ግብረ ሐዋርያት 15 - ሐዲስ ኪዳን በልሳነ ግእዝ

ምዕራፍ 15 በእንተ ቢጽ ሐሳውያን

¹ ወቦ እለ ወረዱ እምብሔረ ይሁዳ ወመሀርዎሙ ለሕዝብ ወይቤልዎሙ እምከመ ኢተገዘርክሙ በሕገ ሙሴ ኢትክሉ ሐዪወ።

² ወተሀውኩ ሕዝብ ፈድፋደ ወተዋቀሥዎሙ ለጳውሎስ ወለበርናባስ ወመከሩ ከመ ይፈንውዎሙ ለጳውሎስ ወለበርናባስ ወለቢጾሙኒ ኀበ ሐዋርያት ወቀሲሳን እለ በኢየሩሳሌም በእንተዝ ነገር።

³ ወተፈኒዎሙ እምቤተ ክርስቲያን በጽሑ ፊንቄ ወሰማርያ ወነገርዎሙ ዘከመ ተመይጡ አሕዛብ ወገብሩ ዐቢየ ፍሥሓ ምስለ ኵሎሙ ቢጾሙ።

በእንተ ብጽሐቶሙ ኢየሩሳሌም

⁴ ወበጺሖሙ ኢየሩሳሌም ተቀበልዎሙ ቤተ ክርስቲያን ወሐዋርያት ወቀሲሳን ወዜነውዎሙ ኵሎ ዘከመ ገብረ ሎሙ እግዚአብሔር በውስተ አሕዛብ።

⁵ ወቦ እለ ተንሥኡ እምሕዝበ ፈሪሳውያን ቢጽ እለ አምኑ ወይቤልዎሙ ርቱዕ ይትገዘሩ ወነአዝዞሙ ይዕቀቡ ሕገ ሙሴ።

ጉባኤ ሐዋርያት ቀዳሚት

⁶ ወአንገለጉ ሐዋርያት ወቀሲሳን ከመ ይርአዩ ዘይገብሩ በእንተዝ ነገር።

⁷ ወእምድኅረ ተዋቀሥዎሙ በዐቢይ ጋዕዝ ተንሥአ ጴጥሮስ ወይቤሎሙ ስምዑ አኀዊነ ለሊክሙ ተአምሩ ከመ እምትካት ኀረየኒ እግዚአብሔር ከመ አስምዖሙ ቃለ አፉየ ለአሕዛብ ወትምህርተ ወንጌሉ ወይእመኑ።

⁸ ወእግዚአብሔር ማእምረ ልብ ሰማዕተ ኮኖሙ ወወሀቦሙ መንፈሰ ቅዱሰ ከማነ።

⁹ ወኢፈለጦሙ እምኔነ አንጺሖ ልቦሙ በሃይማኖት።

¹⁰ ወይእዜኒ ኢታመክርዎ ለእግዚአብሔር ወኢታስክምዎሙ አርዑተ ዲበ ክሣውዲሆሙ ለአሕዛብ ዘኢክህልነ ጸዊሮቶ ኢንሕነ ወኢአበዊነ።

¹¹ ዳእሙ ከመ ንሕየው በጸጋ እግዚእነ ኢየሱስ ክርስቶስ ንትአመን ወከማሁ እሙንቱሂ።

¹² ወሶቤሃ አርመሙ ኵሉ ሕዝብ ወአጽምዕዎሙ ለጳውሎስ ወለበርናባስ እንዘ ይነግሩ ኵሎ ዘገብረ ሎሙ እግዚአብሔር ተአምረ ወመንክረ በውስተ አሕዛብ።

በእንተ ተሰጥዎተ ያዕቆብ

¹³ ወእምድኅረ አርመሙ ተሰጥወ ያዕቆብ ወይቤ ስምዑ አኀዊነ።

¹⁴ ስምዖንሂ ነገረ ዘከመ አቅደመ ተሣሀሎ እግዚአብሔር ለአሕዛብ ወነሥአ ሕዝበ እምውስቴቶሙ ለስሙ።

¹⁵ ወየኀብሩ ቃለ ነቢያት በዝንቱ በከመ ይብል መጽሐፍ።

¹⁶ «ወእምድኅረዝ አገብኣ ወአሐንጻ ለቤተ ዳዊት ዘወድቀት ወእነድቅ መዝበራ።

¹⁷ ከመ ይኅሥሥዎ ለእግዚአብሔር እለ ተርፉ ዕጓለ እመሕያው ወኵሎሙ አሕዛብ እለ ተሰምየ ዲቤሆሙ ስምየ ይቤ እግዚአብሔር ዘገብረ ዘንተ።»

