ኀበ ሰብአ ቈላስይስ 2 - ሐዲስ ኪዳን በልሳነ ግእዝ

ምዕራፍ 2 ተጋድሎ በእንተ አርዳእ

¹ ወእፈቅድ ታእምሩ መጠነ እትጋደል በእንቲኣክሙ ወበእንተ እለ በሎዶቅያ ወበእንተ ኵሎሙ እለ ኢርእዩኒ ገጽየ በሥጋየ።

² ከመ ይትፈሥሖሙ ልቦሙ ወይጽናዕ ትምህርቶሙ በተፋቅሮ ወበኵሉ ብዕለ ፍጻሜ በጥበብ ወበሃይማኖት ወበአእምሮ ምክሩ ለእግዚአብሔር ዘበእንተ ክርስቶስ።

³ ዘበኀቤሁ ሀሎ ኵሉ መዝገበ ጥበብ ወምክር ኅቡእ።

⁴ ወዘኒ ዘእብለክሙ ከመ አልቦ ዘያስሕተክሙ በኂጣነ ነገር።

⁵ አንሰ ለእመ ኢሀሎኩ በሥጋየ ኀቤክሙ በመንፈስየ ምስሌክሙ አነ ወናሁ እትፌሣሕ በዘእሬኢ ግዕዘክሙ ወሥርዐተክሙ ወጽንዐ ሃይማትክሙ ዘበክርስቶስ።

በእንተ ጽንዐ ሃይማኖት

⁶ ወበከመ ተወከፍክምዎ ለክርስቶስ እግዚእነ ቦቱ ሑሩ።

⁷ ወተሣረሩ ወተሐነጹ ቦቱ ወጽንዑ በሃይማኖት ዘተመሀርክሙ ከመ ትብዝኁ በአኰቴቱ።

⁸ ዑቁ ኢይኂጡክሙ በጥበበ ነገር ዘይዬውሁ ለከንቱ በሥርዐተ ትምህርተ ሰብእ ለስሒተ ዝንቱ ዓለም ወአኮ በሕገ ክርስቶስ።

⁹ ዘላዕሌሁ ኀደረ ኵሉ መለኮቱ በሥጋ ሰብእ።

¹⁰ ወአንትሙሂ ኩኑ ፍጹማነ ቦቱ እስመ ውእቱ ርእሱ ለኵሉ መኰንን ወለኵሉ መንግሥት።

¹¹ ዘቦቱ ተገዘርክሙ ግዝረተ ዘኢኮነ ግብረ እደ ሰብእ በስልበተ ሥጋ ነፍስተ ኀጢአት በግዝረተ ክርስቶስ።

¹² ወተቀበርክሙ ምስሌሁ በጥምቀት ወባቲ ተንሣእክሙ ምስሌሁ በሃይማኖት ወበረድኤተ እግዚአብሔር ዘአንሥኦ እሙታን።

¹³ ወአንትሙሂ እለ ነበርክሙ ምዉታነ በኀጢአትክሙ ወበቍልፈተ ነፍስትክሙ አሕየወክሙ ምስሌሁ ወጸገወክሙ ኵሎ ኀጢአተክሙ።

¹⁴ ወደምሰሰ ለነ መጽሐፈ ዕዳነ በሥርዐቱ እምዕድውነ ወአእተቶ እማእከሌነ ወቀነዎ በመስቀሉ።

¹⁵ ወበሰሊቦቱ አስተኀፈሮሙ ለቀደምት ወለመኳንንት ወአስተኀፈሮሙ በተከሥቶ ህላዌሁ።

በእንተ መብልዕ ወመስቴ ወካልኣን ኅርመታት

¹⁶ ዑቁ እንከ አልቦ ዘይግእዘክሙ ኢበመብልዕ ወኢበመስቴ ወኢበመክፈልተ በዓላት ወኢበአሥኅርት ወኢበሰናብት።

¹⁷ እስመ ዝንቱ ኵሉ ውእቱ ጽላሎቱ ለዘሀለዎ ይምጻእ ወአልቦ ዘያስተአብደክሙ በእንተ ሥጋሁ ለክርስቶስ።

¹⁸ ፈቂዶ በተየውሆ ወበተናሕስዮ ርእስ ከመ ትትአዘዙ ለሕርመተ መላእክት በዘኢርእየ ወይትሜካሕ በከንቱ በምክረ ሥጋሁ።

¹⁹ ወኢይጸንዕ በርእስ ዘቦቱ የኀድር ኵሉ ሥጋ ወይትዋደድ በአሥራው ወመሌሊት ወይልህቅ ወይጸንዕ ወይበዝኅ ወይመልእ በእግዚአብሔር።

²⁰ ወእመ ሞትክሙ ምስለ ክርስቶስ እምንብረተ ዝ ዓለም በእፎ ካዕበ ከመ ዘሕያዋን ውስተ ዓለም ትገብሩ።

²¹ ወይቤሉክሙ ኢትግሥሥ ወኢትልክፍ ወኢትጥዐም ዘንተ።

²² እስመ ዝንቱ ኵሉ ለሙስና በከመ ትእዛዘ ሰብእ።

²³ ዘያመስልዎ ጥበበ በእንተ ትሕትና ልብ ወፍርሀተ እግዚአብሔር ወኢምሒከ ሥጋ አልቦቱ ክብር ምንተኒ አላ ውእቱ ዘመልዕልተ ሥጋ።