ኀበ ሰብእ ዕብራውያን 7 - ሐዲስ ኪዳን በልሳነ ግእዝ

ምዕራፍ 7 በእንተ መልከ ጼዴቅ

¹ ወመልከ ጼዴቅሰ ንጉሠ ሳሌም ካህኑ ለእግዚአብሔር ልዑል ውእቱ ዘመጽአ ወተራከቦ ለአብርሃም አመ ተመይጠ እምኀበ ተቃተሎሙ ለነገሥት ወባረኮሂ።

² ወከፈሎ አብርሃም ዐሥራተ እምኵሉ ቀዳሚ ትርጓሜ ስሙ ንጉሠ ጽድቅ ወእምዝ ንጉሠ ሳሌም ንጉሠ ሰላም ብሂል።

³ አልቦ ዘዘከረ ሎቱ አበ ወኢእመ ወአልቦ ጥንት ለመዋዕሊሁ ወኢማኅለቅት ለሕይወቱ በአምሳሊሁ ለወልደ እግዚአብሔር ይነብር ክህነቱ ለዝሉፉ።

⁴ ትሬእዩኑ ዕበዮ ለዝንቱ ዘወሀቦ አብርሃም ዐሥራተ እምኵሉ ዘይኄይስ ወርእሶሙ ለአበው ውእቱ።

⁵ ወደቂቀ ሌዊሰ ሶበ ይነሥኡ ክህነተ ቦሙ ሥርዐተ ትእዛዝ እምኦሪት ከመ ይንሥኡ ዐሥራተ እምሕዝብ በከመ ሥርዐተ ሕጎሙ እምላዕለ አኀዊሆሙ እለ ወፅኡ እምሐቌሁ ለአብርሃም።

⁶ ወለዘኢኮነሰ እምዘመዶሙ ወሀቦ አብርሃም ዐሥራተ ወባረኮ ለአብርሃም ዘሎቱ ተስፋ።

⁷ ወይትዐወቅ ባሕቱ ዘእንበለ ካሕድ ከመ ዘየዐቢ ይባርኮ ለዘይንእስ።

⁸ ወበዝየሰ ሰብእ መዋቲ ይነሥእ ዐሥራተ ወበከሃሰ ለሊሁ ይነሥእ ዘሰማዕቱ መጽሐፍ ከመ ሕያው ውእቱ።

⁹ ወተብህለ በእንተ አብርሃም ከመ ወሀቦ ዐሥራተ ወሌዊሰ ዘይነሥእ ዐሥራተ ውእቱኒ ዐሠረ።

¹⁰ እስመ ዓዲሁ ሀሎ ውስተ ሐቌ አብርሃም አቡሁ አመ ተራከቦ መልከ ጼዴቅ።

¹¹ ወእመሰ ይትፌጸም በክህነቶሙ ለሌዋውያን ዘይገብሩ ለሕዝብ በከመ ተሠርዐ ለምንት እንከ ይትፈቀድ ይሠየም ካልእ ካህን ዘከመ መልከ ጼዴቅ ሢመቱ ዳእሙ ዘእምይቤ ከመ ሢመተ አሮን።

¹² እስመ ሀለዋ ትፍልስ ክህነቶሙ ወእምከመሰ ፈለሰት ክህነቶሙ ትፈልስ ኦሪቶሙ።

¹³ ወዘተብህለሰ በእንቲኣሁ ከመዝ ተወልደ እምካልእ ሕዝብ ዘኢዐቀበ ምሥዋዐ ግሙራ አሐዱሂ እምኔሁ።

¹⁴ ወይትዐወቅ ዝንቱ ክሡተ ከመ እምይሁዳ ወፅአ እግዚእነ ሕዝብ ዘኢነገረ በእንቲኣሁ ሙሴ ሢመተ ክህነት።

¹⁵ ወዓዲ ፈድፋደ ያዔውቅ ዝንቱ እስመ ይቤ ይትነሣእ ካህን በአምሳለ ክህነቱ ለመልከ ጼዴቅ።

¹⁶ ዘኢኮነ በሕገ ሥርዐት ዘሥጋ ወደም አላ በኀይለ ሕይወት ዘኢየኀልቅ።

¹⁷ ውእቱ ሰማዕቱ ዘይቤ «አንተ ውእቱ ካህን ከመ ሢመቱ ለመልከ ጼዴቅ።»

¹⁸ እስመ ኮነ ተዋልጦ፥ በቀዳሚ ሕግ በእንተ ድካማ እስመ አልባቲ ባቍዕ።

¹⁹ ወኢያስለጠት ወኢምንተኒ ኦሪት ወባሕቱ ቦአ ተስፋ ህየንቴሃ ዘይኄይስ እምኔሃ ወቦቱ ንቀርቦ ለእግዚአብሔር።

²⁰ እስመ ኢኮነ ዘእንበለ መሐላ እስመ ቦ እለ ተሠይሙ ዘእንበለ መሐላ።

²¹ ወለዘሰ በመሐላ ሤሞ ይቤሎ «መሐለ እግዚአብሔር ወኢይኔስሕ ከመ አንተ ካህኑ ለዓለም በከመ ሢመቱ ለመልከ ጼዴቅ።»

²² ወመጠነዝ ተሠይመ ኢየሱስ ውስተ እንተ ትኄይስ ወተዐቢ ሢመት።

²³ ወለእልክቱሰ ካህናት ብዙኃን እስመ ይስዕሮሙ ሞት ወኢያበውሖሙ ይንበሩ።

²⁴ ወውእቱሰ ይነብር ለዓለም እስመ ኢይሰዐር ክህነቱ።

²⁵ ወይክል አድኅኖቶሙ ለዝሉፉ ለእለ ይቀርቡ ኀበ እግዚአብሔር እንተ መንገሌሁ እስመ ለግሙራ ሕያው ውእቱ ወይተነብል ሎሙ።

²⁶ ዘከመዝኬ ሊቀ ካህናት ይደልወነ ጻድቅ ወየዋህ ዘንጹሕ ወርሑቅ እምኵሉ ኀጢአት ወልዑል ውእቱ እምሰማያት።

²⁷ ወአልቦ ግብር ኵሎ አሚረ ከመ ሊቃነ ካህናት እለ ያቄርቡ መሥዋዕተ ቀዲሙ በእንተ ኀጢአቶሙ ወድኅረ በእንተ ሕዝብ ወውእቱሰ ከመዝ ገብረ በምዕር ሦዐ ርእሶ።

²⁸ ኦሪትሰ ሰብአ ትሠይም ሊቀ ካህናት መዋቴ ወቃለ መሐላሁሰ ዘመጽአ እምድኅረ ኦሪት ሤመ ለነ ወልደ ፍጹመ ዘለዓለም።