ግብረ ሐዋርያት 27 - ሐዲስ ኪዳን በልሳነ ግእዝ

ምዕራፍ 27 በእንተ ትእዛዘ ፊስጦስ

¹ ወእምዝ አዘዘ ፊስጦስ ይሰድዎ ኀበ ቄሣር ኢጣልያ ወተውህበ ጳውሎስ ወካልኣንኒ ሙቁሓን ምስሌሁ ለብእሲ እምነ ሐራ ሰብስጥያ ዘስሙ ዩልዮስ ሐቤ ምእት።

² ወሶበ ወፃእነ ከመ ንንግድ ረከብነ ሐመረ እምአሕማረ አድራማጢስ እንተ ትፈቅድ ሐዊረ ብሔረ እስያ ወነገደ ምስሌነ አርስጠርኮስ መቄዶናዊ ዘሀገረ ተሰሎንቄ።

³ ወበሳኒታ በጻሕነ ሲዶና ወመሐሮ መልአክ ለጳውሎስ ወአብሖ ይሑር ኀበ አርካኒሁ ከመ ያዕርፍ ኀቤሆሙ።

⁴ ወእምዝ ሖርነ እምህየ ወበጻሕነ አድያመ ቆጵሮስ እስመ ነፋስ እምገጽነ።

⁵ ወቦእነ ባሕረ ቂልቂያ ወጵንፍልያ ወሖርነ ለሙራ ዘብሔረ ሉቅያ ይእቲ።

⁶ ወበህየ ረከበ መልአክ ሐመረ እስክንድርያ እንተ ተሐውር ኢጣልያ ወአብአነ ውስቴታ።

⁷ ወይእቲሰ ሐመር ክብደ ሖረት ወእምድኅረዝ በብዙኅ መዋዕል በጻሕነ ለገጸ ደሴተ ቀኒዶስ ወበእንተ ጽንዐ ነፋስ ኢክህልነ ሐዊረ ርቱዐ ወነገድነ አድያመ አቅራጥስ ለገጸ ሀገረ ስልማና።

⁸ ወእምዕፁብ እንዘ ነሐውር ንሕነ ጥቃሃ በጻሕነ ለመካን ዘስማ መርስ ሠናይት ዘቅርብት ለሀገር እንተ ስማ ለአስ።

⁹ ወጐንደይነ ህየ ብዙኀ መዋዕለ እስከ ቦአ ዕለተ ጾመ አይሁድ ወበጽሐ መዋዕል ዘኢይክሉ ሰብእ ነጊደ በባሕር ውእተ ጊዜ ወእምዝ አምከሮሙ ጳውሎስ ወይቤሎሙ።

¹⁰ ስምዑኒ ኦ ወራዙት እስመ እሬኢ ንግደተነ በብዙኅ ምንዳቤ ወኀጕል ዐቢይ ወዘንተ ዘእብል አኮ በእንተ ጾረ ሐመር ባሕቲቱ ዓዲ ነፍሰነሂ ታኀጕሉነ ኅድጉ እስመ እፈርህ።

¹¹ ወመልአክሰ ለሰብአ ሐመር ወለሐዳፊ ይትኤዘዞሙ ወይትዌከፍ ቃሎሙ ወለጳውሎስሰ ኢይሰምዖ ወኢይትዌከፍ ቃሎ።

¹² ወውእቱሰ መርሶ ኢይደሉ ይክርሙ ውስቴቱ ክረምተ ወበእንተዝ አፍቀሩ ብዙኃን ከመ ይፃኡ እምህየ ለእመ ተክህሎሙ ከመ ይብጽሑ ለካልእ መርሶ ዘፊንቂ ዘመንገለ አቅራጥስ ዘስሙ ኤውንቄ ዘመንገለ የማን።

