ግብረ ሐዋርያት 28 - ሐዲስ ኪዳን በልሳነ ግእዝ

ምዕራፍ 28 በእንተ አረሚ እለ ይነብሩ መላጥያ

¹ ወእምድኅረዝ አእመርነ ከመ ይእቲ ደሴት ትሰመይ መላጥያ።

² ወመሐሩነ አረሚ እለ ይነብሩ ህየ ወአሠነዩ ላዕሌነ ወአንደዱ እሳተ ወአስተጋብኡነ ለኵልነ ከመ ንስሓን እምጽንዐተ ቍር ወእምብዝኀተ ዝናም።

ዘከመ ኢረከቦ ሕሡም ለጳውሎስ እም ሕምዘ አፍዖት

³ ወአስተጋብአ ጳውሎስ ብዙኀ ሐሠረ ወወገረ ላዕለ እሳት ወወፅአት አፍዖት እምላህበ እሳት ወነሰከቶ እዴሁ ለጳውሎስ ወኮነት ስቅልተ ላዕሌሁ።

⁴ ወሶበ ርእዩ አረሚ አፍዖተ ስቅልተ ላዕለ እደ ጳውሎስ ተባሀሉ በበይናቲሆሙ ዝንቱ ብእሲ ይመስል ቀታሌ ነፍስ ድኂኖ እምባሕር ኢኀደጎ ፍርደ እግዚአብሔር ከመ ይሕየው።

⁵ ወነገፈ ጳውሎስ እዴሁ ወነጽሓ ለአፍዖት ውስተ እሳት ወኢረከቦ ሕሠም።

⁶ ወእሙንቱሰ መሰሎሙ ከመ በጊዜሃ ይመውት ወቆሙ ጕንዱየ እንዘ ይኔጽርዎ ወሶበ ርእዩ ከመ አልቦ ዘብእሶ መለሱ ካዕበ ቃሎሙ ወይቤሉ አምላክ ውእቱ።

በእንተ ፑፕልዩስ

⁷ ወሀለወት ውስተ ውእቱ መካን ዐጸዱ ለብእሲ ዘስሙ ፑፕልዩስ ወሥዩም ውእቱ በይእቲ ደሴት ወተወክፈነ ኀቤሁ ውስተ ማኅደሩ ሠሉሰ መዋዕለ በትፍሥሕት።

⁸ ወሀሎ አሐዱ ሕሙም አቡሁ ለፑፕልዩስ ዘቦቱ ሕማመ አማዑት ወቦአ ኀቤሁ ጳውሎስ ወጸለየ ወአንበረ እዴሁ ላዕሌሁ ወአሕየዎ።

⁹ ወሶበ ርእዩ ዘንተ ተአምረ ዘገብረ አምጽኡ ኀቤሁ ኵሎ ድዉያነ ዘውስተ ውእቱ ደሴት ወአሕየዎሙ።

¹⁰ ወአክበሩነ ፈድፋደ ዐቢየ ክብረ ወሶበ ወፃእነ እምኀቤሆሙ አስነቁነ በሑረትነ።

በእንተ ፀአቶሙ እምደሴት

¹¹ ወእምድኅረ ሠለስቱ አውራኅ ዐረግነ ዲበ ሐመረ እስክንድርያ ዘከረመት በይእቲ ደሴት ወባቲ ላዕሌሃ ለይእቲ ሐመር ትእምርተ ዲዮስቆሮስ ዘውእቱ አምላከ ኖትያት።

¹² ወእምህየ ነገድነ ወበጻሕነ ሰራፉስ ወነበርነ ህየ ሠሉሰ መዋዕለ።

በእንተ ሑረቶሙ ራቅዩን

¹³ ወነገድነ እምህየ ወበጻሕነ ለሀገረ ራቅዩን ወበሳኒታ ወፃእነ ወእምድኅረ አሐቲ ዕለት ነፍኀ ነፋስ እምገቦሃ ወወሰደነ ክልኤተ ዕለተ እስከ አብጽሐነ ቀርጠበሉስ እንተ ሀገረ አንጾኪያ።

በእንተ ብጽሐቶሙ ሮሜ

¹⁴ ወረከብነ በህየ አኀዊነ ወአእተዉነ ወነበርነ ኀቤሆሙ ሰቡዐ መዋዕለ ወእምዝ ሖርነ ወበጻሕነ ሮሜ።

¹⁵ ወሶበ ሰምዑ አኀዊነ እለ ሀለዉ ህየ ወፅኡ ወተቀበሉነ እስከ ምሥያጥ ዘስሙ አፍዩስፋሩስ ወእስከ ሠለስቱ ከዋኒት ወሶበ ርእዮሙ ጳውሎስ አእኰተ እግዚአብሔርሃ ወተጸናዕነ።

¹⁶ ወቦዊአነ ሮሜ መጠወ ሐቢ ሙቁሓነ ለሠርዌ ሐራ ወለጳውሎስሰ አብሖ ከመ ይንበር ኀበ ፈቀደ ወባሕቱ ዐቃቢሁሰ ምስሌሁ።

በእንተ ተናግሮቱ ምስለ ሊቃውንተ አይሁድ

¹⁷ ወእምድኅረ ሠለስቱ ዕለት ለአከ ጳውሎስ ይጸውዕዎሙ ለሊቃውንተ አይሁድ ወመጽኡ ኀቤሁ ብዙኃን ሰብእ ወሶበ ተጋብኡ ይቤሎሙ አኀዊነ አልቦ እኩይ ዘገበርኩ ዲበ ሕዝብ ወኢዲበ ኦሪት ወበከመ ሞቅሑኒ በኢየሩሳሌም መጠዉኒ ለሰብአ ሮሜ።