¹⁸ ወይትዐወቅ ለእግዚአብሔር ዘእምፍጥረተ ዓለም።

¹⁹ ወይእዜኒ እብለክሙ ኢታክብዱ ላዕለ አሕዛብ እለ ተመይጡ ኀበ እግዚአብሔር።

²⁰ ዳእሙ አዝዝዎሙ ይርሐቁ እምዘ ይዘብሑ ለአማልክት ወእማውታ ወደም ወእምዝሙት ወዘይጸልኡ ለርእሶሙ ኢይግበሩ ዲበ ቢጾሙ።

²¹ ወሙሴሂ ቦ እምቀዲሙ ዘይሰብክ ሎሙ በበአህጉር ወያነብብዎ በመኳርብት በኵሉ ሰናብት።

በእንተ መልእክተ ሐዋርያት

²² ወእምዝ ኀብሩ ሐዋርያት ወቀሲሳን ወኵሉ ሕዝብ ከመ ይኅረዩ እምውስቴቶሙ ዕደወ ዘይፌንዉ አንጾኪያ ምስለ ጳውሎስ ወበርናባስ ወኀረዩ ይሁዳሃ ዘተሰምየ በርስያን ወሲላስሃ ዕደወ ሊቃውንተ በውስተ ቢጾሙ።

²³ ወጸሐፉ በእደዊሆሙ መልእክተ እንተ ትብል ከመዝ እምልኡካን ወቀሲሳን ለአኀው ለእለ በአንጾኪያ ወሶርያ ወቂልቅያ አኀዊነ እለ አምኑ እምውስተ አሕዛብ ሰላም ለክሙ ወትፍሥሕት።

²⁴ እስመ ሰማዕነ ከመ ቦ እለ ወፅኡ እምኔነ ወሆክዋ ለነፍስክሙ በነገር እንዘ ይብሉ ተገዘሩ ወዕቀቡ ሕገ ኦሪት ዕደው እለ ኢአዘዝናሆሙ ወኢበአሐቲኒ እምዝንቱ ነገር ዘይቤሉክሙ።

²⁵ ወርኢነ እምድኅረ ተጋባእነ ኵልነ በአሐዱ ምክር ወኀቢረነ ኀረይነ ዕደወ ዘንፌኑ ኀቤክሙ ምስለ አኀዊነ በርናባስ፥ ወጳውሎስ።

²⁶ ዕደው እለ መጠዉ ነፍሶሙ በእንተ ስሙ ለእግዚእነ ኢየሱስ ክርስቶስ።

²⁷ ወፈነውነ ይሁዳሃ ወሲላስሃ ወእሙንቱ ያጤይቁክሙ በቃሎሙ ዘንተ።

²⁸ እስመ ኀብረ መንፈስ ቅዱስ ምስሌነ ከመ ኢናክብድ ወኢንወስክ ባዕደ ዘእንበለ ዳእሙ ንኤዝዘክሙ ዘንተ ትኅድጉ በግብር።

²⁹ ወኢትብልዑ ዝቡሐ ለአማልክት ማውታ ወደመ ወትርኀቁ እምዝሙት ወዘትጸልኡ ለርእስክሙ ኢትግበሩ ዲበ ቢጽክሙ ወለእመ ዐቀብክሙ ነፍሰክሙ እምእሉ ምግባራት ትሄልዉ በሰላም ዳኅነ ሀልዉ።

በእንተ እለ ተፈንዉ እምኀበ ሐዋርያት

³⁰ ወተፈኒዎሙ እሙንቱ ወረዱ አንጾኪያ ወአስተጋብኡ ሕዝበ ወመጠውዎሙ መጽሐፈ መልእክት።

³¹ ወአንቢቦሙ ተፈሥሑ ዐቢየ ፍሥሓ ወተናዘዙ።

³² ወአጽንዑ አኀወ በነገር ዘተርፈ በቃሎሙ ወመሀርዎሙ ይሁዳ ወሲላስ እስመ ነቢያት እሙንቱ ወአጽንዕዎሙ ለቢጾሙ በቃሎሙ።

³³ ወጐንድዮሙ ፈነውዎሙ በሰላም ቢጾሙ ኀበ ልኡካን።

³⁴ ወአጥብዐ ሲላስ ይንበር ህየ።

³⁵ ወጳውሎስ ወበርናባስ ጐንደዩ አንጾኪያ ወመሀሩ ወሰበኩ ቃለ እግዚአብሔር ምስለ ባዕዳን ብዙኃን።

በእንተ ሐውጾተ አኀው

³⁶ ወእምድኅረ ኅዳጥ መዋዕል ይቤሎ ጳውሎስ ለበርናባስ ንሠወጥ እንከሰ ወነሐውጾሙ ለኵሎሙ ቢጽነ በኵሉ አህጉር እለ መሀርኖሙ ቃለ እግዚአብሔር ወናእምር ዘከመ እፎ ሀለዉ።

³⁷ ወፈቀደ በርናባስ ይንሥኦ ለዮሐንስ ዘተሰምየ ማርቆስ።

³⁸ ወኢፈቀደ ጳውሎስ ይንሥኦ ምስሌሆሙ እስመ ኀደጎሙ እንዘ እሙንቱ በጵንፍልያ ወሖረ ወኢመጽአ ምስሌሆሙ ውስተ ግብር።

³⁹ ወበእንተዝ ተማዕዑ ወተፋለጡ ዘዘዚኣሆሙ በርናባስ ነሥኦ ለማርቆስ ወነገደ ቆጵሮስ።

⁴⁰ ወጳውሎስ ኀረዮ ለሲላስ ወሖረ ወአማሕፀንዎ ቢጹ በጸጋ እግዚአብሔር።

⁴¹ ወዖደ ሶርያ ወቂልቅያ ወአጽንዐ አብያተ ክርስቲያናት።