ግብረ ሐዋርያት 5 - ሐዲስ ኪዳን በልሳነ ግእዝ

ምዕራፍ 5 በእንተ ሐናንያ ወብእሲቱ

¹ ወሀሎ አሐዱ ብእሲ ዘስሙ ሐናንያ ወስመ ብእሲቱ ሰጲራ ወሤጡ ዐጸዶሙ።

² ወቀሠጡ መንፈቀ ሤጡ ተማኪሮሙ ምስለ ብእሲቱ ወአምጽኡ መንፈቀ ሤጡ ወአንበሩ ታሕተ እግረ ሐዋርያት።

³ ወይቤሎ ጴጥሮስ ኦ ሐናንያ እፎ መልአ ሰይጣን ውስተ ልብከ ከመ ተሐስዎ ለመንፈስ ቅዱስ ወትቅሥጥ እምሤጠ ዐጸድከ።

⁴ አኮኑ ለከ ነበረ እምቅድመ ትሢጦ ወሶበሂ ሤጥኮ በፈቃድከ ለምንትኬ ኀለይከ በልብከ ትግበር ከመዝ ለእግዚአብሔርኬ ሐሰውኮ ወአኮ ለሰብእ።

⁵ ወሰሚዖ ዘንተ ነገረ ሐናንያ ተነጽሐ ወሞተ ወኮነ ዐቢይ ግርማ ወፈርሁ ኵሎሙ እለ ሰምዑ።

⁶ ወተንሥኡ መሐዛት እምኔሆሙ ወጾርዎ፥ ወገነዝዎ ወአውፅእዎ ወቀበርዎ።

⁷ ወእምዝ እምድኅረ ሠለስቱ ሰዓት መጽአት ብእሲቱ ወኢያእመረት ዘኮነ ምታ ወቦአት።

⁸ ወይቤላ ጴጥሮስ ንግርኒ እስኩ በመጠነዝኑ ሤጥክሙ ዐጸደክሙ ወትቤ እወ ከማሁ።

⁹ ወይቤላ ጴጥሮስ በእፎ እንከ ኀበርክሙ ታመክርዎ ለመንፈስ ቅዱስ ናሁኬ እገሪሆሙ ለእለ ቀበርዎ ለምትኪ ኀበ ኆኅት ወእሙንቱ ይወስዱኪ ኪያኪኒ።

¹⁰ ወተነጽሐት ሶቤሃ ታሕተ እገሪሁ ወሞተት ወቦኡ ወራዙት ወረከቡ በድና ወወሰድዋ ወቀበርዋ ኀበ ምታ።

¹¹ ወኮነ ዐቢይ ግርማ ወፈርሁ ኵሎሙ አብያተ ክርስቲያናት ወእለ ሰምዕዎ ለዝ ነገር።

¹² ወበእደዊሆሙ ለሐዋርያት ይትገበር ተኣምር ወመንክር ብዙኅ በውስተ ሕዝብ ወሀለዉ ኅቡረ በቤተ መቅደስ ውስተ ሕዋረ ሰሎሞን።

¹³ ወእምዝ እንከ አልቦ ዘተኀበለ ይስሐጦሙ ዳእሙ አክበርዎሙ ሕዝብ ወአዕበይዎሙ።

¹⁴ ወብዙኃን ይትዌሰኩ እለ የአምኑ በእግዚእነ ወብዙኃን ዕደው ወአንስት።

በእንተ ፈውሶ ድዉያን

¹⁵ ወያመጽኡ ድውያነ በዐራታት ወያነብርዎሙ ኀበ ዐውድ ከመ ይብጽሖሙ ጽላሎቱ ለጴጥሮስ ሶበ የኀልፍ ወይትፌውሱ እምደዌሆሙ።

¹⁶ ወይመጽኡ ብዙኃን እምአህጉረ አድያም ዘኢየሩሳሌም ወያመጽኡ ድዉያነ ወእለ አጋንንት እኩያን ወየሐይዉ ኵሎሙ።

በእንተ ቅንአተ ሊቃነ ካህናት

¹⁷ ወተንሥኡ ሊቀ ካህናት ወእለ ምስሌሁ ወሕዝበ ሰዱቃውያን ወቀንኡ ዲቤሆሙ።

¹⁸ ወአኀዝዎሙ ለሐዋርያት ወአውዓልዎሙ ሙዓለ ውስተ ቤተ ሞቅሕ።

¹⁹ ወመልአከ እግዚአብሔር አርኀወ አናቅጸ ቤተ ሞቅሕ በሌሊት ወአውፅኦሙ ወይቤሎሙ።

²⁰ ሑሩ ባኡ ምኵራበ ወመሀርዎሙ ለሕዝብ ዘንተ ነገረ ሕይወት።

²¹ ወሰሚዖሙ ዘንተ ጌሡ ነግሀ በጽባሕ ወቦኡ ምኵራበ ወመሀሩ ወሊቃነ ካህናትሰ ወእለ ምስሌሆሙ አስተጋብኡ ዐውዶሙ ወኵሎ ሊቃነ ቤተ እስራኤል ወለአኩ ቤተ ሞቅሕ ያምጽእዎሙ ለሐዋርያት።

