ወንጌል ዘሉቃስ 11 - ሐዲስ ኪዳን በልሳነ ግእዝ

ምዕራፍ 11 በእንተ ጸሎት

¹ ወእምዝ ጸለየ በአሐቲ መካን ወፈጺሞ ጸሎተ ይቤሎ አሐዱ እምአርዳኢሁ እግዚኦ መሀረነ ጸሎተ በከመ መሀሮሙ ዮሐንስ ለአርዳኢሁ።

² ወይቤሎሙ ሶበ ትጼልዩ ከመዝ በሉ አቡነ ዘበሰማያት ይትቀደስ ስምከ ትምጻእ መንግሥትከ ወይኩን ፈቃድከ በከመ በሰማይ ከማሁ በምድርኒ።

³ ሲሳየነ ዘለለዕለትነ ሀበነ ዮም።

⁴ ኅድግ ለነ አበሳነ ወጌጋየነ ከመ ንሕነኒ ንኅድግ ለዘአበሰ ለነ ወኢታብአነ እግዚኦ ውስተ መንሱት አላ አድኅነነ ወባልሐነ እምኵሉ እኩይ።

⁵ ወይቤሎሙ እመቦ እምውስቴትክሙ ዘቦ ዐርክ ወሖረ ኀቤሁ መንፈቀ ሌሊት ወይቤሎ ዐርክየ ለቅሐኒ ሠላሰ ኅብስተ።

⁶ እስመ በጽሐኒ ማኅፈርየ እምሐቅል ወአልብየ ዘአቀርብ ሎቱ ወአሠብጦ።

⁷ ወይሠጠዎ ዝኩ ዐርኩ እምውስጥ ወይብሎ ኢታንጥየኒ ወዳእነ ቀተርነ ኆኅተ ወደቂቅኒ ይሰክቡ ምስሌየ ውስተ ዓራት ወኢይክል ተንሥኦ አሀብከ።

⁸ እብለክሙ ለእመሂ ኢተንሥአ የሀቦ እስመ ዐርኩ ውእቱ ከመ ኢያንጥዮ ይትነሣእ ወይሁቦ መጠነ ፈቀደ።

⁹ ወአነሂ እብለክሙ ሰአሉ ወይትወሀበክሙ ጐድጕዱ ወይትረኀወክሙ ኅሡ ወትረክቡ።

¹⁰ እስመ ኵሉ ዘሰአለ ይነሥእ ወዘሂ ኀሠሠ ይረክብ ወለዘሂ ጐድጐደ ይትረኀዎ።

¹¹ ወእመቦ እምውስቴትክሙ ዘሰአሎ ወልዱ ለአቡሁ ኅብስተ እብነኑ ይሁቦ ወእመኒ ዓሣ ሰአሎ አርዌ ምድርኑ ይሁቦ ህየንተ ዓሣ።

¹² ወእመኒ አንቆቅሖ ሰአሎ ዐቅራበኑ ይሁቦ ህየንቴሁ።

¹³ ወሶበ አንትሙ እንዘ እኩያን አንትሙ ተአምሩ ሠናየ ሀብተ ውሂበ ለውሉድክሙ እፎ ፈድፋደ አቡክሙ ዘበሰማያት ይሁብ ሠናየ ሀብተ መንፈስ ቅዱስ ለእለ ይስእልዎ።

በእንተ ዘአኀዞ ጋኔን ጽሙም

¹⁴ ወሀሎ ያወፅእ ጋኔነ በሃመ ወጽሙመ ወወፂኦ ጋኔኑ ነበበ ወሰምዐ ውእቱ በሃም ወጽሙም ወአንከርዎ ሰብእ።

¹⁵ ወቦ እምውስቴቶሙ እለ ይቤሉ በብኤል ዜቡል በመልአኮሙ ለአጋንንት ያወፅኦሙ ለአጋንንት ወአውሥአ ወይቤ እፎ ይክል ሰይጣን ለሰይጣን አውፅኦቶ።

በእንተ መናፍስት ርኩሳን

¹⁶ ወቦ እለ ያሜክርዎ ወየኀሥሡ ትእምርተ እምሰማይ በኀቤሁ።

¹⁷ ወውእቱሰ አእመሮሙ ዘይኄልዩ ወይቤሎሙ ኵላ መንግሥት እንተ ትትናፈቅ በበይናቲሃ ትማስን ወቤትኒ እመ ተናፈቀ በበይናቲሁ ይወድቅ ውእቱ ቤት።

¹⁸ ወእመሰ ሰይጣን ተናፈቀ በበይናቲሁ እፎ ይቀውም መንግሥቱ እስመ ትብሉ በብኤል ዜቡል በመልአኮሙ ለአጋንንት ያወፅኦሙ ለአጋንንት።