¹³ ወነፍኀ ነፋሰ አዜብ ወመሰሎሙ ዘይበጽሑ በከመ ፈቃዶሙ ወአልዐሉ ሥራዐ ወሖሩ ደወለ አቅራጥስ።

በእንተ ጽኑዕ ነፋስ

¹⁴ ወእምድኅረ ኅዳጥ መዋዕል መጽአ ላዕሌሆሙ ነፋስ ጽኑዕ ጥፉንቂስ ዘይብልዎ አውራቂስ ወይእቲ ነፋስ እንተ ስማ ሰልቢባ።

¹⁵ ወተለዐለት ሐመርነ ወተዘብጠት ወኢክህሉ ኖትያት ቀዊመ ቅድመ ገጸ ነፋስ ወኀደግዋ ወሖረት።

¹⁶ ወእምዝ ነፍኀ ነፋስ እስከ ቦእነ ደሴተ እንተ ስማ ቄዳ ወእምዕፁብ ክህልነ ከመ ናርግዝ ሐመረነ።

¹⁷ ወእምዝ ታሓጊዘነ አጽናዕናሃ በአሕባል ወእምዝ ሶበ ፈርሁ ከመ ኢይደቁ ውስተ ልጐተ ባሕር አውረዱ ሥራዐ ወረሰይነ ንሑር ከማሁ።

በእንተ እለ ገደፉ ንዋዮሙ

¹⁸ ወበሳኒታ ጸንዐ ላዕሌነ መዋግድ ወገደፍነ አልባሲነ ውስተ ባሕር።

¹⁹ ወበሣልስታሂ ገደፍነ ኵሎ ዘውስተ ሐመር ዲበ ባሕር በእደዊነ።

²⁰ ወነበረ ይዘንም ላዕሌነ ጕንዱየ ዕለተ እንዘ ኢንሬኢ ፀሐየ ወወርኀ ወኢከዋክብተ ወቀበጽነ ሐዪወ።

በእንተ ዘተናገረ ጳውሎስ ለእለ ውስተ ሐመር

²¹ ወአልቦ ዘበልዐ መብልዐ እምኔነ ወተንሥአ ጳውሎስ ወቆመ ማእከለ ወይቤሎሙ ሶበ ሰማዕክሙኒ ቀዲሙ አኀውየ ወኢወፃእክሙ እምአቅራጥስ እምድኅንክሙ እምዝ ኀጕል ወሕማም።

²² ወይእዜኒ እብለክሙ ኢትፍርሁ እስመ አልቦ ዘይትኀጐል አሐዱ ነፍስ እምኔነ ዘእንበለ ዳእሙ ሐመርነ።

²³ እስመ ቆመ ኀቤየ በዛቲ ሌሊት መልአከ እግዚአብሔር ዘአነ ሎቱ ወኪያሁ አመልክ።

²⁴ ወይቤለኒ ኢትፍራህ ጳውሎስ ሀለወከ ትቁም ቅድመ ቄሣር ወናሁ ጸገወከ እግዚአብሔር ኵሎሙ እለ ነገዱ ምስሌከ።

²⁵ ወይእዜኒ ተፈሥሑ አኀውየ እስመ እትአመን በእግዚአብሔር ከመ ይከውን በከመ ይቤለኒ።

²⁶ ወባሕቱ ንበጽሕ አሐተ ደሴተ።

በእንተ እለ መሰሎሙ ዘበጽሑ ምድረ

²⁷ ወአመ ዐሡር ወረቡዕ ጊዜ መንፈቀ ሌሊት መሰሎሙ ኖትያት ከመ ዘበጽሑ ምድረ።

²⁸ ወአውረዱ ሐብለ ወረከቡ ዕሥራ በቆመ ብእሲ ወተአተቱ እምህየ ወአውረዱ ካዕበ ወረከቡ ዐሠርተ ወኀምስተ በቆም።

²⁹ ወፈርሁ ከመ ኢይደቁ ውስተ መካን ዘቦቱ ኰኵሕ ወከመ ኢይትጐዳእ ሐመሮሙ ወአውረዱ አርባዕተ መልሕቀ ውስተ ባሕር እንተ ድኅረ ሐመር ወጸለይነ ከመ ፍጡነ ይጽባሕ።

