ግብረ ሐዋርያት 6 - ሐዲስ ኪዳን በልሳነ ግእዝ

ምዕራፍ 6 በእንተ ሢመተ ሰብዐቱ ዲያቆናት

¹ ወውእተ አሚረ በዝኁ ሕዝብ ወግዕዝዎሙ እለ እምአረሚ አርድእት ለአይሁድ እስመ ይሬእይዎን ለመበለታቲሆን እንዘ ኢይፀመዳ ኵሎ አሚረ ወያሰትታ ተልእኮቶን።

² ወጸውዕዎሙ ዐሠርቱ ወክልኤቱ ለኵሉ ሕዝብ ወይቤልዎሙ ኢይደልወነ ከመ ንኅድግ ቃለ እግዚአብሔር ወንፀመድ ማእዳተ።

³ ኅረዩ እምውስቴትክሙ ሰብዐተ ዕደወ እለ ምሉኣን መንፈሰ ቅዱሰ ወጥበበ እለ ንሠይም ዲበ ዝ ግብር።

⁴ ወንሕነሰ ንፀመድ ጸሎተ ወመልእክተ ቃሉ ወኀብሩ ኵሎሙ ሕዝብ።

⁵ ወሠናየ ኮነ ዝ ነገር በኀቤሆሙ ወኀረዩ እስጢፋኖስሃ ብእሴ ዘምሉእ ሃይማኖተ ወመንፈሰ ቅዱሰ ወፊልጶስ ወጰርኮሮን ወኒቃሮና ወጢሞና ወጳርሜና ወኒቃላዎስ ፈላሴ ዘሀገረ አንጾኪያ።

⁶ ወአቀምዎሙ ቅድመ ሐዋርያት ወጸለዩ ወወደዩ እደዊሆሙ ላዕሌሆሙ።

⁷ ወዐብየ ቃለ እግዚአብሔር ወበዝኁ ሕዝብ በኢየሩሳሌም ፈድፋደ ወብዙኃን እምውስተ ካህናት እለ አምኑ።

ዘከመ ተቃወምዎ አይሁድ ለእስጢፋኖስ

⁸ ወእስጢፋኖስሰ ምሉአ ጸጋ እግዚአብሔር ወኀይል ወይገብር ዐቢየ ተኣምረ ወመንክረ በውስተ ሕዝብ።

⁹ ወቦ እለ ተንሥኡ እምኵራብ እንተ ስማ ሊቤርጢኖን ወቀርኔዎን ወእለክስንድሬዎን ወእለሂ እምቂልቅያ ወእስያ ወተኃሠሥዎ ለእስጢፋኖስ።

¹⁰ ወስእኑ ታቃውሞቶ እስመ በጥበብ ወበመንፈስ ይትናገሮሙ።

¹¹ ወእምዝ አቅጸሩ ሎቱ ዕደወ ሰማዕተ ሐሰት ወመሀርዎሙ ከመ ይበሉ ሰማዕናሁ ለዝ ብእሲ እንዘ ይነብብ ነገረ ፅርፈት ላዕለ ሙሴ ወላዕለ እግዚአብሔር።

¹² ወሆክዎሙ ለሕዝብ ወለረበናት ወለጸሐፍት ወሮድዎ ወሰሐብዎ ወተባጽሕዎ ኀበ ዐውድ።

¹³ ወአቀሙ ሎቱ ሰማዕተ ሐሰት ወይቤሉ ዝ ብእሲ አበየ ያርምም እንዘ ይነብብ ፅርፈተ ዲበ ቤተ መቅደስ ወዲበ ኦሪት።

¹⁴ ወሰማዕናሁ እንዘ ይብል ኢየሱስ ናዝራዊ ይነሥቶ ለቤተ መቅደስ ወይስዕር ኦሪተክሙ ዘወሀበክሙ ሙሴ።

¹⁵ ወነጸርዎ ኵሎሙ እለ ይነብሩ ዐውደ ወርእዩ ገጾ ከመ ገጸ መልአከ እግዚአብሔር።