ግብረ ሐዋርያት 4 - ሐዲስ ኪዳን በልሳነ ግእዝ

ምዕራፍ 4 በእንተ ቅንአቶሙ ለሊቃነ ካህናት ወመገብተ ምኵራብ

¹ ወእንዘ ይነግሮሙ ለሕዝብ መጽኡ ሊቃነ ካህናት ወመገብተ ምኵራብ ወሰዱቃውያን።

² ወቀንኡ ላዕሌሆሙ እስመ ይሜህርዎሙ ለሕዝብ ወይነግርዎሙ በእንተ ኢየሱስ ከመ ሐይወ እምዉታን።

³ ወአኀዝዎሙ ወአውዐልዎሙ ሙዓለ እስከ ጌሠም እስመ ወድአ መስየ።

⁴ ወብዙኃን ሰብእ እለ ሰምዕዎ ለዝ ነገር ወአምኑ ወኮነ ኍልቆሙ ለዕደው እለ አምኑ መጠነ ኀምሳ ምእት።

⁵ ወእምዝ በሳኒታ ተጋብኡ መላእክት ወረበናት ወጸሐፍት በኢየሩሳሌም።

⁶ ወሐና ሊቀ ካህናት ወቀያፋ ወዮሐንስ ወእለ እስክንድሮስ ወኵሎሙ ዘመደ ካህናት።

⁷ ወአቀምዎሙ ማእከለ ዐውድ ወሐተትዎሙ ወይቤልዎሙ በኀይለ መኑ ወበስመ መኑ ገበርክሙ ዘንተ አንትሙ።

በእንተ አውሥኦተ ጴጥሮስ

⁸ ወመልአ መንፈስ ቅዱስ ሶቤሃ ላዕለ ጴጥሮስ ወይቤሎሙ ስምዑ መላእክተ ሕዝብ ወረበናት።

⁹ ለእመሁ ንሕነ ንትኴነን ኀቤክሙ በእንተ ረድኤተ ሕሙም ዘኮነ ዮም በምንትኑ እንከ ሐይወ ዝንቱ።

¹⁰ አእምሩ እንከ ጥዩቀ ኵልክሙ ወኵሉ ቤተ እስራኤል ከመ በስሙ ለኢየሱስ ክርስቶስ ናዝራዊ ዘአንትሙ ቀተልክምዎ ወእግዚአብሔር አንሥኦ እሙታን ወቦቱ ሐይወ ዝንቱ ወቆመ ቅድሜክሙ።

¹¹ እስመ ውእቱ እብን ዘመነንክምዎ አንትሙ ነደቀት ወውእቱ ኮነ ውስተ ርእሰ ማእዘንት።

¹² ወአልቦ ካልእ ሕይወት በዘየሐይዉ ወአልቦ ካልእ ስም በታሕተ ሰማይ ዘይትወሀብ ለዕጓለ እመሕያው።

በእንተ ከሊአ ትምህርት

¹³ ወሶበ ርእይዎሙ ለጴጥሮስ ወለዮሐንስ ከመ ገሃደ ይነግርዎሙ አእመርዎሙ ከመ ሰብእ የዋሃን እሙንቱ ወኢየአምሩ መጽሐፈ ወአንከርዎሙ እስመ የአምርዎሙ ዘልፈ ከመ ምስለ ኢየሱስ ሀለዉ።

¹⁴ ወይሬእይዎ ለዝኩሂ ብእሲ ዘሐይወ ይቀውም ምስሌሆሙ ወኀጥኡ ዘይብሉ ወዘይነብቡ።

¹⁵ ወአእተትዎሙ ሕቀ እምዐውድ ወተናገሩ በበይናቲሆሙ።

¹⁶ ወይቤሉ ምንተ ንሬስዮሙ ለእሉ ሰብእ ናሁ ተዐውቀ ትምህርቶሙ በኀበ ኵሎሙ እለ ይነብሩ ኢየሩሳሌም ወገሃደ ኮነ ወኢንክል ከቢቶቶ።

¹⁷ ዳእሙ ከመ ፈድፋደ ኢይብዛኅ በላዕለ ሕዝብ ንገሥጾሙ ከመ ዳግመ ኢይንግሩ በስሙ ለኢየሱስ ለሰብእ።

¹⁸ ወጸውዕዎሙ ወይቤልዎሙ ግሙራ ኢትንግሩ ወኢትምሀሩ በስሙ ለኢየሱስ።

በእንተ አውሥኦተ ሐዋርያት

¹⁹ ወተሰጥውዎሙ ጴጥሮስ ወዮሐንስ ወይቤልዎሙ ይረትዕኑ በቅድመ እግዚአብሔር ኪያክሙ ንስማዕ ወአኮ ለእግዚአብሔር ፍትሑ እስኩ ለሊክሙ።

