ኀበ ሰብአ ቈላስይስ 4 - ሐዲስ ኪዳን በልሳነ ግእዝ

ምዕራፍ 4

¹ አጋእዝትኒ ዕሩየ ግበሩ ሎሙ ለነባሪክሙ ወፍትሑ ጽድቀ ተአምሩ ከመ ብክሙ እግዚእ በሰማያት።

ጸሎት በእንተ ትምህርተ ወንጌል

² ወተፀመዱ ለጸሎት እንዘ ትተግሁ በአኰቴት።

³ ጸልዩ ወሰአሉ ለነሂ ከመ ያርኁ ለነ እግዚአብሔር አናቅጸ ቃል ከመ ንንግር ምክረ ዘእምኀበ እግዚአብሔር ዘበእንቲኣሁ ተሞቃሕኩ።

⁴ ከመ እክሥቶ በከመ ይደልወኒ እንግር።

⁵ ሑሩ በልቡና በኀበ ባዕዳን እምሃይማኖት።

⁶ ወይኩን ነገርክሙ በጸጋ ወቅሱመ በጼው ከመ ታእምሩ ዘትትዋሥኡ ለለአሐዱ አሐዱ።

⁷ ወኵሎ ዜናየ ይዜንወክሙ ጢኪቆስ እኁነ ምእመን ዘነኀብር ተቀንዮ ዘውእቱ እኁክሙ በእግዚአብሔር።

⁸ ዘፈነውክዎ ኀቤክሙ በእንተ ዝንቱ ግብር ከመ ታእምሩ ዜናየ ወያስተፍሥሕክሙ ልበክሙ።

⁹ ምስለ አናሲሞስ እኁነ ምእመን ዘናፈቅር ዘውእቱ ብእሲ እምኔክሙ ወእሙንቱ ያጤይቁክሙ ግብረነ ወዘሀሎነ ቦቱ።

¹⁰ አምኁክሙ አርስጥሮኮስ ዘተፄወወ ምስሌየ ወማርቆስ ወልደ እኅወ አቡሁ ለበርናባስ ዘበእንቲኣሁ አዘዝኩክሙ ከመ አመ መጽአ ኀቤክሙ ትትወከፍዎ።

¹¹ ወኢያሱ ዘተሰምየ ኢዩስጦስ እለ እምሰብአ ግዝረት ወእሉ ዳእሙ ረድኤትየ በግብረ መንግሥተ እግዚአብሔር ወአስተፍሥሑኒ።

¹² አምኀክሙ ኤጳፍራስ ዘእምኀቤክሙ ውእቱ ገብረ ክርስቶስ ወዘልፈ ይጼሊ በእንቲኣክሙ ወይስእል ከመ ትኩኑ ፍጹማነ ወምሉኣነ በኵሉ ሥምረተ እግዚአብሔር።

¹³ ወአነ ሰማዕቱ ከመ ፈድፋደ ያፈቅረክሙ ወይቴክዝ በእንቲኣክሙ ወለእለ በሎዶቅያ ወሀገረ ኢያራ።

¹⁴ አምኀክሙ ሉቃስ ዐቃቤ ሥራይ ፍቁርነ ወዴማስ።

¹⁵ አምኅዎሙ ለአኀዊነ እለ በሎዶቅያ ወንምፋን ወእለ ሀለዉ ቤተ ክርስቲያን።

¹⁶ ወአንቢበክሙ ዛተ መጽሐፈ ፈንውዋ ሎዶቅያ ያንብብዋ በቤተ ክርስቲያን ወካዕበ አንብብዋ አንትሙ ለመልእክት እንተ ጸሐፍኩ እምሎዶቅያ።

¹⁷ ወበልዎ ለአክርጳ ዑቅአ መልእክተከ ዘተሠየምከ እምኀበ እግዚአብሔር ከመ ትፈጽም።

¹⁸ ወአማኅኩክሙ ጽሒፍየ በእዴየ አነ ጳውሎስ ተዘከሩ መዋቅሕትየ ጸጋ ምስሌክሙ አሜን። ተፈጸመ መልእክት ኀበ ሰብአ ቈላስይስ፤ ወተጽሕፈ በሮሜ ወተፈነወ በእደ ጢኪቆስ። ወስብሐት ለእግዚአብሔር አሜን።