ግብረ ሐዋርያት 16 - ሐዲስ ኪዳን በልሳነ ግእዝ

ምዕራፍ 16 በእንተ ጢሞቴዎስ

¹ ወበጽሐ ሀገረ ደርቤን ወልስጥራን ወረከበ አሐደ ረድአ ዘስሙ ጢሞቴዎስ ወእሙሰ አይሁዳዊት ወአምነት ወአቡሁሰ አረማዊ።

² ወይንእድዎ ኵሉ ቢጹ እለ በልስጥራን ወደርቤን ወኢቆንዮን።

በእንተ አሰስሎተ ምክንያት

³ ወአፍቀረ ጳውሎስ ይንሥኦ ምስሌሁ ወይሑር ወነሥኦ ወገዘሮ በእንተ አይሁድ እለ ውስተ ውእቱ ብሔር እስመ የአምርዎ ኵሎሙ ከመ አረማዊ አቡሁ።

⁴ ወሖሩ አህጉረ ወመሀርዎሙ ሥርዐተ ሐዋርያት ዘአዘዙ ኀቢሮሙ በኢየሩሳሌም ምስለ ቀሲሳን።

⁵ ወጸንዑ አብያተ ክርስቲያናት በሃይማኖት ወእንተ ጸብሐት ይበዝኁ ሕዝብ።

⁶ ወሖሩ ብሔረ ፍርግያ ወብሔረ ገላትያ ወከልኦሙ መንፈስ ቅዱስ ኢይንግሩ ቃለ እግዚአብሔር በእስያ።

⁷ ወበጺሖሙ ሚስያ ፈቀዱ ይሑሩ ቢታንያ ወኢያብሖሙ መንፈሱ ለእግዚእ ኢየሱስ።

በእንተ ብእሲ ዘአስተርአዮ ለጳውሎስ

⁸ ወኀሊፎሙ እምነ ሚስያ ወረዱ ጢሮአዳ።

⁹ ወአስተርአዮ ለጳውሎስ በሌሊት ብእሲ መቄዶናዊ ይቀውም ወያስተበቍዖ ወይቤሎ ኅልፍ እንተ መንገሌነ ለመቄዶንያ ወነዓ ርድአነ።

¹⁰ ወርእዮ ዘንተ ፈቀድነ ንሑር እንተ መቄዶንያ እስመ መሰለነ ዘጸውዐነ እግዚአብሔር ንምሀሮሙ ሃይማኖተ።

¹¹ ወወፂአነ እምጢሮአዳ አፍጠነ ወበጻሕነ ሰሞትራቄ ወበሳኒታ ሖርነ ሀገረ እንተ ስማ ናጱሌ።

¹² ወእምህየ ፊልጵስዩስ እንተ ይእቲ ቀዳሚተ መቄዶንያ ወይእቲ ሀገረ ቆሎንያ ወነበርነ በይእቲ ሀገር ኅዳጠ መዋዕለ።

በእንተ ብእሲት ሠያጢተ አጌ

¹³ ወወፃእነ በዕለተ ሰንበት እምአንቀጸ ሀገር መንገለ ድንጋገ ፈለግ እስመ ቤተ ጸሎት ህየ ሀሎ ወነበርነ ወአኀዝነ ከመ ንንግር ለአንስት እለ ተጋብኣ ህየ።

¹⁴ ወሀለወት ማእከሎን አሐቲ ብእሲት ሠያጢተ አጌ እንተ ሀገረ ትያጥሮን ፈራሂተ እግዚአብሔር ወታጸምዕ ትምህርቶ ለጳውሎስ እስመ ከሠተ እግዚአብሔር እዝና ወስማ ልድያ።

¹⁵ ወተጠምቀት ምስለ ኵሉ ሰብኣ ወአስተብቍዐተነ ወትቤለነ ለእመሁ ረሰይክሙኒ መሃይምተ ለእግዚአብሔር ባኡ ቤትየ ወኅድሩ ወአገበረተነ ብዙኀ።

በእንተ ወለት እንተ ይትዋረዳ ጋኔን

¹⁶ ወእንዘ ነሐውር ለጸሎት ረከበተነ አሐቲ ወለት እንተ ይትዋረዳ ጋኔን ወታገብእ ለአጋእዝቲሃ ብዙኀ ብነተ እምዘ ትነሥእ ሐፍሥ።

¹⁷ ወእምዝ ተለወት ድኅሬሁ ለጳውሎስ ወድኅሬነ እንዘ ትኬልሕ ወትብል እሉ ዕደው አግብርተ እግዚአብሔር ልዑል እሙንቱ ወይሜህሩክሙ ፍኖተ ሕይወት።

¹⁸ ወከመዝ ትገብር ብዙኀ መዋዕለ ወአጽሐቀቶ ለጳውሎስ ወተመይጠ ወይቤሎ ለውእቱ መንፈስ እኤዝዘከ በስሙ ለእግዚእነ ኢየሱስ ክርስቶስ ከመ ትፃእ ወኀደጋ በጊዜሃ።

