ኀበ ሰብእ ዕብራውያን 5 - ሐዲስ ኪዳን በልሳነ ግእዝ

ምዕራፍ 5 በእንተ ሊቀ ካህናት ምድራዊ

¹ እስመ ኵሉ ሊቀ ካህናት እምሰብእ ይትነሣእ ወበእንተ ሰብእ ይሠየም ለኀበ እግዚአብሔር ከመ ያብእ ቍርባነ ወመሥዋዕተ ዘበእንተ ኀጢአት።

² ወየሐምም ሕቀ ወይክል ሐሚመ ምስለ እለ ስሕቱ በእበዶሙ ወበእንተ ዘኮነ ለሊሁ ድኩመ።

³ ወእንበይነዝ ርቱዕ ከመ በእንተ ሕዝብ ከማሁ ለርእሱኒ ያብእ ዘበእንተ ኀጢአት።

⁴ ወአልቦ ዘይነሥእ ለርእሱ ክብረ ዘእንበለ ዘጸውዖ እግዚአብሔር ዳእሙ በከመ አሮን።

⁵ ከማሁ ክርስቶስኒ አኮ ርእሶ ዘንእደ ከመ ይኩን ሊቀ ካህናት ዳእሙ ለሊሁ ዘይቤሎ «ወልድየ አንተ ወአነ ዮም ወለድኩከ።»

⁶ ወካዕበ ይቤ «አንተ ካህኑ ለዓለም በከመ ሢመቱ ለመልከ ጼዴቅ።»

⁷ ወአመ ሀሎ በመዋዕለ ሥጋሁ ጸሎተ ወስኢለ አብአ በዐቢይ ገዐር ወአንብዕ ኀበ ዘይክል አድኅኖቶ እሞት ወሰምዖ ጽድቆ።

⁸ ወከዊኖ ወልደ አእመረ በእንተ ዘሐመ ተአዚዞ።

⁹ ወፈጺሞ ውእቱ ኮነ ዐሳዬ ሕይወት ለኵሎሙ እለ ይትኤዘዙ ሎቱ ወመድኅነ ዘለዓለም።

¹⁰ ወሰመዮ እግዚአብሔር ሊቀ ካህናት ዘለዓለም በከመ ሢመቱ ለመልከ ጼዴቅ።

¹¹ እስመ ለዝንቱሰ ዕፁብ ነገሩ ወኢይትከሀል ይፈክርዎ እስመ ድንዙዛነ ኮንክሙ እዘኒክሙ እምሰሚዕ።

¹² እንዘ ርቱዕ ለክሙ ትኩኑ መምህራነ በእንተ ዘጐንደይክሙ እምአመ አመንክሙ ውስተ ትምህርት ወዓዲክሙ እስከ ይእዜ ትፈቅዱ ይምሀሩክሙ ቀዳሜ መጽሐፍ መቅድመ ቃሉ ለእግዚአብሔር ወትፈቅዱ ሐሊበ ይውግዑክሙ ወአኮ መብልዐ ጽኑዐ።

¹³ እስመ ኵሉ ዘይትወጋዕ ሐሊበ ሕፃን ውእቱ ወኢየኀሥሥ ያእምር ቃለ ጽድቅ።

¹⁴ ወመብልዕሰ ጽኑዕ ለልሂቅ ውእቱ ዘይለምድ ተኃሥሦ በዘይፈልጥ ሠናየ ወእኩየ።