መልእክተ ያዕቆብ ሐዋርያ 4 - ሐዲስ ኪዳን በልሳነ ግእዝ

ምዕራፍ 4 ፍቁሩ ለዓለም ጸላኢሁ ለእግዚአብሔር

¹ እምአይቴ ለክሙ ጸብእ ወቀትል አኮኑ እምዝየ እምአፍቅሮ ዝሙት ዘይትገበር ውስተ አንጕዕክሙ።

² ትፈትዉሂ ወኢትረክቡ ትትቃንኡሂ ወትትቃተሉሂ ወበእንተዝ ኢትክሉ ረኪበ ትትበአሱሂ ወትጻብኡሂ ወኢትረከቡ ዘተኀሥሡ እስመ ኢትስእሉ።

³ ትስእሉሂ ወኢይሁቡክሙ እስመ ለእኪት ትስእሉ ለዝሙትክሙ ከመ ተሀቡ።

⁴ ኦ ዘማውያን ኢተአምሩኑ ከመ ፍቁሩ ለዝ ዓለም ጸላኢሁ ውእቱ ለእግዚአብሔር እስመ ዘአብደረ ፍቅሮ ለዝ ዓለም ጸላኢሁ ለእግዚአብሔር ይከውን።

⁵ ወሚመ ይመስለክሙኑ ዘሐሰተ ይብል መጽሐፍ ከመ ተቃንኦ ያፈቅር መንፈስ ዘየኀድር ላዕሌክሙ።

⁶ ወባሕቱ አምላክነ እንተ ተዐቢ ሞገሰ ይሁበነ ወበእንተ ዝንቱ ይቤ «እስመ ለዕቡያን ይትሄየዮሙ እግዚአብሔር ወለእለሰ ያቴሕቱ ርእሶሙ ይሁቦሙ ሞገሰ።»

⁷ ኦሆ በልዎ ለእግዚአብሔር ወእንብየ በልዎ ለጋኔን ወይጐይይ እምኔክሙ።

⁸ ቅረብዎ ለእግዚአብሔር ወይቀርበክሙ አንጽሑ እደዊክሙ ኃጥኣን ወአንጽሑ ልበክሙ ወእለ ትናፍቁ ግነዩ።

⁹ ወላሕዉ ወብክዩ ወለሰሓቅክሙኒ ሚጥዎ ውስተ ላሕ ወለትፍሥሕትክሙኒ ውስተ ትካዝ አግብእዎ።

¹⁰ አትሕቱ ርእሰክሙ ወያሌዕለክሙ እግዚአብሔር።

በእንተ ተዐቅቦ እምነ ሐሜት

¹¹ ወኢትትሓመዩ በበይናቲክሙ አኀዊነ እስመ ዘሐመዮ ለካልኡ ሐመዮ ለሕገ እግዚአብሔር ወዘይግዕዝ ካልኦ ሕገ እግዚአብሔር ገዐዘ ወእመሰ ሕጎ ትግዕዝ ኢኮንከ ገባሬ ሕግ አላ ኮንከ ገዓዚሃ ለሕግ።

¹² እስመ አሐዱ ውእቱ ወሀቢሃ ለሕግ ወመኰንና ለሕግ ዘውእቱ ይክል አማስኖሂ ወአድኅኖሂ አንተኬ ምንትኑ አንተ ዘትግዕዞ ለካልእከ።

¹³ ከመ እለ ይብሉ ዮም አው ጌሠመ ነሐውር ውስተ እንታክቲ ሀገር ወንነብር ውስቴታ ወንትጌበር ወንረብሕ ወኢየአምሩ ዘይከውን ጌሠመ።

¹⁴ ምንትኑመ ሕይወትክሙ አኮኑ ከመ ጢስ አንትሙ ዘለምዕር ያስተርኢ ወእምድኅሬሁ ይማስን።

¹⁵ ዘእምትቤሉ እመ ሠምረ እግዚአብሔር ወሐየውነ ንገብር ዘንተ አው ዝክተ።

¹⁶ ወይእዜሰ ትትሜክሑ በምግባሪክሙ ወኵላ ትምክሕት እንተ ከመዝ እኪት ይእቲ።

¹⁷ ወዘየአምር ገቢሮታ ለሠናይት ወኢይገብራ ኀጢአተ ትከውኖ።