ግብረ ሐዋርያት 14 - ሐዲስ ኪዳን በልሳነ ግእዝምዕራፍ 14 በእንተ ትምህርት ዘመሀሩ በኢቆንዮን 1 ወበሀገረ ኢቆንዮን ቦኡ ምኵራበ አይሁድ ወአረሚ ወነገሩ ዘከመ ይነግሩ ዘልፈ እስከ አምኑ ብዙኃን ጥቀ እምአይሁድ ወእምአረሚኒ። 2 ወቢጸ አይሁድ እለ አበዩ ተበአሱ ምስለ አሕዛብ ወምስለ ሐዋርያት ወአጽዐርዋ ለነፍሶሙ። 3 ወነበሩ ጕንዱየ መዋዕለ እንዘ ይነግሩ በስሙ ለእግዚእነ እንዘ ውእቱ ያርኢ ሰማዕተ ቃለ ጸጋሁ ወይገብር ተኣምረ ወመንክረ በእደዊሆሙ። በእንተ ጸብእ ዘኮነ ማእከለ ሕዝብ 4 ወተናፈቁ ኵሉ ሀገር መንፈቆሙ መንገለ አይሁድ ወቦ እለሂ ኀበ ሐዋርያት። 5 ወተበአሱ አይሁድ ወአረሚ ምስለ መላእክቲሆሙ ወአኀዙ ይጻዐሉ ወይትዋገሩ። 6 ወርእዮሙ ሐዋርያት ጐዩ ውስተ አህጉረ ሊቃኦንያ ወልስጥራን ወደርቤን ወውስተ አድያም። 7 ወመሀሩ በህየ። በእንተ ድዉይ ዘሀገረ ልስጥራን 8 ወሀሎ አሐዱ ብእሲ በሀገረ ልስጥራን ዘፅዉስ እገሪሁ እምከርሠ እሙ ወዳእሙ ይነብር ግሙራ ወእምአመ ኮነ ኢሖረ። 9 ወሰምዖ ለጳውሎስ እንዘ ይነግር ወነጸሮ ጳውሎስ ወርእዮ ከመ ቦ ሃይማኖት ወየሐዩ። 10 ወይቤሎ በዐቢይ ቃል ለከ እብለከ በስሙ ለእግዚእ ኢየሱስ ክርስቶስ ተንሥእ ወቁም በእገሪከ ርቱዐ ወሶቤሃ ተንሥአ ወሖረ። በእንተ እለ ፈቀዱ ሠዊዐ ለሐዋርያት 11 ወርእዮሙ አሕዛብ ዘገብረ ጳውሎስ ከልሑ በነገረ ሊቃኦንያ ወይቤሉ አማልክት ተመሰሉ ሰብአ ወወረዱ ኀቤነ። 12 ወሰመይዎ ለበርናባስ ድያ ወለጳውሎስ ሄርሜን እስመ ውእቱ ሊቀ ትምህርቱ። 13 ወአምጽኡ ማሬ ዘድዮስ ዘሀሎ ቅድመ ሀገር ምስለ አልሕምት ወመሣውዕ ኀበ አንቀጸ ዐጸደ ማኅደሮሙ ምስለ ሕዘቢሆሙ ወፈቀዱ ከመ ይሡዑ ሎሙ። በእንተ ገሥጾቶሙ አሕዛበ 14 ወሰሚዖሙ ሐዋርያት በርናባስ፥ ወጳውሎስ ሰጠጡ አልባሲሆሙ ወሖሩ ኀበ አሕዛብ ወከልሑ ሎሙ። 15 ወይቤልዎሙ አንትሙ ሰብእ ምንትኑ ዝ ነገር አኮኑ ከማክሙ ሰብእ ንሕነ ዘንመውት ወንሜህረክሙ ከመ ትኅድጉ ዘንተ ከንቶ ወትትመየጡ ኀበ እግዚአብሔር ሕያው ዘገብረ ሰማየ ወምድረ ወባሕረ ወኵሎ ዘውስቴቶሙ። 16 ወኀደጎሙ ለኵሎሙ አሕዛብ ይሑሩ በግዕዞሙ በዘቀዲሙ መዋዕል። 17 እንዘ ኢየኀድግ ርእሶ ዘእንበለ ሰማዕት ወይገብር ሠናይቶ ወይሁብ እምሰማይ ዝናመ ወያከርም በበዓመት ወያፈሪ ወያሠምር ከመ ያጽግበነ ወያስተፍሥሕ ልበነ። 18 ወዘንተ ብሂሎሙ በዕፁብ አኅደግዎሙ ለአሕዛብ ኢይሡዑ ሎሙ። በእንተ ትምይንተ አይሁድ 19 ወእንዘ እሙንቱ ይሜህሩ በህየ መጽኡ አይሁድ እምአንጾኪያ ወኢቆንያ ወየውህዎሙ ለአሕዛብ ከመ ያሕሥሙ ልቦሙ ላዕሌሆሙ ወወገርዎ ለጳውሎስ ወሰሐብዎ ወአውፅእዎ አፍኣ እምሀገር ወመሰሎሙ ዘሞተ። 20 ወዖድዎ አርዳኢሁ ወተንሥአ ወቦአ ምስሌሆሙ ሀገረ ወበሳኒታ ሖረ ምስለ በርናባስ ሀገረ ደርቤን። በእንተ ግብአቶሙ ሀገረ ልስጥራን 21 ወመሀሩ በይእቲ ሀገር ወአብኡ ብዙኃነ ወገብኡ ሀገረ ልስጥራን ወኢቆንዮን ወአንጾኪያ። 22 ወአጽንዕዎሙ ነፍሶሙ ለሕዝብ ወመሀርዎሙ ያጥብዑ በሃይማኖት እስመ በብዙኅ ሕማም ሀለወነ ንባኣ ለመንግሥተ እግዚአብሔር። 23 ወሤሙ ቀሲሳነ ላዕለ ቤተ ክርስቲያን ወጸለዩ ወጾሙ ወአማሕፀንዎሙ ለእግዚአብሔር ዘኪያሁ ተአመኑ። በእንተ ጸጋ ዘተውህቦሙ 24 ወኀሊፎሙ እምጲስድያ በጽሑ ጵንፍልያ። 25 ወነገሩ ቃሎሙ በሀገረ ጴርጌን ወወረዱ ኢጣልያ። 26 ወእምህየ ነገዱ አንጾኪያ በኀበ ተውህበ ሎሙ ጸጋ እግዚአብሔር በእንተ ግብር ዘይገብሩ። 27 ወበጺሖሙ አስተጋብኡ ኵሎ ሕዝበ ወነገሩ ኵሎ ዘገብረ ሎሙ እግዚአብሔር ወዘከመ አርኀወ ሎሙ እግዚአብሔር አናቅጸ ሃይማኖት ለአሕዛብ። 28 ወነበሩ ጕንዱየ መዋዕለ ምስለ አርድእት። |