ኀበ ሰብእ ዕብራውያን 3 - ሐዲስ ኪዳን በልሳነ ግእዝ

ምዕራፍ 3 በእንተ ቤት ወበዓለ ቤት

¹ ወይእዜኒ አኀዊነ ቅዱሳን ወጽዉዓን እምሰማይ በጽዋዔ ከማነ ርእይዎ ለዝንቱ ሐዋርያክሙ ሊቀ ካህናት ዘኪያሁ ትትአመኑ ኢየሱስ ክርስቶስ።

² ጻድቅ ወምእመን ለዘፈነዎ በከመ ሙሴ ውእቱሂ ላዕለ ኵሉ ቤቱ።

³ ወባሕቱ የዐቢ ክብሩ እምዘሙሴ ፈድፋደ በከመ የዐቢ ክብሩ ለበዓለ ቤት እምነ ቤቱ።

⁴ እስመ ለኵሉ ቤት ሰብእ ይገብሮ ወለኵሉሰ እግዚአብሔር ገባሪሁ።

⁵ ወሙሴኒ ምእመን በኵሉ ቤቱ ከመ መጋቢሁ ከመ ይኩኖ ስምዖ በኵሉ ዘነበበ ግብር ዘሀለወ ይዘከር በእዴሁ።

⁶ ወክርስቶስሰ ከመ ወልድ ውስተ ቤቱ ወንሕነ ውእቱ ቤቱ እለ አመነ ለእመ ዐቀብነ ሞገሰነ ወምክሐነ ጽኑሕ ተስፋነ ለዝሉፉ።

⁷ እስመ ከመዝ ይቤ መንፈስ ቅዱስ «ዮም ለእመ ሰማዕክሙ ቃሎ ኢታጽንዑ ልበክሙ።

⁸ ከመ አመ አምረርዎ በዕለተ አመከርዎ በገዳም።

⁹ ዘአመከሩኒ አበዊክሙ ፈተኑኒ ወርእዩ ምግባርየ አርብዓ ዓመተ።

¹⁰ በእንተ ዝንቱ ተቈጣዕክዎሙ ለይእቲ ትውልድ ወእቤ ዘልፈ ይስሕት ልቦሙ ወእሙንቱሰ ኢያእመሩ ፍናውየ።

¹¹ በከመ መሐልኩ በመዓትየ ከመ ኢይበውኡ ውስተ ዕረፍትየ።»

¹² ዑቁ እንከ አኀዊነ ኢይትረከብ በላዕለ አሐዱ እምኔክሙ ልብ እኩይ ሕጹጸ ሃይማኖት ወኑፉቅ ዘያርሕቀክሙ እም እግዚአብሔር ሕያው።

¹³ አላ ሕቱ ነፍሰክሙ ኵሎ አሚረ አምጣነ ሀሎ ዕለት ዘይትበሀል ዮም ከመ ኢይጽናዕ መኑሂ እምኔክሙ ውስተ ስሒት ዘኀጢአት።

¹⁴ እስመ ምስለ ክርስቶስ ኮነ ለእመ አዝለፍነ ዐቂበ ዘቀዲሙ ሥርዐተነ እስከ ፍጻሜ በዛቲ ጽድቅ።

¹⁵ እስመ ይቤ «ዮም ለእመ ሰማዕክሙ ቃሎ ኢታጽንዑ ልበክሙ» ለአምርሮቱ።

¹⁶ ወእለ መኑ እለ ሰምዑ ወአምረርዎ አኮኑ ኵሎሙ እለ ወፅኡ በእደ ሙሴ እምግብፅ።

¹⁷ ወመኑ እሙንቱ እለ ተቈጥዖሙ አርብዓ ዓመተ አኮኑ እለ አበሱ ወወድቀ አብድንቲሆሙ ውስተ ገዳም።

¹⁸ ወላዕለ መኑ መሐለ ከመ ኢይበውኡ ውስተ ዕረፍቱ ዘእንበለ ለዐላውያን።

¹⁹ ወናሁ ንሬኢ ከመ ኢክህሉ በዊአ እስመ ኢአምኑ።