³⁰ ወእምዝ ሶበ ፈቀዱ ይትኀጥኡ ኖትያት እምሐመር አውረዱ እምኔሃ ራግናተ ውስተ ባሕር ከመ ይደሐሉ ቦቱ ወያጽንዑ ሐመሮሙ በምድር።

በእንተ ዘይቤ ጳውሎስ ለሐቢ

³¹ ወርእዮ ጳውሎስ ይቤሎሙ ለሐቢ ወለሠገራት እምከመ ኢነበሩ እሉ ኖትያት ውስተ ሐመር ኢንክል ሐዪወ።

³² ወተንሥኡ ሠገራት ወመተሩ ሶቤሃ አሕባለ ራግናት ወኀደግዋ ትደቅ።

³³ ወጸቢሖ ብሔር አስተብቍዖሙ ጳውሎስ ለኵሎሙ ይብልዑ እክለ ወይቤሎሙ ዐሡር ወረቡዕ ዮም እምዘኢበላዕክሙ እክለ።

³⁴ ወዮምኒ ብቍዑኒ ምስሑ ወብልዑ ወርድኡ ነፍሰክሙ እስመ አልቦ ዘይትኀጐል እምኔክሙ ወኢሥዕርተ ርእስክሙ።

³⁵ ወዘንተ ብሂሎ ነሥአ ኅብስተ ወአእኰተ እግዚአብሔርሃ ወከፈለ ቅድመ ኵሎሙ ወወሀቦሙ ወአኀዙ ይብልዑ።

³⁶ ወተናዘዙ ኵሎሙ ወጥዕሙ።

³⁷ ወኮነ ፍቅዶሙ ለእለ ሀለዉ ውስተ ሐመር ክልኤቱ ምእት ወሰብዓ ወስድስቱ ነፍስ።

³⁸ ወተሴስዮሙ አቅለሉ ሐመረ ወነሥኡ ሥርናየ ዘውስተ ሐመር ወወገሩ ውስተ ባሕር።

በእንተ ድቀተ ሐመር

³⁹ ወጸቢሖ መዓልት ኢፈለጡ ኖትያት ውእተ ምድረ ወኢያእመሩ ዘየሐውሩ ወባሕቱ ርእዩ አድባረ ደሴት ዘቅሩብ ለሐይቀ ባሕር ወፈቀዱ ያብጽሑ ሐመሮሙ ህየ።

⁴⁰ ወመተሩ መልሕቀ ወኀደጉ ውስተ ባሕር ወአሠነዩ ምቅዋመ ወሰቀሉ ሥራዐ ዘይንእስ በከመ ንፍኀተ ነፋስ ወሖርነ መንገለ ሐይቀ ባሕር።

⁴¹ ወተለክአት ሐመር ማእከለ ክልኤቱ አእባን ልዑላን ወባሕሩ ዕሙቅ ወተእኅዘት እምቅድሜሃ ወኢያንቀልቀለት ወተሰብረት ወተመትረት ገቦሃ ዘድኅር እሞገድ ወእምቅድሜሃሰ ኢክህሉ ኖትያት።

ዘከመ ኀለዩ ይቅትሉ ሙቁሓነ

⁴² ወተማከሩ ሠገራት ከመ ይቅትሉ ሙቁሓነ ከመ ኢይጽብቱ ወኢያምሥጡ።

⁴³ ወከልኦሙ ሐቢ እስመ ፈቀደ ያድኅኖ ለጳውሎስ ወለእለ የአምሩ ጸቢተ አዘዞሙ ይጽብቱ ወይፃኡ ለሐይቅ።

⁴⁴ ወእለ ተርፉ ዐደዉ ላዕለ ዕፀ ሐመር ወሰላድው ወካልኣን ዐደዉ በአሕባለ ሐመር ወወፅኡ ኵሎሙ ወበጽሑ ምድረ በዘከመዝ ግብር።