ኀበ ሰብአ ቈላስይስ 3 - ሐዲስ ኪዳን በልሳነ ግእዝ

ምዕራፍ 3 በእንተ ትንሣኤ ልቡና

¹ ወእመሰ ተንሣእክሙ ምስለ ክርስቶስ ዘላዕሉ ኅሡ ኀበ ሀሎ ክርስቶስ በየማነ እግዚአብሔር ይነብር።

² ዘላዕሉ ኀልዩ ወአኮ ዘበምድር።

³ እስመ ወዳእክሙ ሞትክሙ ወኅብእት ሕይወትክሙ ምስለ ክርስቶስ በኀበ እግዚአብሔር።

⁴ ወአመ ይመጽእ ክርስቶስ ይትዐወቅ ሕይወትክሙ ይእተ አሚረ ታስተርእዩ ምስሌሁ በስብሐት ዐቢይ።

⁵ አሙትዎ ለነፍስትክሙ ዘዲበ ምድር እምዝሙት ወርኵስ ወመንሱት ወፍትወት እኪት ወትዕግልት ዘውእቱ አምልኮ ጣዖት።

⁶ ዘበእንቲኣሁ ይመጽእ መቅሠፍተ እግዚአብሔር ላዕለ ውሉድ ዐላውያን።

⁷ ዘቦቱ ሖርክሙ አንትሙሂ ትካት አመ ሐየውክሙ በዝንቱ ግብር።

⁸ ወይእዜሰ ኅድግዋ ለመዓት ወለቍጥዓ ወለእከይ ወለፅርፈት ወለነገረ ኀፍረት ወነገረ ከንቱ ኢይፃእ እምአፉክሙ።

⁹ ወኢተሐስዉ ቢጸክሙ ዳእሙ ኅድግዎ ለብሉይ ብእሲ ምስለ እኩይ ምግባሩ።

¹⁰ ወልበስዎ ለሐዲስ ብእሲ ዘይትሔደስ በአእምሮ አምሳለ ፈጣሪሁ።

¹¹ ዘአልቦ በኀቤሁ አይሁዳዊ ወኢአረማዊ ኢግዙር ወኢቈላፍ ኢሐቃል ወኢሀገሪት ኢነባሪ ወኢአግዓዚ ዘእንበለ በኵሉ ወበኀበ ኵሉ ክርስቶስ።

¹² ልበስዎ እንከ ከመ ኅሩያነ እግዚአብሔር ቅዱሳን ወፍቁራን በምሕረት ወበተሣህሎ ወበኂሩት ወትሑት ልብ በየውሀት ወበትዕግሥት።

¹³ ጹርዎሙ ለቢጽክሙ ወተጻገዉ በበይናቲክሙ ኅድጉ ለቢጽክሙ ዘተሓየስክምዎሙ ከመ ክርስቶስ ጸገወክሙ ከማሁ አንትሙሂ ግበሩ።

¹⁴ ወምስለ ዝንቱ ኵሉ ተፋቀሩ ዘልፈ እስመ ማእሰረ ተፍጻሜቱ ውእቱ።

¹⁵ ወሰላሙ ለክርስቶስ ይጽናዕ በልብክሙ ዘሎቱ ተጸዋዕክሙ በአሐዱ ሥጋ ወሀልዉ በአኰቴተ ክርስቶስ።

¹⁶ ወአንብቡ መዝሙረ ወስብሐተ ወማኅሌተ ቅድሳት ወቃለ እግዚአብሔር ይጽናዕ በኀቤክሙ ከመ ትብዐሉ በኵሉ ጥበብ ወመሀሩ ነፍሰክሙ ወገሥጹ በመንፈስ ዘምሩ ለእግዚአብሔር በልብክሙ።

¹⁷ ወኵሎ ዘገበርክሙ በስመ እግዚእነ ኢየሱስ ክርስቶስ አእኵትዎ ለእግዚአብሔር አብ በእንቲኣሁ።

በእንተ ሠሪዐ ቤት

¹⁸ ወአንስትኒ ተአዘዛ ለአምታቲክን ከመ ዘለእግዚአብሔር።

¹⁹ ዕደውኒ አፍቅሩ አንስቲያክሙ ወኢትግአዝዎን።

²⁰ ውሉድኒ ተአዘዙ ለአዝማዲክሙ በኵሉ እስመ ከማሁ ርቱዕ ወይሠምር እግዚአብሔር።

²¹ አበውኒ ኢታስተቍጥዑ ውሉደክሙ ከመ ኢይኅዝኑ።

²² ነባሪኒ ተአዘዙ ለአጋእዝትክሙ በስፉሕ ልብ ወአኮ በአድልዎ ለገጸ ሰብእ አላ በፍርሀተ እግዚአብሔር።

²³ ተአምሩ ከመ እምኀበ እግዚአብሔር ትትዐሰዩ እስመ ለክርስቶስ ትትቀነዩ።

^24-25 ወዘሰ ዐመፀ ይረክብ ፍዳሁ ወኢያደሉ ሎቱ።