¹⁹ ወእመሰ አነ በብኤል ዜቡል አወፅኦሙ ለአጋንንት ደቂቅክሙ በምንትኑ ያወፅእዎሙ ወበእንተ ዝንቱ እሙንቱ ይዛለፉክሙ።

²⁰ ወእመሰ አነ በአጽባዕተ እግዚአብሔር አወፅኦሙ ለአጋንንት ዮጊኬ በጽሐት እንከሰ ኀቤክሙ መንግሥተ እግዚአብሔር።

²¹ ወአምጣነ የዐቅብ ኀያል ዐጸዶ ርሡየ በንዋየ ሐቅል ዳኅን ኵሉ ጥሪቱ።

²² ወእመሰ ይመጽእ ዘይኄሎ ይመውኦ ወይሰልቦ ንዋየ ሐቅሉ ዘቦቱ ይትአመን ወይከፍል በርበሮ።

²³ ዘኢሀሎ ምስሌየ ዕድውየ ውእቱ ወዘኢይትጋባእ ምስሌየ ይዘርወኒ።

²⁴ ወሶበ ይወፅእ ጋኔን እኩይ እምሰብእ የዐውድ በድወ ኀበ አልቦ ማይ፤ ወየኀሥሥ ምንባረ ወመካነ ኀበ የዐርፍ ወእምከመ ኢረከበ ይብል እገብእ ቤትየ እምኀበ ወፃእኩ።

²⁵ ወመጺኦ ይረክቦ እንዘ ያስተራክብ እዳወ ወሥርግወ ወኵስቱረ።

²⁶ ወእምዝ የሐውር ወያመጽእ ምስሌሁ ሰብዐተ ቢጾ አጋንንተ እለ የአክይዎ ወይበውኡ ወየኀድሩ ውስቴቱ ወይብእሶ ደኃሪቱ ለውእቱ ብእሲ እምቀዳሚቱ።

በእንተ ብእሲት እንተ ጸርሐት በማእከለ አሕዛብ

²⁷ ወእምዝ እንዘ ዘንተ ይትናገር ከልሐት አሐቲ ብእሲት በማእክለ ሰብእ ወትቤሎ ብፅዕት ከርሥ እንተ ፆረተከ ወአጥባት እለ ሐፀናከ።

²⁸ ወይቤላ ውእቱኒ ብፁዓንሰ እለ ይሰምዑ ቃለ እግዚአብሔር ወየዐቅቡ።

በእንተ እለ የኀሥሡ ትእምርተ

²⁹ ወእንዘ ጉቡኣን ብዙኃን ሰብእ አኀዘ ይበሎሙ ዛቲ ትውልድ እኪት ይእቲ ትእምርተ ተኀሥሥ ወትእምርትሰ ኢይትወሀባ ዘእንበለ ትእምርተ ዮናስ ነቢይ።

³⁰ ወበከመ ዮናስ ኮኖሙ ትእምርተ ለሰብአ ነነዌ ከማሁ ይከውና ትእምርተ ወልደ ዕጓለ እመሕያው ለዛቲ ትውልድ።

³¹ ንግሥተ አዜብ ትትነሣእ ምስለ ዛቲ ትውልድ አመ ደይን ወትትኳነኖሙ እስመ መጽአት እምአጽናፈ ምድር ትስማዕ ጥበቢሁ ለሰሎሞን ወናሁ ዘየዐቢ እምሰሎሞን ሀሎ ዝየ።

³² ሰብአ ነነዌ ይትነሥኡ አመ ደይን ምስለ ዛቲ ትውልድ ወይትኳነንዋ ወያስተኀፍርዋ እስመ ነስሑ አመ ሰበከ ሎሙ ዮናስ ወናሁ ዘየዐቢ እምዮናስ ሀሎ ዝየ።

³³ ወአልቦ ዘያኀቱ ማኅቶተ ከመ ያንብራ ውስተ ምኅባእ ወእመ አኮ ታሕተ ከፈር ዘእንበለ ዲበ ተቅዋማ ከመ ይርአዩ ብርሃነ እለ ያንሶስዉ።

³⁴ ማኅቶቱ ለሥጋከ ዐይንከ ውእቱ ወአምጣነ ዐይንከ ብሩህ ውእቱ ኵሉ ነፍስትከ ብሩህ ውእቱ ወእመሰ ዐይንከ ሐማሚ ውእቱ ኵሉ ነፍስትከ ጽልመት ውእቱ።

³⁵ ዑቅ እንከ ብርሃንከ ጽልመተ ኢይኩን።

³⁶ ወእምከመሰ ኵሉ ነፍስትከ ብሩህ ውእቱ አልቦ ምንትኒ ጽልመት ላዕሌከ ወትከውን ኵለንታከ ብሩሀ ወከመ ማኅቶተ መብረቅ ያበርሀከ።