²⁰ ንሕነሰኬ ኢንክል ከቢቶቶ ለዝንቱ ነገር።

²¹ ወእምዝ ገሠጽዎሙ ወኀደግዎሙ ሶበ ኀጥኡ በዘይኴንንዎሙ እስመ ኵሉ ሕዝብ የአኵቱ እግዚአብሔርሃ በእንተ ውእቱ ተኣምር ዘኮነ።

²² እስመ ፈድፈዶ እምአርብዓ ዓመት ለውእቱ ብእሲ ዘበላዕሌሁ ኮነ ዝ ተኣምረ ሕይወት።

²³ ወተፈቲሖሙ ሖሩ ኀበ ሰብኦሙ ወነገርዎሙ ኵሎ ዘይቤልዎሙ ሊቃነ ካህናት ወረበናት።

በእንተ አእኵቶቶሙ እግዚአብሔርሃ

²⁴ ወሰሚዖሙ ዘንተ አንሥኡ ቃሎሙ ኅቡረ ኀበ እግዚአብሔር ወይቤሉ አንተ እግዚአብሔር አምላክ ዘገበርከ ሰማየ ወምድረ ወባሕረ ወኵሎ ዘውስቴቶሙ።

²⁵ ዘለሊከ ነበብከ በመንፈስ ቅዱስ በአፈ ዳዊት ገብርከ አቡነ ወትቤ «ለምንት አንገለጉ አሕዛብ ወሕዝብኒ ነበቡ ከንቶ።

²⁶ ወተንሥኡ ነገሥተ ምድር ወመላእክትኒ ተጋብኡ ምስሌሆሙ ኅቡረ ላዕለ እግዚአብሔር ወላዕለ መሲሑ።»

²⁷ አማን አንገለጉ በዛቲ ሀገር ላዕለ ቅዱስ ወልድከ ኢየሱስ ዘቀባዕካሁ ሄሮድስ ወጲላጦስ ጴንጤናዊ ምስለ ሕዘቢሆሙ ወሕዝበ እስራኤል።

²⁸ ከመ ይግበሩ በከመ ሥርዐተ እዴከ ወምክርከ ከመ ይኩን።

²⁹ ወይእዜኒ እግዚኦ ርኢ ትምክሕቶሙ ወሀቦሙ ለአግብርቲከ ገሃደ ይንግሩ ቃለከ።

³⁰ ወትስፋሕ እዴከ ወትግበር ትእምርተ ወመንክረ በስመ ወልድከ ኢየሱስ ክርስቶስ ንጹሕ።

³¹ ወእንዘ ይጼልዩ አድለቅለቀ ውእቱ መካን ኀበ ሀለዉ ይነብሩ ኅቡረ ጉቡኣን ወመልአ መንፈስ ቅዱስ ዲበ ኵሎሙ ወነገሩ ቃለ እግዚአብሔር ገሃደ።

በእንተ ማኅበር

³² ወኵሎሙ እለ አምኑ በአሐዱ ልብ ወበአሐቲ ነፍስ ወአልቦ እምውስቴቶሙ ዘይብል ዝሰ ዚኣየ ንዋይ አላ ዘኵሎሙ ኅቡረ።

³³ ወዐቢየ ኀይለ ይገብሩ ሐዋርያት ስምዐ ተንሥኦቱ ለእግዚእ ኢየሱስ ወዐቢይ ሞገስ ቦሙ በኀበ ኵሉ።

³⁴ ወአልቦ እምውስቴቶሙ ጽኑስ ወኵሉ ዘቦ ቤት ወዐጸድ ይሠይጡ ወያመጽኡ ሤጦ።

³⁵ ወያነብሩ ታሕተ እገሪሆሙ ለሐዋርያት ወእሙንቱ ይከፍሉ ለጽኑሳን ለለአሐዱ በከመ መፍቅዱ።

³⁶ ወሀሎ አሐዱ ብእሲ ዘስሙ ዮሴፍ ዘይብልዎ በርናባስ እምውስተ ሐዋርያት ወበትርጓሜሁ ይብልዎ ወልደ ፍሥሓ ሌዋዊ ዘምድረ ቆጵሮስ።

³⁷ ወቦ ገራህት ወሤጠ ወአምጽአ ሤጦ ወአንበረ ታሕተ እግረ ሐዋርያት።