ኀበ ሰብእ ዕብራውያን 4 - ሐዲስ ኪዳን በልሳነ ግእዝ

ምዕራፍ 4 በእንተ ሰንበት

¹ ንፍራህ እንከ እምእለ ሰምዑ ወኢንኅድግ ትእዛዞ ከመ ንባእ ውስተ ዕረፍቱ ወለእመ ቦ እንጋ ዘይትረከብ እምኔክሙ ውስተ ስሒት ዘልማድ ወይጸንዕ ኢይምሰሎ ዘየኀድግዎ ከመ ይባእ ውስተ ዕረፍቱ።

² እስመ ስሙዓን ንሕነ ከመ ሰምዑ እልክቱ ወባሕቱ ለእልክቱሰ ኢበቍዖሙ ቃል ዘሰምዑ እስመ ኢተቶስሐ ልቦሙ በሃይማኖት ምስለ እለ ሰምዑ።

³ ንበውእ ንሕነሰ ውስተ ዕረፍቱ እስመ አመነ ወእፎ እንከ ይቤ «በከመ መሐልኩ በመዓትየ ከመ ኢይበውኡ ውስተ ዕረፍትየ» ወናሁ ዝንቱ ውእቱ ምግባሩ ለእግዚአብሔር ዘእምፍጥረተ ዓለም ዘኮነ።

⁴ በከመ ይቤ በእንተ ሰንበት ወአዕረፈ እግዚአብሔር በዕለተ ሰንበት እምኵሉ ግብሩ።

⁵ ወካዕበ ይቤ «ኢይበውኡ ውስተ ዕረፍትየ።»

⁶ እስመ ቦ ሰብእ እለ ቦሙ ፍኖት ከመ ይባኡ ህየ ወቀደምትሰ ሰሚዖሙ ኢቦኡ እስመ ክሕዱ።

⁷ ወእንበይነ መኑ ይብል ከማሁ ካልአ ዕለተ እምድኅረ ጕንዱይ መዋዕል በከመ ተጽሕፈ ዘቀዳሚ እስመ ይቤ ዳዊት «ዮም ለእመ ሰማዕክሙ ቃሎ ኢታጽንዑ ልበክሙ።»

⁸ ሶበሰ ሎሙ አዕረፎሙ ኢያሱ እምኢይቤ በእንተ ካልእ እምድኅረ እማንቱ መዋዕል።

⁹ ተዐውቀኬ ከመ ሀሎ ዕረፍት ኀበ ይበውኡ ሕዝበ እግዚአብሔር ቀዋሚ ዘይነብር።

¹⁰ እስመ ዘቦአ ውስተ ዕረፍት ናሁኬ አዕረፈ ውእቱ እምኵሉ ግብሩ በከመ አዕረፈ እግዚአብሔር እምኵሉ ግብሩ።

¹¹ ናስተፋጥን እንከ ከመ ንባእ ውስተ ዕረፍቱ ከመ ኢንደቅ ከማሆሙ ለእሙንቱ እለ ዐለዉ።

¹² እስመ ሕያው ቃለ እግዚአብሔር ወጽኑዕ ወይበልኅ እምኵሉ ሰይፍ ዘክልኤ አፉሁ ወይፈልጥ ነፍሰ እመንፈስ ወይሌሊ ሥርወ እመሌሊት ወየኀሥሥ ኅሊና ወፍትወተ ወምክረ ልብ።

¹³ ወአልቦ ዘተፈጥረ ዘኢኮነ ክሡተ በቅድሜሁ ወኵሉ ክሡት ወስጡሕ በቅድመ አዕይንቲሁ ወሎቱ ናወሥእ በእንተ ኵሉ ዘገበርነ።

በእንተ ሊቀ ካህናት ሰማያዊ

¹⁴ ወብነ ሊቀ ካህናት ዐቢይ ኢየሱስ ክርስቶስ ወልደ እግዚአብሔር ዘተለዐለ እምሰማያት ናጽንዕ እንከ አሚነ ቦቱ።

¹⁵ እስመ ኢኮነ ሊቀ ካህናቲነ ዘኢይክል ሐሚመ ለድካምነ ዳእሙ ምኩር በኵሉ አምሳሊነ ዘእንበለ ኀጢአት ባሕቲታ።

¹⁶ ንቅረብ እንከ በሞገስ ኀበ መንበረ ጸጋሁ ከመ ንንሣእ ሣህሎ ወንርከብ ጸጋሁ ይኩነነ ረድኤተ ለጊዜ ምንዳቤነ።