²² ወበጽሑ ወዓልያኒሆሙ ወኀጥእዎሙ ወተሠወጡ ወነገርዎሙ።

²³ ወይቤልዎሙ ረከብነ ቤተ ሞቅሕ ንሡገ ወቅቱረ ወዝጉሐ እንተ ኵለሄ ወሠገራት የዐቅቡ አናቅጺሁ ወአርኂወነ አልቦ ዘረከብነ በውስጥ።

²⁴ ወሰሚዖሙ ዘንተ ነገረ ሊቃነ ካህናት ወመገብተ ምኵራብ ኀጥኡ ዘይገብሩ ወይቤሉ ምንትኑ እንጋ ዝ ነገር።

²⁵ ወመጽአ አሐዱ ወይቤሎሙ ነዮሙ እሙንቱ እደው እለ ሞቃሕክምዎሙ ውስተ ምኵራብ ይቀውሙ ወይሜህሩ ለሕዝብ።

²⁶ ወእምዝ ሖረ መጋቤ ምኵራብ ምስለ ወዓሊሁ ያምጽእዎሙ እንዘ ይዬውህዎሙ እስመ ይፈርህዎሙ ለሕዝብ ኢይውግርዎሙ።

²⁷ ወአምጽእዎሙ ወአቀምዎሙ ማእከለ ዐውድ ወሐተትዎሙ ሊቃነ ካህናት።

²⁸ ወይቤልዎሙ አኮኑ ከላእናክሙ ከመ ኢትምሀሩ በስሙ ለኢየሱስ ወኢለመኑሂ ወናሁ መላእክምዋ ትምህርተክሙ ለኢየሩሳሌም ወትፈቅዱኑ ታግብኡ ላዕሌነ ደሞ ለዝ ብእሲ።

²⁹ ወተሰጥዎሙ ጴጥሮስ ምስለ ሐዋርያት ወይቤሎሙ ይኄይሰነ ናደሉ ለእግዚአብሔር እምነ አድልዎ ለሰብእ።

³⁰ አምላከ አበዊነ አንሥኦ ለኢየሱስ ዘአንትሙ ዐለውክምዎ ወሰቀልክምዎ ዲበ ዕፅ ወቀተልክምዎ።

³¹ ኪያሁ ረሰዮ እግዚአብሔር መልአከ ሕይወት ወአልዐሎ በየማኑ ወወሀቦሙ ለእስራኤል ንስሓ ከመ ይትኀደግ ሎሙ ኀጢአቶሙ።

³² ወንሕነ ሰማዕቱ ለዝንቱ ነገር ወመንፈስ ቅዱስ ዘወሀቦሙ እግዚአብሔር ለእለ የአምኑ ቦቱ።

³³ ወሰሚዖሙ ዘንተ ተምዕዑ ወሐቀዩ ስነኒሆሙ ወፈቀዱ ይቅትልዎሙ።

በእንተ ምክረ ገማልያል

³⁴ ወተንሥአ አሐዱ እምውስተ ዐውድ እምሕዝበ ፈሪሳውያን ዘስሙ ገማልያል መምህረ ኦሪት ወክቡር ውእቱ በኀበ ኵሉ ሕዝብ ወአዘዘ ያእትትዎሙ ለሐዋርያት ሕቀ እምውስተ ዐውድ።

³⁵ ወይቤሎሙ አንትሙ ሰብአ እስራኤል አድኅኑ ርእሰክሙ ወዑቁ በእንተ እሉ ሰብእ ዘከመ ትገብሩ።

³⁶ ቀዲሙኒ እምቅድመዝ መዋዕል ተንሥአ ቴዎዳስ ዘግብጽ ወአዕበየ ርእሶ ወተለውዎ አርባዕቱ ምእት ሰብእ ወጠፍአ ውእቱኒ ወኵሎሙ እለ አምኑ ቦቱ ተዘርዉ ወኮኑ ከመ ዘኢተፈጥሩ።

³⁷ ወእምድኅሬሁ ተንሥአ ይሁዳ ዘገሊላ በመዋዕል ዘተጽሕፉ ሰብእ በእንተ ጸባሕት ወተለውዎ ብዙኃን ሕዝብ ወሞተ ውእቱሂ ወእለ ተለውዎሂ ተዘርዉ ኵሎሙ።

³⁸ ወይእዜኒ እብለክሙ ኅድግዎሙ ለእሉ ሰብእ ወኢትስሐጥዎሙ ለእመሁ ዘእምኀበ ሰብእ ዝ ምክሮሙ ወዝ ግብሮሙ የኀልፍ ወይሰዐር።

³⁹ ወለእመ እምኀበ እግዚአብሔር ኮነ ኢትክሉ አኅድጎቶሙ ወከመ ዘምስለ እግዚአብሔር ይትበአስ ኢትኩኑ።

⁴⁰ ወኦሆ አበሎሙ ወጸውዕዎሙ ለሐዋርያት ወቀሠፍዎሙ ወገሠጽዎሙ ኢይንግሩ እንከ በስሙ ለኢየሱስ ወኀደግዎሙ።

⁴¹ ወወፅኡ እምዐውድ እንዘ ይትፌሥሑ እስመ ከፈሎሙ መንፈስ ቅዱስ ከመ ያኅሥርዎሙ በእንተ ስሙ።

⁴² ወኵሎ አሚረ ይፀመዱ ትምህርተ በቤተ መቅደስ ወውስተ ቤትኒ ኢኀደጉ ነጊረ በእንተ እግዚእነ ኢየሱስ ክርስቶስ።