በእንተ እለ ሰከይዎሙ ለጳውሎስ ወለሲላስ

¹⁹ ወርእዮሙ አጋእዝቲሃ ከመ አልቦ እምኀበ ታገብእ ብነታ አኀዝዎሙ ለጳውሎስ ወለሲላስ ወሰሐብዎሙ እንተ ምሥያጥ ወአብጽሕዎሙ ኀበ መኳንንት።

²⁰ ወይቤሉ እሉ ዕደው የሀውኩ ሀገረ ወአይሁድ እሙንቱ።

²¹ ወይሜህሩ ለነ ሕገ ዘኢይከውነነ ለገቢር እንዘ ሰብአ ሮሜ ንሕነ።

በእንተ ተዘብጦቶሙ ወተሞቅሖቶሙ

²² ወተጋብኡ ሕዝብ ወመኳንንት ወአኀዙ ይዝብጥዎሙ በበትር ወሠጠጡ አልባሲሆሙ።

²³ ወዘበጥዎሙ ብዙኀ ወሞቅሕዎሙ ወአዘዝዎ ለዐቃቤ ቤተ ሞቅሕ ያጽንዕ ዐቂቦቶሙ።

²⁴ ወተአዚዞ ሞቅሖሙ ውስተ ውሳጤ ቤተ ሞቅሕ ወአጽንዐ እገሪሆሙ ውስተ ጕንድ።

በእንተ ጸልዮቶሙ ውስተ ቤተ ሞቅሕ

²⁵ ወጊዜ መንፈቀ ሌሊት ጸለዩ ጳውሎስ ወሲላስ ወሰብሕዎ ለእግዚአብሔር ወሙቁሓን ይሰምዕዎሙ።

²⁶ ወሶቤሃ አድለቅለቀ ዐቢይ ድልቅልቅ ወአንቀልቀለ መሠረተ ቤተ ሞቅሕ ወተርኅወ በጊዜሃ ኵሉ አንቀጽ ወተፈትሑ መዋቅሕቲሆሙ ለኵሎሙ።

²⁷ ወሶበ ነቅሀ ዐቃቤ ቤተ ሞቅሕ ርእየ ርኅወ ኵሎ አናቅጸ ወመልሐ መጥባሕቶ ወፈቀደ ይትረገዝ ለሊሁ እስመ መሰሎ ዘአምሠጡ ሙቁሓን።

²⁸ ወከልሐ ሎቱ ጳውሎስ ወይቤሎ ኢትግበር እኩየ ዲበ ነፍስከ እስመ ሀሎነ ኵልነ ዝየ።

²⁹ ወአምጽአ ማኅቶተ ወሖረ እንዘ ይርዕድ እንተ ውስጥ ወሰገደ ኀበ ጳውሎስ ወሲላስ።

³⁰ ወአውፅኦሙ አፍኣ ወይቤሎሙ አጋእዝትየ ምንተ እግበር ከመ እድኀን።

³¹ ወይቤልዎ እመን በእግዚእነ ኢየሱስ ክርስቶስ ወተሐዩ አንተ ወኵሉ ቤትከ።

³² ወነገርዎ ቃለ እግዚአብሔር ሎቱ ወለኵሉ ሰብኡ።

³³ ወነሥኦሙ ሶቤሃ በሌሊት ወኀፀቦሙ እምቅሥፈቶሙ ወተጠምቀ ውእቱኒ ወኵሉ ሰብኡ በጊዜሃ።

³⁴ ወአዕረጎሙ ውስተ ቤቱ ወሠርዐ ማእደ ወተፈሥሐ ውእቱ ወኵሉ ቤቱ በአሚነ እግዚእነ።

በእንተ ፀአቶሙ እምቤተ ሞቅሕ

³⁵ ወጸቢሖ ለአኩ መኳንንት ወዓልያኒሆሙ እንዘ ይብሉ ፍትሕዎሙ ለእሉ ዕደው ወኅድግዎሙ ይሑሩ።

³⁶ ወሰሚዖ ዐቃቤ ቤተ ሞቅሕ ነገሮሙ ዘ ነገረ ለጳውሎስ ወለሲላስ ከመ ለአኩ መኳንንት ይኅድግዎሙ ወይቤሎሙ ይእዜኒ ሑሩ በሰላም።

³⁷ ወይቤልዎ ቀሠፉነ ገሃደ ዘአልብነ አበሳ እንዘ ሰብአ ሮሜ ንሕነ ወሞቅሑነ ወይእዜኒ ጽሚተ ያውፅኡነ ይፈቅዱ ጽሚተሰኬ አበይነ ይምጽኡ ለሊሆሙ ያውፅኡነ።

³⁸ ወሖሩ ወነገርዎሙ ወዓልያኒሆሙ ዘንተ ነገረ ለመኳንንት ወፈርሁ ሰሚዖሙ ከመ ሰብአ ሮሜ እሙንቱ።

³⁹ ወመጽኡ ወአስተብቍዕዎሙ ከመ ይፃኡ እምብሔሮሙ።

⁴⁰ ወወፂኦሙ እምቤተ ሞቅሕ ቦኡ ቤተ ልድያ ወረከቡ ቢጾሙ ወመሀርዎሙ ወወፅኡ።