ወንጌል ዘሉቃስ 10 - ሐዲስ ኪዳን በልሳነ ግእዝ

ምዕራፍ 10 ዘከመ ኀረየ ካልኣነ ሰብዓ

¹ ወእምዝ ኀረየ እግዚእነ ካልአነ ሰብዓ ወፈነዎሙ በበክልኤቱ ቅድመ ገጹ ውስተ ኵሉ አህጉር ወበሓውርት ኀበ ሀለዎ ይባእ።

² ወይቤሎሙ እግዚእ ኢየሱስ ማእረሩሰ ብዙኅ ወገባሩ ኅዳጥ ሰአልዎ እንከ ለበዓለ ማእረር ከመ ይወስክ ወይፈኑ ገባረ ለማእረሩ።

³ ሑሩ ናሁ አነ እፌንወክሙ ከመ አባግዕ ማእከለ ተኳሉት።

⁴ ወኢትጹሩ ቍናማተ ወኢጽፍነተ ወኢአሣእነ ወኢምንተኒ ወኢተአምኁ ወኢመነሂ በፍኖት።

⁵ ወኀበ ቦእክሙ ቤት ቅድመ በሉ ሰላም ለሰብአ ዝንቱ ቤት።

⁶ ወእመሂ ቦ ህየ ወልደ ሰላም ያዕርፍ ሰላምክሙ ላዕሌሁ ወእመአኮሰ ይግባእ ሰላምክሙ ላዕሌክሙ።

⁷ ወውእተ ቤተ ንበሩ ወብልዑ ወስትዩ ዘእምኀቤሆሙ እስመ ይደልዎ ዐስቡ ለዘይትቀነይ ወኢትትፋለሱ እምቤት ውስተ ቤት።

⁸ ወሀገረኒ ኀበ ቦእክሙ ወተወክፉክሙ ሰብአ ይእቲ ሀገር ብልዑ ዘአቅረቡ ለክሙ።

⁹ ወፈውሱ ድዉያነ እለ ውስቴታ ወበልዎሙ ቀርበት መንግሥተ እግዚአብሔር ኀቤክሙ።

¹⁰ ወሀገረሰ ኀበ ቦእክሙ ወኢተወክፉክሙ ሰብአ ይእቲ ሀገር ወፂአክሙ ውስተ መርሕባ ንግፉ ጸበለ እገሪክሙ እንዘ ትብሉ።

¹¹ ጸበለክሙኒ ዘተለወነ እምሀገርክሙ ንነግፍ ለክሙ ወባሕቱ ዘንተ አእምሩ ከመ ቀርበት መንግሥተ እግዚአብሔር ኀቤክሙ።

¹² እብለክሙ ከመ ሰዶም ትኄይስ ወትረክብ ሣህለ ፈድፋደ እምይእቲ ሀገር በዕለተ ደይን።

¹³ አሌ ለኪ ኰራዚ አሌ ለኪ ቤተ ሳይዳ ሶበሰ በጢሮስ ወበሲዶና ተገብረ ኀይል ዘተገብረ በውስቴትክን ሠቀ እምለብሱ ወውስተ ሐመድ እምነበሩ ወእምነስሑ።

¹⁴ ወባሕቱ ጢሮስ ወሲዶና ይኄይሳ እምኔክን በዕለተ ደይን።

¹⁵ ወአንቲኒ ቅፍርናሆም እመ እስከ ሰማይ ትትሌዓሊ ሀለወኪ ትረዲ እስከ ሲኦል።

¹⁶ ዘኪያክሙ ሰምዐ ኪያየ ሰምዐ ወዘለክሙ አበየ ሊተ አበየ ወዘሊተ አበየ አበዮ ለዘፈነወኒ ወዘኪያየ ሰምዐ ሰምዖ ለዘፈነወኒ።

ዘከመ ተመይጡ እልክቱ ሰብዓ እምዘተፈነዉ

¹⁷ ወተመይጡ እልክቱ ሰብዓ እለ ተፈነዉ እንዘ ይትፌሥሑ ወይቤልዎ እግዚኦ አጋንንትሂ ገረሩ ለነ በስምከ።

¹⁸ ወይቤሎሙ ርኢክዎ ለሰይጣን ከመ መብረቅ ወድቀ እምሰማይ።

¹⁹ ወናሁ ወሀብኩክሙ ሥልጣነ ትኪዱ ዲበ አቃርብት ወዲበ አራዊተ ምድር ወዲበ ኵሉ ኀይለ ጸላኢ ወአልቦ ዘይነክየክሙ።

²⁰ ወባሕቱ በዝሰ ኢትትፈሥሑ እስመ አጋንንት ይገንዩ ለክሙ ተፈሥሑሰ ባሕቱ እስመ ተጽሕፈ አስማቲክሙ በሰማያት።

²¹ ወበይእቲ ሰዓት ተፈሥሐ እግዚእ ኢየሱስ በመንፈሱ ቅዱስ ወይቤ አአምነከ አባ እግዚአ ሰማይ ወምድር ዘኀባእኮ ለዝንቱ እምጠቢባን ወእምለባውያን ወከሠትኮ ለሕፃናት እወ አባ እስመ ከማሁ ኮነ ሥምረትከ በቅድሜከ።