¹⁸ ወሐቲቶሙ እሙንቱ ፈቀዱ ያሕይዉኒ ሶበ ኢረከቡ ላዕሌየ ጌጋየ በዘይሞቅሑኒ ወበዘይኴንኑኒ።

¹⁹ ወሶበ ተንሥኡ አይሁድ ይትቃወሙኒ ተማሕፀንኩ ሎሙ በቄሣር ንጉሥ ወአኮሰ ከመ አስተዋድዮሙ ለሕዝብየ።

²⁰ ወበእንተዝኬ አስተብቋዕኩክሙ ከመ ትምጽኡ ኀቤየ ከመ አስምዕክሙ ወእንግርክሙ እስመ በእንተ ተስፋሆሙ ለእስራኤል ተሞቃሕኩ በዝንቱ ሰናስል።

በአንተ አውሥኦተ አይሁድ

²¹ ወይቤልዎ ረበናተ አይሁድ ለነሰ ኢበጽሐነ መጽሐፈ መልእክት እምድረ ይሁዳ በእንቲኣከ ወኢአሐዱ እምአኀው እለ መጽኡ እምኢየሩሳሌም ኢተናገረ ቅድመ ወኢዜነወነ በእንቲኣከ በነገር እኩይ።

²² አላ ንሕነ ንፈቱ ንስማዕ እምኔከ አሚኖተከ ወበእንተ ትምህርተ ሕግ ዘትብል እስመ ሰማዕነ ከመ በኵለሄ ትትካሐዱ።

በእንተ ዕድሜ ዘዐደመ ጳውሎስ

²³ ወእምዝ ዐደሞሙ ዕለተ በዘይመጽኡ ኀቤሁ ወመጽኡ ኀቤሁ ብዙኃን ኀበ ሀሎ የኀድር ወነገሮሙ በእንተ መንግሥተ እግዚአብሔር እንዘ ያሰምዖሙ ወያአምኖሙ በእንተ እግዚእነ ኢየሱስ እምኦሪተ ሙሴ ወእምነቢያት እምነግህ እስከ ሠርክ።

²⁴ ወቦ እለሂ አምንዎ ወመንፈቆሙሰ አበይዎ።

በእንተ ቃለ ኢሳይያስ ዘአስምዐ ጳውሎስ

²⁵ ወእንዘ ኢየኀብሩ ተመይጡ እምኀቤሁ ወይቤሎሙ ጳውሎስ ሠናየ ይቤ መንፈስ ቅዱስ በቃለ ኢሳይያስ ነቢይ ለአበዊክሙ እንዘ ይብል።

²⁶ «ሑር ኀበ ዝንቱ ሕዝብ ወበሎ ሰሚዐ ትሰምዑ ወኢትሌብዉ ወርእየ ትሬእዩ ወኢተአምሩ።

²⁷ እስመ ገዝፈ ልቦሙ ለዝ ሕዝብ ወደንቀወ እዘኒሆሙ ወከደኑ አዕይንቲሆሙ ከመ ኢይርአዩ በአዕይንቲሆሙ ወኢይስምዑ በእዘኒሆሙ ወኢይለብዉ በልቦሙ ወኢይትመየጡ ኀቤየ ወኢይሣሀሎሙ።»

በእንተ ሕይወተ አሕዛብ

²⁸ አእምሩ እንከ ከመ ለአሕዛብ ትከውን ዛቲ ሕይወት እንተ እምኀበ እግዚአብሔር ወእሙንቱ እለ ይሰምዕዎ ወይሌብዉ ወይትኤዘዙ ሎቱ።

²⁹ ወዘንተ ሶበ ይብሎሙ ወፅኡ አይሁድ ወሖሩ እንዘ ይትጋዐዙ በበይናቲሆሙ ፈድፋደ።

በእንተ ጸውዖቱ አሕዛበ

³⁰ ወነበረ ጳውሎስ ኀበ መካን ዘተዐሰበ በንዋዩ ክልኤተ ዓመተ ወይትቄበል ኵሎ ዘአተወ።

³¹ ወይጼውዖሙ ለመንግሥተ እግዚአብሔር ወይሰብክ ወይሜህር በእንተ እግዚእነ ኢየሱስ ክርስቶስ እንዘ ክሡተ ይነግር ወአልቦ ዘይከልኦ።

³² እስመ ውእቱ ቦአ ኀበ ኔሮን በቀዳማይ ጊዜ ወሞአ ወሖረ በሰላም ወነበረ እምድኅረዝ ኑኀ ክልኤቱ ዓመት ወወፅአ።

³³ ወእምዝ ተመይጠ ወአጥመቀ አዝማዲሁ ለኔሮን ወስምዐ ኮነ በሰይፍ ዕጉሠ። እስከዝ ነገር አብጽሐ ሉቃስ በዜናሁ ወዘተሰወረ እምኔሁ እስመ ትረክብ አንተ በቀዳማይ ፍካሬ መልእክቱ ለጳውሎስ ዜና ግብሩ ለጳውሎስ። ተፈጸመ መጽሐፈ ግብረ ልኡካን ዘጸሐፎ ሉቃስ ወንጌላዊ። ወስብሐት ለእግዚአብሔር አሜን።