በእንተ ፈሪሳዊ ዘጸውዖ ለእግዚእ ኢየሱስ ውስተ ምሳሕ

³⁷ ወእንዘ ይነግሮሙ ዘንተ ይቤሎ አሐዱ ፈሪሳዊ ከመ ይምሳሕ ኀቤሁ ወቦአ ወረፈቀ።

³⁸ ወርእዮ ፈሪሳዊ አንከረ እስመ ኢተኀፅበ እዴሁ ለመሲሕ።

³⁹ ወይቤሎ እግዚእ ኢየሱስ አንትሙሰ ፈሪሳውያን ይእዜ እንተ አፍኣሁ ተኀፅብዎ ወታነጽሕዎ ለጽዋዕኒ ወለፃሕልኒ ወእንተ ውስጡሰ ምሉእ ሀዪደ ወእከየ።

⁴⁰ ኦ አብዳን አኮኑ ዘፈጠረ እንተ አፍኣ ወእንተ ውሥጥኒ ፈጠረ።

⁴¹ ወባሕቱ ዘይትፈቀድሰ ሀቡ ለምጽዋት ወኵሉ ንጹሐ ይከውነክሙ።

⁴² አሌ ለክሙ ጸሐፍት ወፈሪሳውያን እለ ታበውኡ ዐሥራተ እዴሁ ለአዛብ ወለጼናታም ወለኵሉ አሕማላት ወትትዔወርዎ ለጽድቅ ወለፍቀረ እግዚአብሔር ወዘንተኒ ርቱዕ ትግበሩ ወዝክተኒ ኢትኅድጉ።

⁴³ አሌ ለክሙ ጸሐፍት ወፈሪሳውያን መደልዋን እስመ ታፈቅሩ ነቢረ ፍጽም በውስተ አዕዋዳት ወተአምኆ በውስተ ምሥያጣት።

⁴⁴ አሌ ለክሙ ጸሐፍት ወፈሪሳውያን መደልዋን እስመ አንትሙ ከመ መቃብር ዘኢይትዐወቅ ዘያንሶሱ ሰብእ ላዕሌሁ ወኢየአምሮ።

⁴⁵ ወአውሥአ አሐዱ እምጸሐፍተ ሀገር ወይቤሎ ሊቅ ዘንተ እንዘ ትብል ኪያነሁ ትጼእል።

⁴⁶ ወይቤሎ ለክሙሂ ለጸሐፍተ ሀገር አሌ ለክሙ እስመ ታጸውርዎ ለሰብእ ጾረ ክቡደ ወለሊክሙሰ ኢትለክፍዎ ጥቀ በአሐቲ አጽባዕትክሙ ለውእቱ ጾር።

⁴⁷ አሌ ለክሙ ጸሐፍት ወፈሪሳውያን እስመ ተሐንጹ መቃብሪሆሙ ለነቢያት እለ አበዊክሙ ቀተልዎሙ።

⁴⁸ አደመክሙኑ ምግባሮሙ ለአበዊክሙ ወለሊክሙ ሰማዕቶሙ እስመ ዘእሙንቱ ቀተሉ አንትሙ ተሐንጹ መቃብሪሆሙ።

⁴⁹ ወበእንተ ዝንቱ ትቤ ጥበቢሁ ለእግዚአብሔር ናሁ አነ እፌኑ ኀቤሆሙ ነቢያተ ወሐዋርያተ ወይቀትሉ እምኔሆሙ ወይሰድዱ።

⁵⁰ ከመ ይትበቀሎሙ በእንተ ደመ ኵሉ ነቢያት ዘተክዕወ እምፍጥረተ ዓለም እስከ ዛቲ ትውልድ።

⁵¹ እምደመ አቤል ጻድቅ እስከ ደመ ዘካርያስ ዘቀተልዎ በማእከለ ቤተ መቅደስ ወምሥዋዕ እወ እብለክሙ ይትኀሠሥዋ ወይትቤቀልዋ ለዛቲ ትውልድ።

⁵² አሌ ለክሙ ጸሐፍተ ሀገር ወፈሪሳውያን እስመ ትነሥኡ መራኁተ ጽድቅ ወአእምሮ ወተኀብኡ ለሊክሙኒ ኢትበውኡ ወለእለሂ ይበውኡ ትከልእዎሙ በዊአ።

⁵³ ወእንዘ ይነግሮሙ ዘንተ በቅድመ ኵሉ ሕዝብ አኀዙ ጸሐፍት ወፈሪሳውያን ያመንዝዝዎ ወይትቀየምዎ።

⁵⁴ ወይንዕውዎ ከመ ያስሕትዎ በቃለ አፉሁ በዘያስተዋድይዎ።