²² ኵሉ ተውህበ ሊተ እምኀበ አቡየ ወአልቦ ዘየአምሮ ለወልድ ከመ መኑ ውእቱ ዘእንበለ አብ ወአልቦ ዘየአምሮ ለአብ ከመ መኑ ውእቱ ዘእንበለ ወልድ ወለዘፈቀደ ወልድ ይከሥት ሎቱ።

²³ ወተመይጠ ወይቤሎሙ ለአርዳኢሁ እንተ ባሕቲቶሙ ብፁዓት አዕይንት እለ ርእያ ዘትሬእዩ አንትሙ።

²⁴ እብለክሙ ከመ ብዙኃን ነቢያት ወነገሥት ፈተዉ ይርአዩ ዘትሬእዩ አንትሙ ወኢርእዩ ወይስምዑ ዘትሰምዑ አንትሙ ወኢሰምዑ።

ዘከመ ተስእሎ ጸሓፌ ሀገር

²⁵ ወእምዝ ተንሥአ አሐዱ ጸሓፌ ሀገር ያመክሮ ወይቤሎ ኦ ሊቅ ምንተ ገቢርየ እወርስ ሕይወተ ዘለዓለም።

²⁶ ወይቤሎ ውስተ ኦሪት ምንት ጽሑፍ ወእፎ ታነብብ።

²⁷ ወአውሥአ ወይቤሎ «አፍቅሮ ለእግዚአብሔር አምላክከ በኵሉ ልብከ ወበኵሉ ነፍስከ ወበኵሉ ኀይልከ ወበኵሉ ኅሊናከ ወአፍቅር ቢጸከ ከመ ነፍስከ።»

²⁸ ወይቤሎ እግዚእ ኢየሱስ ሠናየ ተሠጠውከ ከማሁኬ ግበር ወተሐዩ።

²⁹ ወፈቀደ ያጽድቅ ርእሶ ወይመንን ቢጾ ወይቤሎ መኑ ውእቱ ቢጽየ።

በእንተ ርኅራኄሁ ለሳምራዊ

³⁰ ወተሰጥዎ እግዚእ ኢየሱስ ወይቤሎ አሐዱ ብእሲ እንዘ ይወርድ እምኢየሩሳሌም ለኢያሪሆ ረከብዎ ፈያት ወዘበጥዎ ወፈቅዕዎ ወሰለብዎ ወገደፍዎ ወኀለፉ ወአልጸቀ ይሙት።

³¹ ወተዳደቆ አሐዱ ካህን እንዘ ይወርድ ይእተ ፍኖተ ወርእዮ ተዐደዎ ወኀለፈ።

³² ወከማሁ ሌዋዊሂ ረከቦ ክመ በውእቱ መካን ወርእዮ ተዐደዎ ወኀለፈ ከመ ቀዳሚ።

³³ ወረከቦ አሐዱ ሳምራዊ እንዘ የሐውር ይእተ ፍኖተ ወርእዮ ወምሕሮ።

³⁴ ወቀርበ ኀቤሁ ወሶጠ ወይነ ወቅብዐ ውስተ ቍሰሊሁ ወአጽዐኖ ዲበ አድጉ ወወሰዶ ኀበ ዐቃቤ ቤተ ነገድ ከመ ይፈውሶ ወአስተሐመመ በግብሩ።

³⁵ ወበሳኒታ አውፅአ ክልኤተ ዲናረ ወወሀቦ ለዐቃቤ ቤተ ነግድ ወይቤሎ ፈውሶ ሊተ በዝንቱ ወእመቦ ዘአስተዋፃእከ ሎቱ ዘይበዝኅ እምዝ እፈድየከ አነ አመ ግብአትየ።

³⁶ መኑ እንከ እምእሉ ሠለስቱ ዘይከውኖ ቢጾ ለዘዘበጥዎ ፈያት።

³⁷ ወይቤሎ ዘገብረ ምሕረተ ላዕሌሁ ወይቤሎ እግዚእ ኢየሱስ ሑርኬ አንተኒ ግበር ከማሁ ወተሐዩ።

በእንተ ማርያ ወማርታ

³⁸ ወእምዝ ሐዊሮሙ ቦኡ አሐተ ሀገረ ወተቀበለቶ በቤታ አሐቲ ብእሲት እንተ ስማ ማርታ።

³⁹ ወስመ እኅታ ማርያ እንተ ነበረት ኀበ እገሪሁ ለእግዚእ ኢየሱስ ወሰምዐት ነገሮ።

⁴⁰ ወማርታሰ ትሰርሕ በአስተዳለዎ ብዙኀ ወቆመት ወትቤሎ እግዚእየ ኢያጽሕቀከኑ ዘተኀድገኒ እኅትየ ባሕቲትየ እንዘ አስተዳሉ በላኬ ትርድአኒ።

⁴¹ ወአውሥአ እግዚእ ኢየሱስ ወይቤላ ማርታ ማርታ ለምንት ትሰርሒ ብዙኀ ወታስተዳልዊ።

⁴² ወኅዳጥ የአክል ወእመ አኮ አሐቲ መክፈልት ወማርያሰ ኀርየት መክፈልተ ሠናየ ዘኢየሀይድዋ።