መልእክተ ያዕቆብ ሐዋርያ 2 - ሐዲስ ኪዳን በልሳነ ግእዝምዕራፍ 2 ዘከመ ይደሉ ተዐቅቦ እምአድልዎ 1 አኀዊነ ኢትኩን ለገጸ ሰብእ ሃይማኖትክሙ እንተ በእግዚአነ ኢየሱስ ክርስቶስ ዘሎቱ ስብሐት። 2 ከመ እመ ቦአ ውስተ ማኅበርክሙ ብእሲ ዘሕልቀተ ወርቅ ወዘአልባስ ንጹሕ ወቦአ ነዳይ በአልባስ ርሱሕ። 3 ወትኔጽርዎ ለዘይለብስ ንጹሐ ወትብልዎ አንተሰ ንበር ዝየ ውስተ ምሥናይ ወለነዳይሰ ትብልዎ ቁም ከሃከ አንተሰ ወእመ አኮ ንበር ታሕተ መከየደ እገሪነ። 4 አኮኑ እንከ አድሎክሙ ለሊክሙ ወኮንክሙ መደልዋነ ለኅሊና እኩይ። 5 ስምዑ አኀዊነ ፍቁራን አኮኑ እግዚአብሔር ኀረዮሙ ለነዳያነዝ ዓለም ወአብዕልትሰ ከመ በሃይማኖቶሙ ይወርስዋ ለመንግሥት እንተ አሰፈዎሙ ለእለ ያፈቅርዎ። 6 ወአንትሙሰ አስተሐቀርክምዎሙ ለነዳያን አኮኑ እሙንቱ አብዕልት እለ ይትዔገሉክሙ ወይስሕቡክሙ ውስተ ተስናናት ወአዕዋዳት። 7 ወእሙንቱ ይጸርፉ ላዕለ ስሙ ዐቢይ ዘተሰምየ ላዕሌክሙ። በእንተ ፍቅር 8 ወእመሰ ትፌጽሙ ሕገ በከመ ይብል መጽሐፍ «አፍቅር ቢጸከ ከመ ነፍስከ» ሠናየ ትገብሩ። 9 ወእመሰ ገጸ ትነሥኡ ኀጢአተ ትገብሩ ወይዛለፈክሙ ሕግ ከመ ከሓዲ። 10 ወዘሰ ይገብሮ ለኵሉ ሕግ ወይስሕት በአሐቲ ኮነ መአብሰ በኵሉ። 11 እስመ ዘይቤ «ኢትሑር ኀበ ብእሲተ ብእሲ ይቤ ኢትቅትል ነፍሰ» ወእመሰ ኢተሐውር ኀበ ብእሲተ ብእሲ ወባሕቱ ትቀትል ነፍሰ ኮንከ ውፁአ እምሕግ። 12 ከመዝ ንግሩ ወከመዝ ግበሩ ከመ ዘበሕገ ግዕዛን ሀለወክሙ ትትኰነኑ። 13 እስመ በደይንሰ አልቦ ምሒር ለዘኢገብረ ምሕረተ ወይትሜካሕ ባሕቱ በዕለተ ደይን ዘገብረ ምሕረተ። በእንተ ሃይማኖት ወምግባር 14 ምንት ይበቍዕ አኀዊነ ለእመ ቦ ዘይብል ሃይማኖት ብየ ወምግባረ ሠናይ አልብየ ቦኑ ትክል ሃይማኖቱ አድኅኖቶ። 15 ለእመ ቦ እምአኀዊነ አው እምአኃቲነ እለ ዕሩቃን እሙንቱ አው ኅጡኣን ለሲሳየ ዕለቶሙ። 16 ወቦ ዘይቤሎሙ እምኔክሙ ሑሩ በሰላም ሰሐኑ፥ ወትጸግቡ ወኢወሀቦሙ ዘይፈቅዱ ለተጽናሶሙ ምንተ ይበቍዖሙ። 17 ከማሁ ሃይማኖትኒ እንተ አልባቲ ምግባረ ሠናይ ምውት ይእቲ ለሊሃ። 18 እመቦ ዘይቤለከ አንተ ሃይማኖት ብከ ወአነ ምግባረ ሠናይ ብየ አርእየኒኬ ሃይማኖተከ ዘእንበለ ምግባሪከ ወአንሰ አርእየከ እምነ ምግባርየ ሃይማኖትየ። 19 አንተሰ ተአምን ከመ አሐዱ ውእቱ እግዚአብሔር ሠናየ ትገብር ከማሁሰ አጋንንትኒ የአምኑ ወይደነግፁ። 20 ትፈቅድኑ ታእምር ኦ! ብእሲ አብድ ከመ ሃይማኖት ዘእንበለ ምግባር ምውት ይእቲ። 21 አኮኑ አብርሃም አቡነ በምግባሩ ጸድቀ ሶበ አዕረጎ ለይስሐቅ ወልዱ ውስተ ምሥዋዕ። 22 ትሬኢኑ ከመ ሃይማኖት ትረድኦ ለገቢር ወበምግባሩ መልአት ወፍጽምተ ኮነት ሃይማኖቱ። 23 ወተፈጸመ ዘይብል መጽሐፍ «አምነ አብርሃም በእግዚአብሔር ወተኈለቆ ጽድቀ ወፍቁረ እግዚአብሔር ተሰምየ።» 24 ትሬኢኑ ከመ በምግባሩ ይጸድቅ ሰብእ ወአኮ በሃይማኖቱ ባሕቲታ። 25 ወከማሁ ረአብኒ ዘማ በምግባሪሃ ጸድቀት ሶበ ተቀበለቶሙ ለሰብአ ዐይን ወእንተ ካልእት ፍኖት አውፅአቶሙ። 26 በከመ ሥጋ ዘአልቦ መንፈስ ምዉት ውእቱ ከማሁ ሃይማኖትኒ እንተ አልባቲ ምግባረ ሠናይ ምውት ይእቲ። |