ወአንበሮ ውስተ ሕፅኑ ወባረኮ ለእግዚአብሔር ወይቤ፤

²⁹ ይእዜ ትስዕሮ ለገብርከ በሰላም እግዚኦ በከመ አዘዝከ።

³⁰ እስመ ርእያ አዕይንትየ አድኅኖተከ።

³¹ ዘአስተዳለውከ ቅድመ ኵሉ ሕዝብከ።

³² ከመ ትክሥት ብርሃነ ለአሕዛብ ወክብረ ለሕዝብከ እስራኤል።

³³ ወዮሴፍሰ ወእሙ ያነክሩ በእንተ ዘይነብብ ላዕሌሁ።

³⁴ ወባረኮሙ ስምዖን ወይቤላ ለእሙ ማርያም ናሁ ዝንቱ ሕፃን ሥዩም ለድቀቶሙ ወለተንሥኦቶሙ ለብዙኃን እምውስተ እስራኤል ወለትእምርት በዘይትወቀሱ።

³⁵ ወለኪሰ ይበውእ ውስተ ልብኪ ኲናት ከመ ይክሥት ኅሊና ልቦሙ ለብዙኃን።

በእንተ ሐና ነቢይት

³⁶ ወሀለወት ሐና ነቢይት ወለተ ፋኑኤል እንተ እምነገደ አሴር ወኀለፈ መዋዕሊሃ ወምስለ ምታሰ ነበረት ሰብዐተ ክረምተ እምድኅረ ነበረት በድንግልናሃ።

³⁷ ወኮነት መዓስብተ ሰማንያ ወአርባዕተ ክረምተ ወኢትወፅእ እምኵራብ መዐልተ ወሌሊተ እንዘ ትትቀነይ በጾም ወበጸሎት።

³⁸ ወተንሥአት ሶቤሃ ወገነየት ወአእኰተቶ ለእግዚአብሔር ወነገረት በእንቲኣሁ ለኵሎሙ እለ ይሴፈዉ መድኀኒታ ለኢየሩሳሌም።

³⁹ ወፈጺሞሙ ኵሎ ዘበሕገ እግዚአብሔር አተዉ ገሊላ ሀገሮሙ ናዝሬተ።

⁴⁰ ወልህቀ ሕፃን ወጸንዐ በመንፈስ ቅዱስ ወምሉእ ጥበበ ወፍጹም በጸጋ እግዚአብሔር ዘላዕሌሁ።

ዘከመ ተረክበ እግዚእ ኢየሱስ ማእከለ ሊቃውንት

⁴¹ ወየሐውሩ አዝማዲሁ ኢየሩሳሌም ለለዓመት ለበዓለ ፋሲካ።

⁴² ወአመ ኮኖ ፍጹመ ሎቱ ዐሠርቱ ወክልኤቱ ክረምት ዐርጉ ለበዓል ኢየሩሳሌም በከመ ያለምዱ።

⁴³ ወሰሊጦሙ ግብሮሙ አተዉ ገሊላ ሀገሮሙ ወሕፃንሰ እግዚእ ኢየሱስ ነበረ ኢየሩሳሌም ወኢያእመሩ ዮሴፍ ወእሙ።

⁴⁴ ወይመስሎሙ ከመ ዘበፍኖት ሀሎ ምስለ ሰብእ ወበጺሖሙ ኀሠሥዎ በዕለታ ኀበ አዝማዲሁ ወኀበ እለ የአምርዎ ወኢረከብዎ።

⁴⁵ ወሶበ ኢረከብዎ ተሠውጡ ኢየሩሳሌም እንዘ የኀሥሥዎ።

⁴⁶ ወእምዝ በሣልስታ ረከብዎ በምኵራብ እንዘ ይነብር በማእከለ ሊቃውንት ወያጸምዖሙ ወይሴአሎሙ።

⁴⁷ ወያነክርዎ ኵሎሙ እለ ሰምዕዎ ጥበቦ ወአውሥኦቶ።

⁴⁸ ወሶበ ርእይዎ ደንገፁ ወትቤሎ እሙ ወልድየ ለምንት ከመዝ ረሰይከነ እስመ ናሁ አቡከኒ ወአነኒ ሰራሕነ እንዘ ነኀሠሥከ።

⁴⁹ ወይቤሎሙ ለምንት ተኀሥሡኒ ኢያእመርክሙኑ ከመ ይደልወኒ አሀሉ ውስተ ዘአቡየ ቤት።

⁵⁰ ወእሙንቱሰ ኢለበዉ ቃሎ ዘይቤሎሙ።

⁵¹ ወሖረ ወወረደ ምስሌሆሙ ናዝሬተ ወኮነ ይትኤዘዝ ሎሙ ወእሙሰ ተዐቅብ ዘንተ ኵሎ ነገረ ወትወድዮ ውስተ ልባ።

⁵² ወእግዚእ ኢየሱስ ልህቀ ወዐብየ በጥበብ ወበምክር ወበጸጋ በኀበ እግዚአብሔር ወበኀበ ሰብእ።