ግብረ ሐዋርያት 3 - ሐዲስ ኪዳን በልሳነ ግእዝምዕራፍ 3 በእንተ ተኣምር ቀዳሚት ዘኮነት በእደ ሐዋርያት 1 ወዐርጉ ምኵራበ ጴጥሮስ ወዮሐንስ ጊዜ ተሱዓት ለጸሎት። 2 ወሀሎ አሐዱ ብእሲ ዘፅዉስ እገሪሁ ወተወልደ ከማሁ እምከርሠ እሙ ወይጸውርዎ ኵሎ ዕለተ ወያነብርዎ በኆኅተ ምኵራብ እንተ ስማ ኦርያ ከመ ይሰአል ምጽዋተ እምኀበ እለ ይበውኡ ምኵራበ። 3 ወርእዮሙ ለጴጥሮስ ወለዮሐንስ ይበውኡ ምኵራበ ወሰአሎሙ የሀብዎ ምጽዋተ። 4 ወተመይጥዎ ጴጥሮስ ወዮሐንስ ኀቤሁ ወይቤልዎ ተመየጥ መንገሌነ። 5 ወነጸረ ኀቤሆሙ ወተሰፈወ የሀብዎ ምጽዋተ። 6 ወይቤሎ ጴጥሮስ ወርቅሰ ወብሩር አልብየ ወእምዘብየሰ እሁበከ ናሁ በስሙ ለኢየሱስ ክርስቶስ ናዝራዊ ተንሥእ ወሑር። 7 ወአኀዞ በእዴሁ ዘየማን ወአንሥኦ ወተንሥአ ሶቤሃ ወጸንዐ እገሪሁ ወሐቌሁ። 8 ወሖረ ምስሌሆሙ እንዘ ይሠግር ወቦአ ምኵራበ ወአእኰተ እግዚአብሔርሃ። 9 ወርእይዎ ኵሎሙ ሕዝብ እንዘ የሐውር ወየአኵት እግዚአብሔርሃ። 10 ወአእመርዎ ከመ ውእቱ ዘይነብር በኆኅተ ምኵራብ እንተ ስማ ኦርያ ወይስእል ወደንገፁ ወአንከሩ በእንተ ተኣምር ዘኮነ ላዕሌሁ። 11 ወእንዘ ይእኅዝዎ ጴጥሮስ ወዮሐንስ ይበውኡ ምኵራበ ሮጹ ኵሉ ሕዝብ ኀቤሆሙ ኀበ ሕዋረ ሰሎሞን ድንጉፃኒሆሙ። ዘከመ ተናገረ ጴጥሮስ ለሕዝብ 12 ወሶበ ርእዮሙ ጴጥሮስ ለሕዝብ ይቤሎሙ አንትሙ ሰብአ እስራኤል ምንተኑ ታነክሩነ ወምንተኑ ትኔጽሩነ ከመ ዘበኀይልነ ገበርናሁ ወከመ ዘበሥልጣንነ ረሰይናሁ አው እምኀበ ነፍሳቲነኑ አሕየውናሁ ለዝንቱ ከመ ይሑር በእገሪሁ አልቦኬ። 13 አላ አምላከ አብርሃም ወአምላከ ይስሐቅ ወአምላከ ያዕቆብ አምላከ አበዊነ ሰብሖ ለወልዱ ኢየሱስ ክርስቶስ ዘአንትሙ ዐለውክምዎ ወክሕድክምዎ በቅድመ ገጸ ጲላጦስ ፈቂዶ ውእቱ ያሕይዎ ለክሙ። 14 ወአንትሙሰ ክሕድክምዎ ለቅዱስ ወለጻድቅ ወሰአልክሙ ብእሴ ቀታሌ ነፍስ ያሕዩ ለክሙ። 15 ወለመልአከ ሕይወትሰ ቀተልክምዎ ወእግዚአብሔር አንሥኦ እሙታን ወንሕነ ኵልነ ሰማዕቱ። 16 ከመ በሃይማኖተ ስሙ ለዝ ዘትሬእዩ ወተአምሩ አጽንዖ ወበሃይማኖተ ዚኣሁ ወሀቦ ዘንተ ሕይወተ በቅድሜክሙ። 17 ወይእዜኒ አኀውየ አአምር ከመ በኢያእምሮ ገበርክምዎ ለዝ ከመ ገብሩ መላእክቲክሙ። 18 ወእግዚአብሔርሰ በከመ አቅደመ ነጊረ በአፈ ኵሎሙ ነቢያት ከመ ይትቀተል ክርስቶስ አብጽሐ ከማሁ። 19 ወይእዜኒ ነስሑ ወተጠመቁ ወይደመሰስ ለክሙ ኀጢአትክሙ ወይመጽእ ለክሙ መዋዕለ ሣህል እምቅድመ ገጹ ለእግዚአብሔር። 20 ወይፌንዎ ለክሙ ለኢየሱስ ክርስቶስ ዘአቅደመ ቀቢዐ። 21 ዘኪያሁ ይሴፈዉ ሰማያት ወምድር እስከ አመ ያስተራትዕ ኵሎ በከመ ነበበ እግዚአብሔር በአፈ ነቢያቲሁ ቅዱሳን እለ እምዓለም። 22 ሙሴሂ ይቤሎሙ ለአበዊነ «ነቢየ ያነሥእ ለክሙ እግዚአብሔር አምላክነ እምአኀዊክሙ ዘከማየ ወሎቱ ስምዕዎ ኵሎ ዘይቤለክሙ። 23 ወኵላ ነፍስ እንተ ኢትሰምዖ ለውእቱ ነቢይ ለትሠረው እምሕዝባ።» 24 ወኵሎሙ ነቢያት እለ እምአመ ሳሙኤል ነቢይ ወእለሂ እምድኅሬሁ ነገሩ ወአይድዑ በእንተ እላንቱ መዋዕል። 25 ወአንትሙ ውሉዶሙ ለነቢያት ወውሉደ ሥርዐት ዘሠርዖ እግዚአብሔር ለአበዊነ እስመ ይቤሎ ለአብርሃም «በዘርዕከ ይትባረኩ ኵሎሙ አሕዛበ ምድር።» 26 ወለክሙ ቀደመ አንሥኦቶ እግዚአብሔር ለወልዱ ወፈነዎ ይባርክሙ ከመ ትነስሑ ኵልክሙ እምእከይክሙ። |