ኀበ ሰብእ ዕብራውያን 6 - ሐዲስ ኪዳን በልሳነ ግእዝ

ምዕራፍ 6 በእንተ ንስሓ

¹ ወበእንተ ዝንቱ ኀዲገነ ጥንተ ነገሩ ለክርስቶስ ንብጻሕ ኀበ ፍጻሜሁ ዑቁ እንከ ዳግመ መሠረተ ካልአ ኢትኅሥሡ በዘትኔስሑ እምግብር ምዉት ውስተ ሐዲስ ሃይማኖት ዘእግዚአብሔር።

² ወትምህርተ ጥምቀት ወሢመተ እድ ወትንሣኤ ሙታን ወኵነኔ ዘለዓለም።

³ ወዘንተኒ እምገበርነ ሶበ ያበውሕ እግዚአብሔር።

⁴ ወባሕቱ ኢይትከሀል እምድኅረ ነሥኡ ጥምቀተ ወጥዕሙ ጸጋሁ ዘእምሰማያት ወተሳተፉ በመንፈስ ቅዱስ።

⁵ ወጥዕሙ ቃለ እግዚአብሔር ሠናየ ወኀይለ ዓለም ዘይመጽእ።

⁶ ኢይደሉ ከመ ይደቁ የሐድስዋ ካዕበ ለንስሓሆሙ ወይስቅልዎ ሎሙ ለወልደ እግዚአብሔር ወይመንንዎ።

⁷ ምድርኒ ለእመ ሰትየት ዝናመ ዘይመጽእ ላዕሌሃ ትወልድ ሣዕረ ሠናየ ሶቤሃ ዘበእንቲኣሁ ሐረስዋ ወትነሥእ በረከተ እምኀበ እግዚአብሔር።

⁸ ወእመሰ አውፅአት ሦከ ወአሜከላ ዘቅርብት ለመርገም ወደኃሪታ ለአንድዶ።

⁹ ንትአመነክሙ አኀዊነ ኅሩያን ከመ ትቅረቡ ውስተ እንተ ባቲ ሕይወት እመኒ ከመዝ ንቤለክሙ።

¹⁰ ዘአኮ ይዔምፅ እግዚአብሔር ከመ ይርሳዕ ምግባሪክሙ ዘቀዲሙ ወተፋቅሮተክሙ ዘአርአይክሙ በስሙ ወተልእክምዎሙ ለቅዱሳን ወትትለአኩሂ።

¹¹ ወንፈቱሰ ኵልክሙ ከማሁ ታርእዩ ጻሕቀክሙ በዛቲ ተስፋክሙ እስከ ለዝሉፉ።

¹² ከመ ኢትተክዙ ወኢትኩኑ ድንዙዛነ ወተመሰልዎሙ ለእለ በአሚን ወበትዕግሥት ወረሱ ተስፋሆሙ።

በእንተ ተስፋ ወመሐላ

¹³ እግዚአብሔርኒ አመ አሰፈዎ ለአብርሃም ወአልቦ ባዕድ ዘየዐቢ እምኔሁ ከመ ይምሐል ቦቱ መሐለ በርእሱ።

¹⁴ ወይቤ ከመ ባርኮ እባርከከ ወአስተባዝኆ አስተባዝኀከ።

¹⁵ ወእምዝ ተዐጊሦ አድምዐ ተስፋሁ።

¹⁶ ወሰብእሰ ይምሕል በዘየዐቢ እምኔሁ ወሙፃኡ ለቅሥት የኀልቅ በመሐላ።

¹⁷ ወበእንተዝ ፈቀደ እግዚአብሔር ያርኢ ጽድቆ ለእለ ይወርሱ ተስፋሁ ከመ ኢይመይጥ ምክሮ ወአጽንዖ በመሐላ ከመ ኢይትመየጥ።

¹⁸ ወኢይትከሀል ይትሐሰው ቃለ እግዚአብሔር ዐቢይ ፍሥሓ ብነ ለእለ ተማሕፀነ ወአጽናዕነ ተወክሎ በተስፋነ ዘጽኑሕ ለነ።

¹⁹ እንተ ታጸንዓ ከመ መርሶ ለነፍስነ ከመ ኢታንቀልቅል።

²⁰ ወታበውእ ውስተ ውሳጤ መንጦላዕት ኀበ ቦአ ኢየሱስ ሐዋርያነ እምቅድሜነ ሊቀ ካህናት በከመ ሢመቱ ለመልከ ጼዴቅ ከዊኖ ዘለዓለም።